غير حياتك من الفيس بوك فى 3 خطوات سحرية ! - نادي القراءة العملية
404
نعتذر , لا نستطيع ايجاد الصفحة المطلوبة

23 أغسطس 2017

غير حياتك من الفيس بوك فى 3 خطوات سحرية !

ازاى الفيس بوك يغير حياتك

غير حياتك من الفيس بوك واتعلم ازاى تستخدمة صح 

بتقضى كام ساعه على الفيس بوك ؟ 

سؤال محرج مش كده ؟ نخلى السؤال محرج اكتر , بتضيع كام ساعه على الفيس بوك ؟

طب ايه رايك لو اتعلمت تستخدم الفيس بوك بطريقه تساعدك فى حياتك العمليه وتطوير نفسك ؟

هو ده موضوع مقالاتنا النهارده اللى هنتكلم فيها عن خطوات عمليه و3 مبادئ وكلمات سحريه تقدر تطبقهم فى جميع جوانب حياتك.

قبل ما نبدا المقاله خلينا افكرك بمشهد عبقرى للممثل احمد حلمى فى فيلم مطب صناعى 

لما سال الشيخ عن استخدامه للكمبيوتر وانه بينزل نغمات للناس راح الشيخ نصحه النصيحه دى وقاله:

( الكبايه اللى بتشرب بيها " مياه " هى هى نفس اللى ممكن تشرب بيها " خمرا " يعنى زى ما تكون مفيده ممكن تبقى سيئه
المهم استخدامك ليها ايه و ازاى ؟ )

3 خطوات سحرية تساعدك  تغير حياتك من الفيس بوك

ده بالظبط اللى حصل معايا , انا كنت زى كتير من الشباب بضيع وقت كتير جدا على الفيس بوك من غير استفادة وبشوف بوستات كتير ملهاش لزمه , ومضيع وقتى ما بين خناقات واختلاف فى وجهات النظر و جدالات كتيير سؤاء فى الكوره او السياسه او الفن .

ده غير الجروبات اللى ملهاش لزمه و كنت سايب نفسى للبوستات والجروبات هى اللى بتشكل ثقافتى وكنت تابع مش بعمل حاجه مفيده فى حياتى . و اتحول الموضوع لادمان الفيس بوك  وتقريبا 95% من وقتى كان بيضيع على الفيس بوك من غير اى شئ مفيد وكنت بشتكى كتير من ظروف البلد و ان مفيش شغل و الشماعات والحجج اللى انتو عارفينها اكتر منى ..

وكنت شايف الواقع اسود ومفيش اى امل , مع ان فى نفس الوقت كان فى شباب فى سنى بتنجح فى نفس الواقع ونفس ظروف البلد وهنا ادركت " ان الواقع هو نتيجه اختياراتك وقراراتك وتقدر تشكله زى ما انت عايز "

3 خطوات سحرية تساعدك  تغير حياتك من الفيس بوك

لحد ما فى يوم قررت اغير نظرتى للواقع ده واعمل ثوره على استخدامى للفيس بوك و عرفت 3 كلمات ومبادئ سحرية غيرت حياتى حرفيا لما طبقتهم فى كل جوانب حياتى .
( تخلى - تحلى - تجلى ) 
يعنى ايه المبادئ دى ؟ و ازاى تطبقهم فى الفيس بوك عشان يغيروا حياتك زى ما حصل معايا واتحول الفيس بوك بالنسبالى لاداه قويه جدا جدا بتساعدنى فى شغلى وبفيد بيها الناس واتعلمت ازاى استخدم الفيس بوك صح بدل ما اقفله . ودى من المبادئ اللى بنوصلها ديما فى نادى القراءه العمليه  انك تتعلم ازاى تستخدم ادوات التنكولوجيا صح لانها سلاح ذو حدين.

 انا  ديما بقول
" صفحتك الرئيسيه على الفيس بوك بتشكل تفكيرك  "
لو كل اللى بيظهرلك على الفيس بوك حاجات تافهه و كئيبه ومش بتضيف ليك قيمة هتلاقي الافكار دى انعكست على حياتك.

فعشان نطبق ال3 مبادئ السحرية دى يبقى لازم نعمل ثوره على صفحتنا على الفيس بوك . باختصار البوستات بتظهرلك على من خلال 4 حاجات ( الاصدقاء - الجروبات - الصفحات - الناس اللى بتابعها و الاشعارات )

ودلوقتى هنطبق ال3 خطوات السحرية وهتشوف الفرق بنفسك :

1) التخلى

بمعنى انك هتتخلى وهتبعد عن كل حاجه سلبيه ومحبطة ومش بتضيف ليك قيمة على الفيس بوك وخد بالك ان عملية " التخلي " ديما هى البدايه وبتكن صعبة لانك بتغير عادات كتير واسلوب حياة بشكل معين متعود علية , والصادق فقط وعايز يتغير بجد هو اللى هيعمل الخطوه دى .

