‎ بوابتك للتعلم الذاتى

يعني ايه كورسات اون لاين وازاى تتعلم منها اللي نفسك فيه؟ الحقيقة وراء ال MOOCs!

يعني ايه كورسات اون لاين وازاى تتعلم منها اللي نفسك فيه؟ الحقيقة وراء ال MOOCs!
    التعلم عبر الانترنت
    التعلم الذاتى أصبح مهم لكل طالب علم لانك من خلاله تقدر تتعلم كل المجالات عن طريق كورسات اون لاين.
    ومن أهم الاسلحة والأدوات الخاصة بالتعلم الذاتى هى "المووكس - MOOCs" أو "كورسات اون لاين"

    تخيل معايا الصورة دى، تخيل انك حددت مجال انت شغوف بيه وحابب تتعلمه لوحدك، بقيت تتعلم المجال ده كل يوم وبتديله من وقت ساعة وحده بس، بعد سنة أو اتنين تفتكر مستواك هيبقى عامل ازاى فى المجال؟ وتفتكر هتقدر تشتغل فى المجال ده ولا لا؟

    هنعرف الاجابة فى اخر المقال ..

    1- يعني ايه كورسات اون لاين؟ وبداية بداية القصة ال MOOCs؟

    بداية MOOC ده اختصار: Massive Open Online courses.
    كورسات اون لاين يعني مادة معينة بيتم شرحها، وتعلمها عبر الانترنت. التعلم من الانترنت بيفتحلك الفرصة تتعلم أى مجال بتحبه من أى مدرس - خبير -  أو جامعة، من غير ما تخرج من بيتك أو تسافر!

    والمادة العلمية بتكون متاحة ليك اونلاين بردو، وبتكون فى شكل "كتاب الكترونى - PDF - eBooks" - أو فى شكل فيديوهات - حلقات صوتية - مناقشات بينك وبين الطلبة أو دكتور المادة..

    بدأت القصة لما "سلمان خان" عرف ان بنت عمه "الطفلة نادية" مش عارف تتعلم رياضة وبتشتكى من صعوبتها، قرر يشرحلها عن طريق " مفكرة دودل للرسم في موقع ياهو" ولما بدأ مستواها يتحسن فى مادة الرياضة، بعد كده صحاب نادية طلبو من "سلمان خان" نفس الطلب، واقترح عليه واحد صديقه انه يبدأ يعمل فيديوهات شرح ليهم على "اليوتيوب"..

    وفجأة انتشرت فيديوهات "سلمان خان" بقوة وشافها طلاب ومدرسين كتير جدا على مستوى العالم، وأخد جوايز وشهادات تقدير كتير، وفى 2009 قرر يسيب وظيفته "كمحلل مالى" عشان يتفرغ لفيديوهات التعليم على اليوتيوب، وبعدها بفترة أخد تمويل لمشروعه " أكاديمية خان – Khan Academy " لعلوم الرياضيات والهندسة الحسابية..

    انتشرت فكرته وموقعه بشكل كبير جدا لحد ما وصلت لأولاد " بيل جيتس -Bill Gates" واحد من أغنى اغنياء العالم، ولما عرف ان ولاده استفادوا من " أكاديمية خان – Khan Academy" قرر انه يمول المشروع وقال عنه:

    ”صاحب أفضل تجربة تعليمية في عصرنا الحديث “، وأنه "المعلم الأفضل علي الإطلاق"

    بعدها انتشرت الفكرة أكتر وأكتر وبقى فيه منصات أخري للتعليم الإلكتروني الـ MOOC، وبعدها تم تأسيس منصة Udacity اللى أسسها البروفيسور السابق في جامعة ستانفورد “سبستيان ثيرن” واللى انبهر بتجربة خان أكاديمي بعد ما قابله في مؤتمر لـ TED عام 2011. والفكرة بدأت تكبر ومازلت لحد ما بقى عندها مئات من منصات ومواقع التعليم عبر الانترنت.

    2- الفرق بين كورسات اون لاين والكورسات التقليدية؟

    مميزات الكورسات الاون لاين كتيرة جدا منها: 


    • انت اللى بتختار المنصة أو الموقع اللى تتعلم عليه
    • المحاضر اللى يشرحلك ويعلمك
    • الوقت المناسب ليك للتعلم
    • المستوي اللى تبدأ منه
    • انت اللى بتصصم البيئة التعليمية بتاعتك
    كورسات اون لاين
    انفوجراف يوضح الفرق بين الكورسات الاونلاين و الكورسات التقليدية.
    زى ما شوفت فى الانفوجراف اللى فات، الفرق بين الكورسات الاونلاين و الكورسات التقليدية، دلوقتى انت قادر تتعلم اى مجال نفسك فيه مهما كان سنك او مجال دراستك، يعنى كل اللى عليك تحدد المجالات اللى هتتميز فيها وتبدا تتعلم من بيتك. 

