‎ بوابتك للتعلم الذاتى

دليل الطلاب والخريجين لاستخدام LinkedIn باحترافية (شرح لينكد إن بالصور)

دليل الطلاب والخريجين لاستخدام LinkedIn باحترافية (شرح لينكد إن بالصور)
يحتوي هذا الموضوع على:
    شرح لينكد إن
    لو بتقرأ المقالة دى، فأكيد أنت تعرف منصات التواصل الاجتماعي "فيس بوك - تويتر - انستجرام - سناب شات .. إلخ"
    وأكيد عندك أكونتات عليهم، ويمكن تكون بتقضي أغلب وقتك هناك بدل ما تذاكر أو تطور من نفسك!

    طب ايه رأيك لو تقضي جزء من وقتك على منصة من منصات التواصل الاجتماعي، هتخليك تظهر بشكل احترافي فى سوق العمل، وتفتحلك فرص كتير ودائرة معارف أكبر! وهو ده موضوعنا النهاردة اللى هنتكلم فيه عن منصة LinkedIn. المنصة اللى مهضوم حقها جدا، وللأسف أغلب الشباب مش بيستخدموها وفي منهم ميعرفش حاجة عنها أصلا!

    هنغطى فى المقالة نقط مهمة جدا عن موقع لينكد إن ، ليه هو مهم ليك كطالب أو خريج، ازاى تعمل حساب احترافي عليه، وازاى تستخدمه بطريقة احترافيه عشان تزود دائرة علاقاتك، وكمان تلاقي فرص شغل فى أكبر الشركات!

    ليه LinkedIn مهم ليك جدا؟ 5 أسباب تخليك تستخدم لينكد إن!

    كل منصات التواصل الاجتماعي ممكن سلاح ذو حدين، ياما تستخدمها بشكل مفيد، أو تضيع وقتك عليها من غير اى فايدة، على حسب استخدامك ليها. بس موقع لينكد إن استخدامه بيكون مختلف عن باقي المنصات. ومن الأسباب اللى تخليك تستخدم LinkedIn ويكون عندك حساب عليه هما:

    1- لينكدان بيساعدك تظهر بشكل مهنى احترافي:

    لينكد إن يعتبر من أسهل وأقوى الطرق عشان تظهر اونلاين بشكل احترافي، على سبيل المثال لو حد من مسئول التوظيف، بحث عن اسمك على جوجل هيظهرله الاكونت بتاعك على موقع لينكد إن، وده بيدى انطباع كويس جدا.
    (شرح لينكد إن بالصور)

    2- لينكد إن بيكمل ال CV بتاعك (احيانا بيكون بديله):

    لو لسة معملتش الCV بتاعك، وقف قراءة دلوقتي حالا وادخل اعمله من هنا، لأن السيرة الذاتية مازلت من أهم الخطوات الاساسية للحصول على اى وظيفة.

    بس مع ظهور لينكد إن اللعبة بقي ليها حسابات تانية، والواقع ان بقي في عدد كبير جدا من ال HRs بيبصوا على حسابك في لينكدإن، وبياخده منه انطباع مبدئي عنك وعن مهاراتك وخبراتك وانجازاتك. بجانب ان من خلال لينكدان تقدر تضيف الCV بتاعك عليه.

    طب ليه ما تفكرش تواكب العصر، وتغير طريقة تفكيرك، وتكون متواجد على لينكدان!