الخطوه العملية اللى تعملها بعد المقاله دى على طول : تعمل ثوره على صفحتك من الاربع جوانب اللى اتكلمنا فيهم
( الاصدقاء - الجروبات - الصفحات - الناس اللى بتابعها و الاشعارات )

يعنى لو حد من صحابك او الناس اللى بتابعها  بيكتب بوستات كئيبة وسلبية مش هقولك الغى الصداقة لان ده غلط , بس هتعمل " الغاء المتابعة - Unfollow". زى الصوره دى كده

الفيس بوك جروبات مفيدة

و كذلك مع الجروبات المتشرك فيها , ابدا اعمل فلتره ليهم وهتتفاجئ من كمية الجروبات اللى صحابك دخلوك فيها من غير ما تعرف
هتدخل على الجروبات دى وهتعمل زى الصوره دى كده


وهتتخلى بردو عن كل الصفحات اللى مش بتنزل محتوى قيم او حاجه مفيده وهتعمل الخطوات دى

الفيس بوك جروبات مفيدة


دى كده اول مرحله وهى " التخلى " بتتخلى فيها عن كل حاجه سلبية بتضيع وقتك , اه ممكن تاخد منك شوية وقت لحد ما تنضف صفحتك بس ممكن تقسمها على ايام لحد ما الصفحة تكون جاهزه لاستقبال الخطوه التانية و المهمة جدا واللى من غيرك كانك معملتش حاجه . الخطوه الاولى عليك انت ومحدش هيساعدك فيها , الخطوه اللى جايه عليك بردو بس هنساعدك فيها.

2/ التحلى

ودى الخطوة التانية واللى فيها بتتحلى بكل حاجه حلوه , هى حتى من اسمها " عملية التحلي " يعنى هتضيف كل حاجه حلوه وهتكتسب عادات جديده .

بعد ما تتخلى عن الصفحات الغير مفيده والسلبية وتنضف صفحتك , لازم تبدا تحلى صفحتك من الاربع جوانب هفكركم بيهم تانى
( الاصدقاء - الجروبات - الصفحات - الناس اللى بتابعها و الاشعارات ) 

اعمل see first للصفحات الايجابيه فى مجالك ومجالات تانيه بتحبها وحاوط نفسك بناس شغوفه وصفحات ايجابيه 

3 خطوات سحرية تساعدك  تغير حياتك من الفيس بوك

ضرورى جدا تعمل خطوه  see first عشان البوستات تظهرلك فى صفحتك الرئيسية بسرعه . 

وهنا يجى دورنا بقى , هتسالنى الاقى فين ناس مؤثره فى المجالات اللى بحبها , شوف دول 


فى البوستين هتلاقى كل اللى انت محتاجه فى اغلب المجالات " زى الانجليزى - التسويق - علم النفس - سوق العمل - رياده الاعمال والبيزنس - مبيعات - موارد بشريه HR - التنميه الذاتيه - منح - علوم وطب - سوشيال ميديا - هندسه - اقتصاد .. وغيرهم كتير "
تخيل معايا لما تعمل خطوه التحلى دى وتخلى صفحتك و وقتك على الفيس بوك مفيد جدا وتطور من نفسك وتلاقى منح وفرص عمل وتدريبات وكورسات كل ده من نفس السلاح اللى كنت بتستخدمه غلط . 

الخطوه الاخيره بقى وهى الثمره اللى هتجنيها لما تعمل اول خطوتين وهى

3/ التجلى 

وهنا هتتجلى عليك صفحه جديده من حياتك , وهتظهرلك فرص كتير فى حياتك , هتشوف العالم بصوره مختلفة 
وده حرفيا اللى حصل معايا ومع كل اللى طبق الخطوات دى , مش مصدق صح ؟ طب ايه رايك تجرب بنفسك وتخليها اسلوب حياه وشوف الفرق والنتائج بنفسك ؟ 

الخلاصة

كلنا بنقول ان مفيش وقت عندنا نقرا او نطور من نفسنا بس انت بتكدب على نفسك وبتقرا كل يوم من غير ما تحس , وبتقرا اكتر من ساعه كمان , من كتاب " الفيس بوك " مش انت جاوبت على السؤال فى اول المقاله واعترفت انك بتقضى اكتر من ساعه على الاقل كل يوم على الفيس بوك ؟ وهى البوستات دى مش قراءه بردو ! كل اللى هتعمله بقى انك هتغير البوستات اللى بتشوفها بس وتستغل وقتك بشطاره وتستمع وتطور من نفسك.  اعمل ال3 خطوات وتابع الناس والصفحات اللى موجوده فى الخطوه التانيه وهنستناك تانى تحكيلنا تجربتك والفرق اللى حصل فى حياتك لما بس غيرت استخدامك للفيس بوك . 

يا ترى مين فيكم هيطبق الخطوات دى ؟

شارك المقال

2 تعليق

جميل جدااااااااا :)

جميع الحقوق محفوظة لـ نادي القراءة العملية | تصميم :