6 خطوات عمليه تساعدك تكون محاضر مؤثر فى مجالك - نادي القراءة العملية
404
نعتذر , لا نستطيع ايجاد الصفحة المطلوبة

الاثنين، 9 أكتوبر 2017

6 خطوات عمليه تساعدك تكون محاضر مؤثر فى مجالك

6 خطوات عمليه تساعدك تكون محاضر مؤثر فى مجالك

ناس كتير اوى عندها موهبة و شغف انها تتكلم قدام الناس وتاثر فيهم , و نفسهم يبداو يحولو الشغف و المهاره دى لمصدر دخل ليهم بس مش عارفين يبداو ازاى !

قى المقالة دى هنتكلم عن خطوات عملية تساعدك تكون محاضر وتؤثر فى الناس . 

تعالى الاول احكيلك تجربتى مع الموضوع ده ..

انا من صغرى كان بيخطفنى اى حد الاقيه بيتكلم قدام الناس وبياثر فيهم , وناس كتير كانت بتقولى انت عندك ” الموهبه ” فانك تقدر تحفز وتاثر فى الناس , بس وقتها مكنتش عارف هبدا ازاى ؟

و لما كنت اسال اى حد يقولى اقرا كتب فى الموضوع ده و مهارات العرض والتقديم وغيره , بس كنت بلاقى الكلام حلو بس نظرى و انا عايز اتكلم من قلبى , وكنت مؤمن جدا ان اقرب طريق عشان تؤثر فى الناس وتسيب بصمه هو انك تتكلم من قلبك توصل لقلبهم.

و كنت تايهه زى ناس كتير دلوقتى , بتحب تتكلم قدام الناس بس شايفه الموضوع محتاج كورسات و كتب كتير و هما مش معاهم فلوس او يقولو مين هيسمعنى انا بس , اكيد مش هقول حاجه تفيد الناس , و افكار كتير زى دى هتطلع فى الاخر مجرد اوهام هتختفى اول ما تبدا فى تنفيذ الخطوات اللى هقولهالكم فى المقال ده .

لحد ما عرفت سر المهنه زى ما بيقولو وبدات فى التطبيق على طول والحمدلله حاليا بقيت بمارس شغفى ده بكل حريه وبيجيلى منه دخل كمان وربنا جعلنى سبب فى انى اسيب اثر واضيف قيمة لحياة الناس.

ودى صور ليا و انا بتكلم فى ايفنتات قدام اى عدد من الاشخاص ..

خطوات عمليه تساعدك تكون محاضر وتؤثر فى الناس

خطوات عمليه تساعدك تكون محاضر وتؤثر فى الناس


هنتعلم فى المقال ده ازاى تبدا , و هنوفر عليكم كتب نظرى كتير وهديكم الزتونة

نركز بقى فى الخطوات اللى هوضحها دلوقتى و بعد المقال نبدا نطبق على طول لان ” نور العلم يكتمل بالتطبيق

1/ فكر ايه اكتر مجال حابب تسيب فى بصمه او رسالة , او تحل فيه مشكله معينه .

حدد رسالتك بالظبط و شوف هى بتحل مشكله اية عند الناس او هتساعدهم يحققو اية و ابدا جهز محاضرة صغيرة كدة و اعرضها لاقرب الناس ليك سواء اهلك او صحابك و شوف تعليقاتهم اية .مش لازم يعنى تبدا كبير , ابدا باللى حواليك وخليك شغوف وانت بتتكلم عن الموضوع ده واتكلم من قلبك توصل لقلوب الناس .

بس قبل ما نروح لباقى الخطوات , هسالك سؤال ! هل هتقدر تساعد الناس وتقدم محتوى فى مجال بتحبة من غير ما تتعلمة الاول ؟!
يبقى اول خطوة هنا هى التعلم , تعلم مجالك بكل الاشكال المتاحة اونلاين , سؤاء فيديوهات , كورسات , مقالات وغيرهم كتيير.

اتعلم الاول وطبق عشان تقدر فعلا تحل مشكلة ويكون عندك قيمة تقدمها للناس مش مجرد واحد حافظ كلمتين وخلاص . ولو مش عارف مشاكل الناس , بص لنفسك دلوقتى وشوف اكتر مشكلة معطلاك فى حياتك و دور لها على حل ولما تحلها , احب اقولك انك محظوظ جدا لانك هتلاقى ناس كتير اوى بتعانى من نفس مشكلتك ومستعدين يعملو اى حاجه عشان يلاقو حل ليها
" انت مشكلتك الوحيدة وانت حلك الوحيد " 

2/ ابنى مصداقية بين الناس !

دلوقتى انت لسه محدش يعرفك , ولا حد عارف انت بتقدم ايه , بكل بساطه ابدا اعمل براند لنفسك , عرف الناس رسالتك و خليهم يجو يسمعوك , اعمل فيديوهات واعرض عليها رسالتك , ولما الناس هتسمعك سواء عن طريق الفيديو او فى محاضرة و تاثر فيهم , ساعتها بس هتبدا تتعرف فى المجال ده و بقى معاك شهادات من الناس دى انك شخص عندك رسالة او بتحل مشكله معينة ولما تلمس قلوبهم كده انت بنيت مصداقية وبعد فترة هتلاقى ناس او منظمات بتكلمك عشان تنشر رسالتك عندهم . 

