القائمة الرئيسية

الصفحات

كورسات مجانية اون لاين من لينكدان (وكل اللي لازم تعرفه عن LinkedIn Learning)

كورسات اون لاين مجانية

ساعات بنتوه جوا كم المصادر اللي عايزين ناخد منها المهارة المحتاجين لها، لينكد إن حل المشكلة دي ببساطة من خلال خدمة LinkedIn Learning اللى هتلاقيها فيها كورسات منفردة ومسارات تعليمية "Learning Path". بكدا كل كورساتك في مكان واحد زي المكتبة من غير ما تدور كتير.

كل الناس عارفة أهمية لينكدإن كأفضل منصة تواصل مهنى بتجمع ما بين الشركات والموظفين، والطلاب والخريجين، وكل ما يخص سوق العمل، وحاليا بيسعى انه يكون من افضل المواقع اللى بتقدم كورسات اون لاين من خلال خدمة LinkedIn learning وهنفهم ايه هي واحدة واحدة.

ايه حكاية LinkedIn Learning؟


من 5 سنين لينكد إن اشترت موقع ليندا للكورسات وسيطرت على كل المحتوى اللي فيه.

بعدها بسنة أسست خدمة LinkedIn Learning بنفس المحتوى لكن بشكل متطور شويه.

وهتعرف موقع ليندا باستفاضة بعد ما تتفرج على الڤيديو من هنا

طب كورسات LinkedIn Learning مدفوعة ولا لا؟


الحقيقة إن موقع ليندا معظم كورساتها باشتراك مدفوع، ودا اللي خلاه يفضل باشتراكات بعد ما لينكدإن اشترته. 

ولو جينا اتكلمنا عن جودة كورسات لينكدإن فمفيش غبار عليها، ولو أنت من اللي بيحبوا يشوفوا reviews قبل ما تبدأ في أي حاجة، اقرأ عن تجارب الناس قبل وبعد ما خلصوا كورساتهم من LinkedIn Learning وهتتحمس.

دا يخليها تستحق وبجدارة تكون مدفوعة لعدد من الأسباب غير جودتها:
  • موثوق فيها من أكبر الشركات العالمية، أو زي ما بنقول عليها معتمدة، وبعدين تخيل لما يبقى المكان اللي بيساعد إنه يشغل الناس هو بردو اللي بيديهم المهارات اللي هيشتغلوا بيها! أكيد دي أكتر حاجة موثوقة.

  • عليه أكتر من 4000 كورس في كل المجالات، أولا الموقع بيبقى عارف أنت مين وبتعمل ايه يقوم يرشح لك الكورس المناسب ليك على الأساس دا، تاني حاجة مش هتشيل هم إن فيه مهارة معينة مش عارف تطورها منين لإن كم الكورسات كتير.

  • السبب الأخير والأهم إن بمجرد ما تخلص الكورس تقدر بسهولة تشارك شهادتك فأي HR يختارك للوظيفة اللي أنت عايزها، ودا الهدف الرئيسي ليك أصلا.
أول ما تقرر تشترك في خدمة LinkedIn learning هتاخد شهر واحد مجاني تجريبي، لكن بعد مرور الشهر هيسحب من حسابك اشتراك شهري بشكل تلقائي، وتكلفته حوالي 30 دولار شاملين الشهادة في نهاية الكورس. تقدر تسجل فيه من الجزء الخاص بيه على الموقع في الاعدادات. (سكرين)

بس خلي بالك لو مش عايز يتاخد من حسابك جنيه الغي اشتراكك قبل الشهر ما يخلص لإنه بيسحب تلقائيا.

طب لو انت حابب تتعلم مجانا من LinkedIn Learning بدون الخطوات السابقة تعمل ايه؟

ده اللى الكنز اللى هتعرفه فى باقي المقال، ركز فى اللى جاي..

