‎ بوابتك للتعلم الذاتى

6 نصائح لتتميز فى الحياة الجامعية وتحصل على وظيفة في سوق العمل!

6 نصائح لتتميز فى الحياة الجامعية وتحصل على وظيفة في سوق العمل!
يحتوي هذا الموضوع على:
    اشتغل ايه وانا بدرس

    - عملنا بحث قبل ما نكتب المقال ده، كان موجه لشباب الجامعة، وسألناهم

     ايه أكبر المشاكل اللى بتواجهك فى الحياة الجامعية عشان تشتغل وانت طالب؟ 

    ازاي اشتغل وانا طالب

    - ودى كانت عينة من الاجابات:

    6 نصائح لتتميز فى الحياة الجامعية وتحصل على وظيفة في سوق العمل!
    الحياة الجامعية


    - تعالى الاول أحكيلك حكايتى مع الجامعة، دخلت كليه اداب انجليزى، وكنت مبسوط بقى وفاكر انى هتعلم انجليزى، وهتكلم زى الاجانب وهلاقى تعليم عملى. ولكن اتصدمت طبعا زى اى طالب فيكم دلوقتى دخل الجامعة بحماس كبير، واتصدم باسلوب الدراسة النظرى القديم الممل جدا المواد العقيمة اللى مش هتفيدنى خالص فى الحياة العملية ..

    وطبعا كان أقصى طموحى وقتها زى ما المجتمع واهلى غرسوا الفكره دى فى عقلى، فكرة انك لازم تجيب تقدير عشان تشتغل وتلاقى وظيفة كويسة، وان أهم حاجه هى الشهادة ومش مهم اى حاجه تانى!

    بس وقتها سالت نفسى سؤالين كانوا بمثابه نقطه تحول فى حياتى:

    1- اجيب تقدير ازاى فى اسلوب الدراسه ده؟
    2- لو هى بالتقدير ما فى ناس كتير صحابى اتخرجو بتقدير امتياز كمان ومش لاقيين وظيفة ولا شغل!!

    ومن هنا بدأت ادرك ان الشهادة والتقدير مش كل حاجة، وانهم مش مقياس لاى حاجه اصلا فى نظام التعليم ده

    ودخلت تحدى مع نفسى انى هثبت للمجتمع كله انها مش بالتقدير خالص، وان العالم اتغير، وان الفكره فيك انت كشخص وفى مهارتك وبس، ولما تخرجت كتبت البوست ده.
    كورسات لازم تاخدها
    - بعدها بقى دخلت تحدى مع نفسي، وكنت عارف انى هدفع تمن غالى جدا من سعى ومجهود، ومذاكره، وسفر وغيره، لانى وقتها أدركت انى ضيعت أهم سنين حياتى فى كلام نظرى وان ناقصنى مهارات كتير جدا وكورسات لازم اخدها، قبل ما أبدء الطريق عرفت ان من أهم المهارت المطلوبه فى الحياة العملية وسوق العمل هى "الانجليزى" وعرفت بردو ان جمب الانجليزى محتاج مجال عملى وأقرأ في أحسن  كتب واتعلم من أحسن  كورسات فى المجال ده،
    ولما هحقق النظريه دى "علم عملى تتقنه + انجليزى" هقدر اشتغل فى اى شركة.

    وفعلا وقتها بدأت رحله السعى فى الكورسات، وبدأت اعلم نفسى بنفسى، وعرفت كنز الكورسات الاونلاين والتعلم الذاتى - تقدر تعرفه من هنا.

    و انى أقدر اتعلم اى حاجه من بيتى من أكبر جامعات فى العالم، لو بس غيرت استخدامى للانترنت.