    3- لينكد إن بيساعدك تلاقي شغل فى أكبر الشركات:

    من خلال خدمة التوظيف اللى بيقدمها لينكدان، تقدر تلاقي شغل فى اى مجال وفي أكبر الشركات سواء فى مصر أو برة مصر.
    موقع لينكد إن
    ومن مربع البحث هتكتب اسم المجال اللى بتدور على شغل فيه. وطبعا مينفعش تقدم على شغل من غير ما يكون عندك أكونت قوي ومحترف على لينكدان (هتكلم عن الموضوع باستفاضة في فيديو قريب جدا على قناتنى على اليوتيوب "الفيديو نزل هتلاقيه فى اخر المقال")

    4- لينكد إن بيساعدك تعرف اكتر عن الشركة اللى عايز تشتغل فيه:

    زى ما موقع لينكد إن بيساعد الشركات والHRs انهم يعرفوا عنك أكتر، انت كمان تقدر تعرف عنهم أكتر من خلال لينكدان، ودى ميزة قوية جدا؛ لأنك تقدر تعرف أكبر قدر من المعلومات عن الشركة أو الشخص اللى هيعمل معاك انترفيو، وده هيساعدك جدا طبعا إنك تحضر كويس وتكون جاهز. وكمان هتاخد صورة عامة عن الشركة وتاريخها وثقافتها، وهتحدد هل هي مناسبة ليك ولا لا!

    5- لينكد إن بيساعدك تبنى علاقات مع ناس فى نفس مجالك:

    زى ما اتكلمنا قبل كدة عن اهمية دائرة العلاقات (Networking)، وان الشخص اللى عنده دائرة علاقات أكبر، هتكون فرصه أكتر!
    فأكيد المكان المناسب عشان تلاقي ناس فى مجالك هو لينكدان، على الرغم من ان الفيس بوك هو أكبر شبكة تواصل اجتماعي حاليا، إلا ان لينكدان أقوى منه فى النقطة دى، لان لينكدان متخصص للشغل والعلاقات والفرص، انما فيسبوك مش متخصص فى كدة!

    كل اللى عليك، هتبحث عن اسم مجالك فى مربع البحث على لينكدان، وتبدأ تشوف مين الناس اللى شغالين فى المجال ده، وايه الشركات المتاحة، وهتقدر توصل لمديرين الشركات، وأصحاب البيزنس، وهتقوى شبكة علاقاتك جدا.

    "بشكل شخصى موقع لينكد إن ساعدنى جدا فى معرفة أشخاص ذوي خبرة كبيرة جدا، عمرى ما كنت هعرفهم ولا هقدر أوصلهم الا من خلاله"

    ازاى تعمل حساب على لينكد إن بشكل احترافي (وايه الأخطاء اللى متقعش فيها)

    أعتقد دلوقتى أنت عرفت ليه مهم يكون عندك حساب على لينكدان، وأكيد نفسك تعمل حساب دلوقتي حالا، وعشان كدة هقولك على الخطوات، مع شوية نصائح مهمة جدا، وأخطاء تخلى بالك عشان متقعش فيها. يمكن الأغلب بيعتقد ان عمل اكونت احترافي على لينكدان أمر صعب، بس لو مشيت على الخطوات الجاية دى هيكون الموضوع سهل جدا عليك..

    1- استخدم صورة مهنية:
    صورة البروفايل بتكون أول حاجة بيشوفها المستخدمين، وبتدى انطباع عنك وعن البروفايل بتاعك بشكل عام، وطبعا لازم تكون صورة مهنية، وأوعى تغلط ومتحطش صورة أصلا، لأن دى غلطة كبيرة بيقع فيها ناس كتير.
    • حاول تخلى جودة الصورة كويسة
    • تكون بلبس semi formal على الأقل
    • طبعا حاول تكون صورة حديثة، بمعنى انها متصورة من قريب، مش من 7،8 سنين!
    2- اكتب نبذة قوية وجذابة:
    بعد ما تجهز صورة مهنية كويسة وتستخدمها، لينكدان هيقولك علي باقي الخطوات المطلوبة فى عملية انشاء حسابك، بس فى خطوة مهمة جدا لازم تجهزلها وتديها وقت أكتر، وهى النبذة المختصرة الخاصة بيك، ودى بتدى نظرة سريعة، مختصرة عنك.

