نادي القراءة العملية نادي القراءة العملية

بتدور على شغفك ؟ جاوب الاسئله دى .Discover Your Passion

نادى القراءه العمليه

شباب كتير بتسئل " ازاى اعرف شغفى ؟ " ازاى الاقى شغفى " 


تايهه ومش عارف ابدا ازاى ولا عارف شغفى "

" يعنى ايه شغف او Passion  "


وغيرها من الاسئله المتعلقه بالشغف وتعريفه وازاى نعيش بيه ونشتغل فى مجال بنحبه مش مفروض علينا ونبدع فى المجال ده ..

والحقيقه كلمه " الشغف " بقت متنشره جدا الايام دى وكل الناس بتتكلم عن اهميتها , وده مش من فراغ لانك لو بحثت عن كل قصه نجاح او اى شخص ناجح اثر فى العالم هتلاقيه بيقولك ديما " حياتى اتغيرت لما بدات اعمل اللى بحبه واعيش بشغف "
وبتكون ديما النصيحه منهم " انك لازم تعرف انت بتحب ايه وتتعلمه وتعيش عشانه وهتلاقى حياتك كلها اتغيرت وبقيت مبسوط "

قبل ما تبدا رحلتك فى انك تعرف شغفك , لازم الاول تعرف نفسك ( مميزاتك - مهاراتك - نقاط القوه - نقاط ضغفك .. )
طب الخطوه دى تعرفها ازاى ؟ عملنا كورس مجانا هيساعدك تعرف نفسك تقدر تشوفه من هنا 

بعد ما تعرف نفسك , هتكون عملت اول واهم خطوه فى حياتك وبعدها تقدر بكل سهوله تعرف شغفك , وفى اكتر من طريقه تقدر تعرف بيها شغفك هنشارك معاكم فى المقاله دى طريقه منهم وهتكون عن طريقه اسئله مرتبطه بقلبك لان الشغف مكانه القلب
و رغم سهوله الاسئله الا انها هتكون صعبه جدا على اغبلكم و ده يرجع لاسباب كتير و عشان كده عملنالكم مقاله فيها خطوات عمليه تساعدكم تجاوبو على الاسئله لو كانت صعبه بالنسبالكم و دى المقاله : خطوات عمليه تساعدك تصحى قلبك وتعرف شغفك

قبل ما نبدا فى الاسئلة هنتفق على كام خطوه و ادوات تجهزها عشان تستفيد من المقالة :
  • طلع ورقة وقلم وخليهم جمبك
  • دور على مكان هادئ ومفيش اى مشتتات واقفل موبايلك
  • اكتب اجابة كل سؤال لوحدها واكتب اول اجابة تيجى فى بالك من غير تعديل 
  • خليك صادق مع نفسك محدش هيشوف الاجابات وهيراجع اجاباتك
  • استمتع جدا بكل سؤال وكل اجابة وابتسم وانت بتكتبها 

ندخل بقى فى الاسئله بس قبل ما نبدا خلينا نتفق انك مش مطالب تجاوب على كل الاسئله , ممكن اجابه سؤال واحد بس تلمس قلبك و تخلى عينك تلمع وتكون هى دى نطقه انطلاقه انك تعيش حياه مبسوط فيها وتكتشف الكنز اللى ربنا سبحانه وتعالى خلقه جواك ..

نبدا فى الاسئله :

1/ لو قدامك فرصه انك تتعلم حاجه وحده بس انت اللى تختارها هتكون ايه ؟


نوضح السؤال اكتر , يعنى ايه اكتر مجال نفسك تتدرسه او تتعلمه , بعيدا بقى عن التنسيق او الكليه , ممكن تفتكر وانت فى ثانوى ايه اكتر ماده او مجال كنت بتحب تذاكره , لما بتروح مكتبه ايه اكتر مجال بتكون فضولى انك تقرا فيه ؟

2/ ايه الموضوع اللى لما بيتفح مع صحابك بتحب تتكلم فيه ؟


بمعنى لما بتكون فى قاعده وتيجى سيره موضوع معين انت عينك بتلمع او بيكون عندك فيه معلومات وبتكون نفسك تفضل تتكلم فيه معاهم وتنصح وتجاوب على اسئلتهم فى المجال ده وبتكون مبسوط جدا لما بتتكلمو فى الموضوع ده ,, بعيدا طبعا عن النميمه على اصحابنا و المدرسين والدكاتره