    3- ازاى تاخد كورسات اون لاين وتعلم نفسك بنفسك؟

    اولاُ: حدد انت عايز تتعلم ايه! و ده عشان متوهش وسط زحمة الكورسات المتاحة اونلاين.
    شوف ايه المهارات اللى محتاج تكتسبها؟، ايه المجالات اللى محتاج تتعلمها؟، واكتبهم فى ورقة عشان توفر على نفسك نص الطريق.
    لو انت تايهه ومش عارف تحدد مجالك، انصحك تشوف الفيديو ده بتركيز جدا، بعدها هتقدر تحدد مجالك وتعرف ازاى تتميز فيه 


    بعد ما حددت اللى محتاج تتعلمه اونلاين، هتعمل الخطوة التانية وهى:

    تدخل على مواقع كورسات اون لاين مختلفة وتبدء تتعلم، لو انت مستواك فى الانجليزى ضعيف، تقدر تتعلم عن طريق مواقع كورسات اون لاين عربية:

    مواقع كورسات اون لاين عربية مجانية للتعلم الذاتى - إضغط هنا

    هتلاقى فى المقالة اللى فوق دى أفضل 10 مواقع عربية للكورسات الاونلاين اختار منهم موقع او اتنين وابدا اتعلم خطوة بخطوة.
    ومن مواقع الكورسات الاونلاين العربية اللي برشحها هم:
    1. موقع إدراك: فيديو شرح موقع ادراك وكيفية التعلم عليه
    2. موقع رواق
    3. موقع نفهم

    اما لو انت مستواك فى الانجليزى كويس يعنى متوسط أو فوق المتوسط يبقى أنت محظوظ لأنك هتتعلم من أفضل خبراء فى اى مجال فى العالم عن طريق مواقع كورسات اون لاين مجانية:

    وهنا
      - أفضل 7 مواقع اجنبية للكورسات الاونلاين - إضغط هنا 


    كورسات اون لاين

    اقرا المقالات بتركيز واختار المواقع اللى تناسب شخصيتك فى التعليم.

    أعتقد انك عرفت الاجابة و زى ما المقولة الجميلة دى بتقول:
    “If You Will Spend One Extra Hour Each Day Studying Your Chosen Field, You’ll Be a National Expert in That Field in Five Years or Less.”
    لو قعدت كل يوم ساعه تدرس او تقرا او تطور من نفسك فى المجال اللى انت اخترته بمزاجك بعيدا عن التنسيق او رغبه اهلك , بعد أقل من 5 سنين هتكون خبير فى المجال ده 
     خلى الصورة اللى تخيلتها دلوقتى دى ديما قدام عينيك وابدا واستعين بالله، وتأكد ان العلم الحقيقى هيغير حياتك وينورها

    تجربتى مع التعلم الذاتى والتعلم عبر الانترنت:


    الشهادت دى كلها وغيرها من الكتب والمقالات، لشخص كان بيكره التعليم والمحاضرات والمذاكرة، وطالع بتقدير مقبول من كلية الاداب. بس دخل تحدى مع نفسه وقال انا هثبت للكل ان الفكره فى علمك العملى ومهارتك مش شهادتك وتقديرك.

    لما عرف ان طلب العلم هو من أسباب وجودنا على الارض، لما عرف انه يقدر يتعلم اللى بيحبه ويبدع فيه مش مضطر يذاكر عشان التنسيق او الظروف اجبرته على كده ..

    وعلى فكره انت كمان مهما كنت بتكره التعليم دلوقتى، لو ربطت العلم بحاجه بتحبها والله مش هتبطل تذاكر طول عمرك وهتطور من نفسك كل يوم. انوى انت بس مع نفسك انك عايز تتعلم بجد، وادخل على عمو جوجل واساله ابدا ازاى، واقرا كل يوم حتى لو صفحه وحده بس، واتعلم اونلاين ومع الوقت هتقدر توصل لكل حاجه نفسك فيها وعقلك هينور بنور العلم

    وبالمناسبة الفكره مش فى عدد الشهادات ولا الكتب، الفكره كلها فى التطبيق "نور العلم يكتمل بالتطبيق"

    "أفضل خدمه تعملها لنفسك على الاطلاق، انك تكون Self Learner"

    الخاتمة:

    كده انت حددت مجالك، وبدأت تتعلمه اونلاين من بيتك وبقيت طالب علم، بتتعلم اللى بتحبه مش اللى اتفرض عليك من التنسيق او رغبة أهلك .. بتتعلم مجال حابب تذاكره لوحدك وحابب تتميز فيه، كده مش هيكون ناقصك الا اجتهادك وسعيك وصدقك مع نفسك فى طلب العلم وبس.

    مقالات مهم تقراها:

    1- هل شهادات الكورسات الاونلاين مفيدة ؟! اعرف من هنا 
    2- أهمية التعلم الذاتى وكيف يغير مستقبلك للأفضل ؟!
    3- خطوات التعلم الذاتى - كل ما تحتاجه

    لو واجهتك اى مشكلة فى رحلة التعلم الذاتى كلمنى وهساعدك.

    كتبها لكم: Ahmed Sysy
    Ahmed Sysy
    @مرسلة بواسطة
    مؤسس نادي القراءة العملية، ومتخصص فى صناعة المحتوى، وتحسين محركات البحث "SEO" أسعى لمساعدة مليون شاب لبداية رحلة التعلم الذاتي