    بعد ما تعمل البروفايل بتاعك، هتدوس على علامة القلم، زى ما فى الصورة كدة.
    شرح لينكد إن
    بعد كدة هيظهرلك الأقسام دى، ركز جدا جدا فى "Headline" لان دى اللى بتظهر تحت اسم البروفايل بتاعك على طول، ممكن تكتب فيها مميزاتك ومهاراتك وانجازاتك، أو الوظائف والمهن اللى أنت شغال فيها.
    شرح لينكد إن بالصور

    طب لو حابب تضيف وظيفة جديدة ومكان جديد اشتغلت فيه، هتدوس على "Add new position"، وهيظهرلك صورة زى دى.
    شرح لينكد إن بالصور

    وهتحط البيانات المطلوبة فى الصورة (اسم الشركة - ال Job Title - مقر الشركة - وصف لطبيعة شغلك .. إلخ)
    وطبعا خلى بالك وأنت بتضيف وظيفة جديدة لان لو لاحظت تحت هتلاقي أوبشن انك تشارك الوظيفة دى مع شبكة علاقاتك أو لا، أنصحك بلاش تفعلها لو الوظيفة دى قديمة، بمعنى مثلا مكنش اشتغلت فى مكان ما وسيبته، يبقي بلاش اشيره مع الناس.

    هتكلم باقي البيانات المطلوبة منك زى مؤهلاتك الدراسية "بتكتب فيها اسم الكلية وتخصصك وهكذا"
    (مش هنطول فى شرحهم عشان لسة فى حاجات أهم نتكلم فيها)

    وطبعا أهم حاجة تركز في كتابتها هى "Summary" دى مسموحلك تكتب فيها براحتك معاك لحد 2000 كلمة، وطبعا ده اختيارى، بس أنصحك تكتبها بتركيز، وبيكون فى أوبشن ان لينكدان بيكتبها مكانك (بناءا على المعلومات بتاعتك) بس بلاش تعتمد عليها واكتبها بايديك.


    3- اكتب خبراتك والأماكن اللى اشتغلت فيها:
    شرح لينكد إن بالصور

    وهنا للأسف طلبة كتير بتقول أنا معنديش خبرات عشان أكتبها، ولا اشتغلت فى أماكن قبل كدة، أنا لسة طالب فى الجامعة!
    بس أنت مش محتاج تكون "تنين مجنح" عشان تعجب ال HR، أنت محتاج تكون صادق وآمين فى معلوماتك اللى هتكتبها "حتى لو قليلة"؛ لأنهم عارفين انك لسة طالب ومقدرين ده، يعنى مش محتاج تكتب حاجات وهمية أو يكون عندك بروفايل "نجيب ساويرس" مثلا.

    وأكيد لو عندك خبرات أو تجارب مريت بيها، يبقي ممتاز جدا ولازم تذكرها، زى مثلا تدريب فى شركة معينة، إنجاز معين حققته، مشروع بدأته وعملت منه نتائج كويسة، شغل Part Time اشتغلته قبل كدة، وطبعا لو تطوعت فى مكان كبير، وحققت فى انجازات مملوسة او اكتسبت خبرات يبقي ممتاز جدا جدا.

    4- اكتب مهاراتك بشكل محترف وصادق:

    لينكد إن بيتيح ليك انك تكتب 50 مهارة، بس أنا مش برشح انك تكتب 50 مهارة، ليه؟
    لأن المقصود بالمهارات هنا، هى المهارات المتعلقة بالشغل بتاعك، والمهارات اللى فعلا عندك، بمعنى مينفعش أكون مثلا بعرف ألعب على الجيتار شوية، وأروح أكتب انى عندى المهارة دى! لأن كونى بعرف ألعب جيتار ده مش معناه انى متخصص ومتقن للمهارة ككل!