    وفضلت سنة كاملة بعد التخرج بسافر القاهرة أكتر من مره فى الاسبوع عشان أحضر ايفنتات واخد كورسات، وكان الكل وقتها بيتريق عليا وكنت بسمع كلام زى "هو انت فاكر ان اللى بتعمله ده هيفيدك!" "يا ابنى روح شوف اى شغل وخلاص" وكلام كتير اوى سلبى زى ده، بس وقتها انا كان كل تركيزى على حلمى وبس، وان الطريق طويل ولما اتقن الانجليزى واتعلم مجالى اللي بحبه كويس، كل اللى بيتريق ده هيسكت وهيفهم

    وبالفعل بعد سنه بالظبط، الانجليزى بقى تمام، ووصلت لمرحلة انى أقدر أقرا اى كتاب بالانجليزى، اتعلم اى كورس اونلاين بالانجليزى، افهم اى فيلم واتعرف على ثقافتك كتير جدا بسبب اللغة، اه موصلتش لمرحله ال Native بس هسعى ليها باذن الله.

    بعد ما ظبطت الانجليزى، وقرأت كتب كتير فى أكتر من مجال، أسست " نادي القراءة العملية " بعد كده قلت لازم اجرب مجال عملى تانى، وسمعت عن مجال "الديجيتال ماركتينج" وشوفت اد ايه المجال ده بقى مسيطر وان اللى هيتعلمه هيضمن مستقبل كويس، بدأت أطبق السر، وعملت معادله وخلطة سحريه لو اى طالب جامعى طبقها هيقدر يشتغل وهى
     " علم عملى تكون شغوف بيه + انجليزى فوق المتوسط + قراءة عملية + كورسات اونلاين من افضل المصادر "

    بدأت اقرا واتعلم فى المجال ده لوحدى من البيت، بعدها بفترة، بقى عندى البيزنس الخاص بتاعى "أونلاين واوفلاين" + اشتغلت فى شركه من اكبر الشركات فى المجال ده فى الشرق الأوسط.

    كل ده بفضل الله ثم السعى والتطبيق والقراءة والعلم العملى. واتحولت لشخص كل يوم بيتعلم ويقرأ وبيطور من نفسه، وصحابى اللى كانو اتخرجوا بامتياز مازلوا بيعانو من عدم وجود شغل، وبيشتكوا من البلد وظروفها،، إلخ

    أظن ده مثال عملى حى كفاية، ان الفكره فيك انت مش ف الشهادة خالص، أصحاب الشركات دلوقتى بيدورا على الشخص العملى اللى بيعرف يعلم نفسه بنفسه، ويقدر يشتغل فى فريق، وتحت ضغط ويقدر يبقى مبدع، ويفيد الشركه مش مجرد موظف.

    اكيد عندك سؤال دلوقتى، انك كطالب جامعى المفروض تعمل ايه وتبدأ ازاى؟

    1- الانجليزى:

     حاول ما تتخرجش من الجامعة إلا وأنت الانجليزى بتاعك فوق المتوسط على الاقل. طب تذاكر لوحدك ازاى لو مش معاك فلوس للكورسات... قدامك أكتر من مصدر:

    المصدر الأول هو كورس power English
    تقدر تشوف شرح للكورس من هنا


    المصدر التاني لتعلم اللغة الانجليزية هو خطط مايكل يوسف:

    2- لازم تبدأ تعلم نفسك بنفسك وتتعلم لوحدك "التعلم الذاتي"

    لو مش عارف تبدأ ازاى، شوف المقالة دى:  رحلتى وتجربتى مع التعلم الذاتى وازاى انت كمان تتعلم اللى نفسك فيه

    التعلم الذاتى ده كنز حرفيا والله، محتاج بس ورقه وقلم، وصدق مع الله ثم مع نفسك، وتتعلم المجال اللى نفسك فيه مهما كان ايه هو ابعد شويه عن انك مجبر تتعلم حاجات ما بتحبهاش، الكورسات الاونلاين اتاحت الفرصة لكل الناس تتعلم اى مجال يختاروه.

    يعنى لو دخلت كلية مابتحبهاش، او بتتعلم حاجات مش بتحبها ونفسك تتعلم اللى نفسك فيه، او حتى لو كنت كرهت التعليم وبقيت مش عايز تتعلم اى حاجة، فى المقالة دى هخليك تشوف التعليم بشكل مختلف تماما ..