المصداقية زى الثقة , بتتبنى بالتعب و الجهد والمجهود و الصدق . هتتعب كتير فى الاول , بس لو انت صادق بجد هتستحمل وتتعلم وتغلط وتجرب وتقوم وتقع وهكذا . اهم حاجه تكون محدد انت بتعمل اللى بتعملة ده ليه , لو مش عارف ارشحلك بقوة تقرا المقالة دى  Start with Why 

 3/ اعمل مدونة و اكتب مقالات اواعمل قناة على اليوتيوب . ( حسب الانسب لشخصيتك ) 

عرف الناس ازاى تحل مشاكلها اللى انت متخصص فى حلها دى عن طريق مقالات بافكارك الجديدة وحاول تقدم حلول عملية واقعية عشان الناس اللى تقرالك تحس انك بتقدم حاجه جديده فعلا . اوعى تقع فى فخ انا مش عندى حاجه اقدملها للناس او انا مش خبير ولسه مبتدا , بكل بساطه ما دام بتعرف تحل للناس مشاكلهم يبقى انت خبير بالنسبالهم . بس ده هيجى لما انت تتعلم الاول !
انك تعمل قناة على اليوتيوب محتاج تتعلم وتطبق وتصبر وهتلاقى الموضوع ممتع جدا بس انت روح على عمو جوجل واكتب ازاى اعمل قناة على اليوتيوب , بس لازم تقرا المقالة دى الاول عشان تبدا صح .
لية لازم يبقى عندك قناة على اليوتيوب ؟

ولو انت من النوع اللى بيحب يكتب , اتعلم ازاى تعمل مدونة وهتلاقى الموضوع سهل مش صعب ومجانى كمان , لو مش عارف ازاى اكتب على جوجل ازاى اعمل مدونة مجانية محترفة واتعلم وطبق وانشر رسالتك بالشكل اللى يناسبك ومتقلدش حد .

4\ كون شبكه علاقات قويه جدا .

دى من اكتر الخطوات اللى هتساعدك انك توصل للناس بسرعه , اخر قانون فى شبكه العلاقات بيقول ” مش مهم انت بتعمل ايه المهم مين يعرفك ومبسوط انه يعرفك ” لان لو معندكش شبكة علاقات قوية و مؤثرة هتلاقى الطريق طويل ومحدش هيسمع عنك , فاسعى من دلوقتى انك تدور على شبكه علاقات و تبينها قبل ما تحتاجها ” Give first. Build it, before you need it. ”

ممكن تكونها , عن طريق انك تشوف جروبات على الفيس بوك مهتمة بنفس مجالك وتنشر رسالتك , تنزل ايفنتات ومؤتمرات , ساعدهم ونور حياتهم و اوعى تعرف حد عشان مصلحتك , ديما زى ما قلت فوق Give first. و دور على ناس مؤثرين فى مجالك و عرفهم رسالتك , خليهم يشوفو بدايتهم فيك , وهتلاقى كتير يساعدك ويسرع نجاحك . 

5\ متبقاش طماع !

بمعنى انك لسة مبتدا , اعمل محاضرات كتير فى الاول مجانا, قدم للناس حلول عملية بالعلم اللى عندك , غيرلهم حياتهم من غير اى مقابل , وهتكون بالنسبالهم قدوة وهيتمنو يخدموك بعد كده لانك غيرتلهم حياتهم او حليت ليهم مشكلة كانو بيعانو منها.
 بعد ما تعمل كده خش على الخطوه اللى بعدها اعمل محاضرات بس بفلوس قليلة متبصش للفلوس دلوقتى خالص وبص ديما انك تضيف قيمة للناس والفلوس هتيجى كتير بعد كده , اطمن .

عندنا فى نادى القراءة العملية بنقدم المحتوى كلة تقريبا مجانا من خلال الموقع وقناتنا على اليوتيوب وصفحتنا على الفيس بوك لاننا مؤمنين برسالتنا جدا وعايزين نوصلها لاكبر عدد من الشباب .. اعرف رسالتنا من هنا 

6\ خليك نفسك واتكلم من قلبك

بمعنى انك لو انت شخص بتهزر , هزر عادى , لو انت شخص بتوصل المعلومه بشكل بسيط كمل زى ما انت , اوعى تقلد حد , و لازم تعرف نقطه مهمه جدا , انك عشان تكون محاضر في مليون طريقه مش طريقه وحده بس او اسلوب واحد بس , خليك باسلوبك وخليك على طبيعتك واتكلم من قلبك , مهاره التحدث قدام الناس مش بتكتسب من الكتب , الكتب مجرد اداة , دى مهاره عملية محتاجة ممارسة كتير وتطوير مستمر , ومش محتاجة شهادات , خلى اعتمادك من الناس وشهادتك هى الاثر اللى هتسيبة فى الناس وبس .

الخلاصة :
كل واحد فينا عندة ميزة لو طور منها واتعلم وطبق هتكون هى سبب سعادتة فى الدنيا وهعيش مرتاح " كل ميسر لما خلق لة "
بس اهم حاجه لازم تتعلم الاول , وتمارس كتيييير جدا جدا , المهارة لوحدها لا تكفى , الشغف لوحدة لا يكقى , لازم تجتهد وتتعلم وتصبر وتسعى وربنا هيفتح عليك فرص عمرك ما كنت تحلم بيها .


مواضيع ذات صلة 

هل اقدر احول مهارتى و موهبتى لمصدر دخل ليا ؟
ازاى اعرف شغفى ؟!
اعمل ايه بعد ما عرفت شغفى و ازاى اتميز فيه

لو عندك اى سؤال ده الاكونت بتاعى :  Ahmed Sysy


شارك المقال

جميع الحقوق محفوظة لـ نادي القراءة العملية | تصميم :