    يفضل أنك تذكر المهارات اللى فعلا فيك، وبلاش تكتب الجو بتاع "Work under pressure"

    طب إمتى اكتب ان مهارة ما عندى؟
    اسأل نفسك سؤال، لو أنت فى انترفيو، هتقدر تثبت ان المهارة دى عندك وانت متقنها ولا لا؟
    لو اجابتك "اه" اكتبها على طول، ولو اجابتك "لا" يبقي بلاش تكتبها أحسن (ده لمصلحتك والله)

    ويفضل تحط المهارات المتعلقة بمجالك، وخلى أصدقائك أو الناس اللى اشتغلت معاهم يدخلوا يعملوا ليك "endorsement"
    شرح لينكد إن

    5- خصص رابط البروفايل بتاعك:

    زى ما قولنا فى بداية المقال، ان لينكد إن بيظهر اسمك فى محركات البحث، والخطوة دى تحديدا هتسهل عليك العملية جدا.
    وعشان تعمل الخطوة دى، هتدوس على "Edit public profile and url" هتلاقيها على اليمين زى ما فى الصورة
    شرح لينكد إن
    بعد كدة هتروح لصفحة التعديل وهتضغط على رمز القلم وتكتب رابط البروفايل الجديد، يفضل يكون باسمك زى كدة.
    شرح لينكد إن

    6- الانجازات (Accomplishments):

    وده قسم مفيد جدا، وتقدر تحط فيه كل الانجازات اللى عملتها، ولينكدان مقسمها بشكل جميل ده، هتلاقيهم بالشكل ده
    شرح لينكد إن
    زى ما موضح فى الصورة كدة، تقدر تحط فيها اى انجاز زى مثلا لو نشرت ورقة بحثية فى مجالك، لو خلصت كورس معين سواء اونلاين او أوفلاين، لو عملت مشروع تخرج مثلا، لو اتعلمت لغة جديدة، لو أنت عضو فى منظمات كبيرة، وهكذا.

    وطبعا لازم تعمل update لبروفايلك باستمرار
    احرص دايما من فترة للتانية انك تدخل على بروفايلك وتعمله update بكل حاجة حصلت جديدة فى حياتك المهنية.

    دلوقتى انت ظبطت البروفايل بتاعك وبقي في كل المعلومات المهمة عنك بشكل محترف. كدة أنت جاهز للاستفادة من لينكدان وتستغله بشكل مثمر، وده هياخدنا للكلام عن

    ازاى تستخدم موقع لينكد إن فى بناء شبكة علاقات قوية؟

    ال Connections الخاصة بيك على لينكدان (حاجة شبه أصدقائك على الفيس بوك) هى أهم حاجة فى الموضوع، لان من خلالها هتقدر تزود فرصك، سواء شغل أو منح أو تدريب فى شركات كبيرة.

    1- خليك مهنى:

    لينكدان طبيعته مختلفة شوية عن الفيس بوك وباقي وسائل التواصل الاجتماعي، لينكدان للتعامل المهنى فقط، يعنى مش هتلاقي عليه بوستات (حب - فيديوهات كورة - قفشات أفلام - ألعاب .. إلخ) وكل وسائل التسلية المتاحة فى الفيس بوك.

    النقاشات والبوستات على لينكدان هتلاقي أغلبها مهنى، فرص شغل - تطوع - تدريب، مقالات مهمة وهكذا.
    وعشان كدة لازم تخلى بالك جدا، وتدرك إن LinkedIn مش المكان اللى تنشر فيه بوستات تافهه أو فريقك المفضل، خروجات مع صحابك، ولا آرائك السياسية وهكذا حوش كل البوستات دى للفيس بوك وتويتر.

    لازم البوستات اللى تنشرها تكون مهنية أو متعلقة بمجالك بشكل أو بآخر، تكون بوستات مفيدة سواء مقالات أو مصادر أو فرص عمل وهكذا.

    ليه ده مهم جدا؟ عشان لما تيجى تعمل Connection مع حد، أول حاجة بيبص عليها هى بروفايلك، ولو مكنش مهنى ومفيد، فالنتيجة بنسبة كبيرة هتكون أنه هيتجاهلك.