فهمت ايه خدمة LinkedIn Learning، مش كدا؟ learning path بقى جزء لا يتجزأ منه، فيه حوالي سبعين مسار تعليمي. طبعا كلهم بتقدر تاخدهم بمجرد اشتراكك، لكن حاليا مش هتحتاج شهر تجريبي، لإن عندك أهم عرض لكورسات لينكد إن!

الفيديو ده فى شرح لكيفية الحصول على كورسات لينكدإن المجانية وكمان ازاى تترجم الكورسات للعربي



الموقع قرر يفتح مسارات تعليمية كاملة مجانا في 10 وظايف لحد ميعاد 31 مارس 2021.

كدا الاشتراك بقى سهل والكورسات معاك لفترة طويلة، مبقاش فيه حجة. بمجرد ما تشترك هتتعلم مهارات أي واحدة من العشر وظايف اللي هم:
  1. Software developer
  2. Project manager
  3. IT Administrator
  4. Customer service specialist
  5. IT support/ Helpdesk
  6. Data analyst
  7. Sales representative
  8. Digital marketer
  9. Graphic designer
  10. Financial analyst
لينك العرض من هنا: https://bit.ly/2W6hVcc

ليه لينكد إن اختار العشر وظايف دول بالذات؟

متستغربش، الوظايف دي متحددة عن طريق تحليلات أثبتت إنهم أكتر مجالات مطلوبة حاليا.

جملة زي دي هتخليك لو فكرت تدرس واحدة منهم، فدلوقت هتحس إنك عايز تتعلمها وأنت مغمض.

Learning Path مش مجرد كورس واحد.

هي مجموعة كورسات بتشرح كل مهارة بتتطلبها الوظيفة اللي هتختارها، وغير كدا الموقع بيديك نظرة شاملة على المجال كله مش بس تخصصك. بمعنى أدق لو افترضنا أن Learning Path (المسار التعليمي) اللي هتختاره هو Digital Marketer دا معناه أنك هتتعلم كل الأساليب الأحدث للوظيفة، وتدريجيا من أول ايه هي مؤسسات التسويق الالكتروني لحد اخر كورس بينهيه معاك بأخرمهارة المفروض تكتسبها وهي Graphic Design. كل دا عشان بمجرد ما تنتهي تكون Marketer جاهز. ونفس الرحلة لما تختارأي مسار تعليمي منهم.

لو خلصت الكورسات وبقيت متخصص في مجالك دا مش كفايه..

لينكد ان تحليلاته دقيقة، وهو عارف أنت محتاج ايه من قبل ما أنت تعرف. وإنك تخلص كورسات المسار ما هو إلا أول خطوة. تاني خطوة جنب مهارات الوظيفة بتكون انك محتاج مهارات تعرض بيها نفسك على الشركات زي كتابة السي في وتحسين صفحتك الشخصية على الموقع.

أما تالت خطوة هي ازاي هتجهز نفسك للانترڤيو، نصايح وأسئلة وإجاباتها كلها هنا.

الخاتمة:

خليك فاكر قبل الخطوات دي إن لما تعوز تبني نفسك في تخصص، البناء زي ما بيحتاج منك وقت هيحتاج منك مهارات فوق بعض زي المكعبات، ممكن تاخد وقتك الأكبر في إنك تعرف ازاي تحط المكعب الصح في المكان الصح عشان يبقى بناءك مظبوط. لكن وأنت شايف Learning Path (مسار تعليمي) بياخدك من ايديك يقولك هتبدأ منين وتنتهي فين زي ما لينكد إن بيعمل، هتكون وفرت معظم وقتك.

بعد ما فهمنا سوا كل حاجة تخص لينكد إن وكورساته، وعرفنا ايه أهم عرض بيقدمه، جه الوقت عشان تسجل في كل اللينكات اللي سبتها لك فوق، وتشاركنا تجربتك مع نهاية كل كورس فيهم.
author-img
كاتبة محتوى تسويقي وإبداعي، مقدمة ومعدة لبرنامج في محطة راديو اون لاين.

تعليقات