    3- التطوع:

    حاول تطوع وأنت فى الجامعة فى اى نشاط طلابى أو جمعية خيرية، واشتغل كتييير وطبق كل حاجة هتتعلمها فى مجالك ده فى التطوع.
    التطوع هيعلمك دروس ومهارات مش هتتعلمها فى المحاضرات، وهيزود خبرتك جدا لان من الشماعات بردو اللى الناس بتقولها " انا مش هعرف اشتغل عشان الشغل بيطلب خبرة وواسطة" أحب أعرفك حاجه "المهارات وتطويرك من نفسك أهم مليون مره من الخبرة" فا ركز اوى على انك تكون شخص عملى وطور من نفسك، وسيب موضوع الخبرة هيجى من التطوع.

    4- اتعلم ازاى تستخدم الأدوات المتاحة صح: 

    واول حاجة تبدأ ثورة عليها هى صفحه الفيس بوك بتاعتك، ودى هيكون ليها مقالة لوحدها خالص قريبا باذن الله المقاله نزلت وتقدر تقراها من هنا، اتعلم تغيير استخدامك للنت، بدل ماهو فيس وواتس وشات وبس، ابدا اقرا مقالات، تابع ناس ناجحة، اشترك فى مواقع مفيدة، شوف أفلام وثائقية على اليوتيوب

    5- اقرأ أهم 5 كتب وأهم 5 كورسات فى مجالك:

    واقرا ولخص واشرح وشارك العلم مع صحابك، واستعين بعمو "جوجل" خلى الجمله دى معاك

     " Make Google your best friend "
    عمو جوجل هتلاقى عنده اجابات لكل الاسئله اللى محيراك


    6- نقطة أخيره بالنسبة للشهادات

    ما هى الا ورقة اتعملت عشان تبلها وتشرب ميتها! ابوس ايدك غير نظرتك فى انك بتروح الجامعه عشان الغياب والشهاده وبص للاستفادة والمعرفة اللى هتحصل عليها اكتر من الشهاده. من الاخر انت شهاده نفسك. زود جدا جدا شبكه علاقاتك جدا لانها هتفيدك جدا فى المستقبل . وهنا رائي كامل فى موضوع شهادات الكورسات اونلاين مفيدة ولا لا ؟ اضغط هنا

    وده فيديو هيفيدك في شبكة العلاقات اضغط هنا لمشاهدة الفيديو
    طبعا مقالة وحدة مش هينفع نتكلم فيها عن كل حاجه تخص الموضوع المهم ده. بس تابعوا المقالات الفترة الجاية لاننا هنشارك معاكم خطوات عمليه تساعدكم فى حياتكم، وهنتكلم عن المهارات الاساسية اللى كل واحد فينا محتاجها فى حياته

    النصيحة الأولى والأخيرة بقى:

    " ركز مع نفسك وتطويرك منها، افهم دينك صح جدا، اتعلم كل يوم حاجة جديدة، اقرا بشكل عملى، اتعلم لغة، اتعلم اونلاين، اقرا ثم اقرا ثم اقرا ثم طبق اللى بتتعلمه كل يوم؛ لأن نور العلم يكتمل بالتطبيق"

    احفظ المعادلة دى وانشرها مع صحابك وعيش بيها
    " علم عملى تكون شغوف بيه + انجليزى فوق المتوسط + قراءة عملية + كورسات اونلاين من أفضل المصادر " 
    تقدر تشتغل وتحط شروطك فى اى مكان


    ياريت لو تكتبلنا ايه بالظبط اللى واقف قدامك فى كومنت هنا تحت المقاله وهنساعدك باذن الله .
    بواسطه : Ahmed Sysy
    Ahmed Sysy
    @مرسلة بواسطة
    مؤسس نادي القراءة العملية، ومتخصص فى صناعة المحتوى، وتحسين محركات البحث "SEO" أسعى لمساعدة مليون شاب لبداية رحلة التعلم الذاتي