    2- أعمل Connect مع أكبر عدد ممكن من الناس:

    طبعا مش قصدى انك تبعت لاي حد يجي فى طريقك عمال على بطال، ولكن فى نفس الوقت متخفش أو تترد فى أنك تطلب connection مع الأشخاص اللى هيقترحهم عليك لينكدان، زى خاصية الأصدقاء المقترحين فى الفيس بوك.

    لأنك متعرفش مين فيهم ممكن يكون مفيد ليك، وتشاركوا مع بعض فرص وأفكار ومصادر، أو ممكن يوصلك بشخص بتحاول توصله من زمان ومش عارف!

    يعنى باختصار أنت مش لازم تكون عارف الشخص معرفة شخصية قبل ما تبعتله، وحاول تنوع فى شبكة علاقاتك، يعنى ابعت لناس فى مجالك وناس فى مجالات مختلفة وكبر شبكة علاقاتك وخليه متنوعة.

    3- خد Recommendations من شبكة علاقاتك:

    التوصية (Recommendation) من اهم الحاجات اللى لازم تحرص انك تحصل عليها وتكون موجودة على بروفايلك فى LinkedIn. لانها بتديك مصداقية قوية جدا ومفيدة جدا، وده طبعا بيزود قوة البروفايل بتاعك.

    والتوصيات بشكل عام يفضل تكون من الناس اللى اشتغلت معاهم قبل كدة، سواء فى تطوع أو شغل فى وظائف أو شركات قبل كدة.
    وهى باختصار "الناس بتقول عليك ايه على شغلك ومهاراتك وأخلاقك وتصرفاتك فى الشغل، باختصار هى سمعتك المهنية"

    ويا حبذا لو الRecommendation دى جاية من مدير الشركة أو حد صاحب منصب عالى فى مجالك! ساعتها هتفرق معاك جدا جدا مستقبلاً لو قدمت فى اى شغل.

    طب تعملها ازاى؟
    باختصار ادخل على لينكدان وتواصل مع الناس اللى اشتغلت معاهم قبل كدة واطلب منهم يعملوا ليك Recommendation، وطبعا بلاش تخلى اخواتك او حد من صحابك هو اللى يعملها لانها مش هتكون مفيدة ولا صادقة، الا طبعا لو صاحبك أو قريبك اشتغل معاك قبل كدة وعارف أسلوبك فى الشغل وخبرتك عاملة ازاى، ساعتها التوصية بتاعته هتكون مفيدة.

    4- انضم للجروبات المتعلقة بمجالك:

    مش هتكلم فى النقطة دى كتير، بس هى مهمة جدا جدا، زى ما الفيسبوك علي جروبات، لينكدان كمان عليه جروبات قيمة ومليانة بالأشخاص والمصادر المفيدة جدا ليك.

    وعشان توصل للجروبات المتعلقة بمجالك، هتروح على مربع البحث، وتكتب اسم المجال بتاعك، وتخلى البحث بالجروبات فقط، هيظهرلك كل الجروبات المتعلقة بمجالك، ادخل عليها، واعمل طلب انضمام، بس كدة، بالسهولة دى!

    على سبيل المثال، أنا مهتم حاليا بمجال SEO، وعايز أزود شبكة علاقاتى فيه، واتعلم من مصادر أكتر، واشوف الناس فى المجال ده وصلت لفين، فدخلت على مربع البحث وكتبت اسم المجال وظهرلى كل الجروبات المهتمة بالمجال.
    موقع لينكد إن

    ازاى تستخدم LinkedIn عشان تلاقي شغل فى مجالك

    زى ما اتكلمنا من شوية ان LinkedIn هو منصة مهنية هتلاقي عليها أكبر عدد ممكن من العلاقات، كمان LinkedIn هو منصة عظيمة جدا جدا عشان تلاقي شغل فى مجالك وفى أكبر الشركات كمان! وللأسف محدش كتير بيتكلم عن النقطة دى، بس هشرحهالك بكل بساطة عشان تقدر تستخدم LinkedIn بشكل محترف وتلاقي فرص شغل كتير.

    1- البحث فى الوظائف المتاحة على لينكدان

    هتدخل على الرابط ده: https://www.linkedin.com/jobs/
    ده المكان الخاص بالوظائف على لينكدان، هتدخل وتكتب فى مربع البحث اسم المجال اللى حابب تشتغل فيه، على سبيل المثال تعالى ناخد مجال human resources (hr) 
    شرح لينكد إن
    زى ما فى الصورة كدة، كتبت اسم المجال فى البحث، وبدور على شغل فى مصر (ممكن تختار اى دولة تانية)
    بيجيلى كل الفرص المتاحة حاليا فى المجال ده، والشركات اللى طالبة الوظيفة دى، وأقدر أعرف نوع الوظيف، كام واحد مقدم عليها، كل المعلومات عن الشركة، طريقة التقديم، وهكذا. تقدر طبعا من خلال فلتر البحث تحدد على بتبحث مثلا عن شغل part time أو freelancing.


    أنصحك بعد ما تخلص المقالة وتعمل حسابك على لينكدان، تدخل تدور على وظائف فى مجالك وقولي النتيجة ايه✌

    2- تواصل مع حد من داخل الشركة:

    لو لقيت فرصة كويسة فى شركة معينة، حاول تبحث عن الأشخاص اللى شغالين فيها، وتبدأ تتواصل معاهم "مش لازم توصل للشخص اللى هيعمل معاك انترفيو" حاول تعمل connection مع أشخاص من جوه الشركة، بعد كدة هتقدر تعرف من خلاله ثقافة الشركة ومعلومات عنها، وكمان هيقدر يساعدك ويقدمك للشخص اللى هيعمل معاك انترفيو. 

    وأوعى تفكر وتقول أنا لسة طالب ومحدش هيساعدنى!، بالعكس أغلب الناس بتحب تساعد الطلبة، وخاصة الطلبة الطموحين اللى زيك، فجمد قلبك وزود شبكة معارفك بقلب جامد.

    أعتقد ان أغلب اللى بيقرأ المقال طلاب، واكتر حاجة تهم الطلاب وتحل مشكلة الخبرة، هى التدريب الصيفي (Internship)
    ومن خلال لينكدان هتقدر توصل لاكتر من فرصة، حدد بس الشركات اللى نفسك تدرب فيها، تواصل مع ناس من جوه الشركة، ظبط البروفايل بتاعك، واسالهم عن فرص التدريب وشوف المتطلبات وجهز نفسك ليها، واخلق الفرص لنفسك، متستنيهاش اما تيجي لحد عندك!

    الخاتمة:
    لو وصلت لحد هنا، فأنا بشكرك بشكل شخصى، وأعتقد الصورة بقت واضحة ليك أكتر دلوقتي، وبقيت عارف ازاى تستخدم لينكدان، ازاى تبنى وتزود شبكة علاقاتك، وازاى تلاقي شغل فى مجالك من خلاله.

    اكتب رابط بروفايلك على لينكدان فى التعليقات وهبعتلك عليه، وهتلاقي ناس كتير هتباعك.
    و تقدر تضيفنى مباشرة من هنا: https://www.linkedin.com/in/ahmed-sysy/

    كل المطلوب منك دلوقتي تطبق الخطوات بتركيز، ومتقلقش أنا معاك لو فى خطوة وقفت معاك أو لو عندك أى سؤال، وباذن الله بحضر سلسلة فيديوهات بشرح عملى أكتر للخطوات المشروحة هنا، عشان منطولش فى المقال أكتر من كدة.

    لو استفدت من المقالة، أتمنى انك تشاركها مع أكبر عدد ممكن من طلاب الجامعة والخريجين الجدد، عشان لينكدان حرفياً هيفرق معاهم جدا.
    Ahmed Sysy
    @مرسلة بواسطة
    مؤسس نادي القراءة العملية، ومتخصص فى صناعة المحتوى، وتحسين محركات البحث "SEO" أسعى لمساعدة مليون شاب لبداية رحلة التعلم الذاتي