3/ ايه اكتر حاجه كنت بتحب تعملها وانت صغير ؟


فتره الطفوله هى اهم فتره فى حياتنا لاننا كنا عايشين بنعمل اللى بنحبه , ومش بنفكر فى كلام الناس او غيره , فحاول تفتكر كده ايه اكتر حاجه كانت بتخليك مبسوط وانت صغير او كنت مميز فيها جدا وانت صغير , اسال بابا و ماما واخواتك او قرايبك لو انت مش فاكر , وبعد كده اكتبهم كطلهم فى ورقه وابدا شوف ايه من الحاجات دى اقدر استفيد بيه فى حياتى حاليا !

4/ ايه الحاجه اللى الناس بتقولك انك شاطر فيها وبتعملها بابداع او جوده عاليه ؟


احيانا كل واحد فينا بيكون شاطر فى مجال معين بس بيكون فاكر انها حاجه عاديه وممكن كل الناس تعملها , عشان كده انت لازم تخلى ودنك مع الناس وتسالهم ايه احسن مجال انا مميز فيه , ايه احسن مهاره عندى اقدر استغلها فى حياتى وهكذا , هتتصدم انك فيك مميزات كتير مكنش واخد بالك منها او فاكرها عاديه , بس حاول تسال الناس المقربين منك وهيكونو صادقين معاك فى اجابتهم .

5/ ايه الحاجه او الخدمه اللى لما بتقدمها بتكون مبسوط ؟


ممكن يكون " تطوع - تصميم - رسم - تسويق - كتابه - وغيرهم "
المهم حاجه انت بتعملها لمجرد المتعه سؤاء كانت بمقابل مادى او لا , نقول تانى بتعملها لمجرد انك بتكون مبسوط ومستمتع بيها .

6/ مين مثلك الاعلى ؟


وهنا ممكن يكون اكتر من شخص فى اكتر من مجال , مثلا مثلى الاعلى فى الدين فلان , مثلى الاعلى فى الشغل فلان , مثلى الاعلى فى الحياه عمتا فلان وهكذا . بس هناخد بالنا من حاجه احنا مش عايزين شخصيته , السؤال هنا , " هو ليه بيلهمك ؟ " " ايه الخدمات او النجاح اللى حققه وانت نفسك تتحققه ؟ " ايه القيمه اللى بيقدمه للناس او المشاكل اللى بيحلها سؤاء مهنيا او شخصيا "

7/ ايه البصمه اللى نفسك تسيبها فى مجالك ؟ ايه المشكله اللى نفسك تحلها فى مجال معين والناس بتعانى منها ؟

كل واحد فينا عنده مشكلة او اكتر فى جوانب كتير، كل مجال في الدنيا محتاج ناس تسيب في بصمة او تقدم فيه حل جديد لمشكلة ظهرت الناس بتعانى منها، دورك بقى انك تدور على بصمة تسيبها او مشكلة معينة تلاقى ليها حل..

مثلا لو شغوف بمجال الفيتنس واللياقة وخلافه وكنت بتعانى ان جسمك تخين ونفسك تخس ويبقى وزنك مثالى وبعد فترة من القراءة والتطبيق بدات تعرف ازاى تحل المشكلة دى وبقى جسمك مثالى وبقى عندم قدر كافى من المعلومات تقدر تساعد بيها غيرك، تفتكر تقدر تحل المشكلة دى لكام شخص موجود حاليا؟! ده فى حد ذاته دافع كبير جدا ليك عشان تكمل..

8/ ايه الحاجة اللى لما بتعملها بتنسى الوقت وبتنسى نفسك وانت بتعملها ؟

و دى من أهم العلامات لمعرفة شغفك، واحد بينسى نفسة لما يكون معاه ريشة وبيرسم، حد تانى بينسى نفسه لما يكون معاه ورقة وقلم ويكتب، حد تانى بينسى الوقت لما يكون معاه الكاميرا بتاعته ويصورـ حد تانى بينسى الوقت والتعب لما يقرا فى مجال معين او لما يكتب اكواد فى مجال البرمجة ,, وهكذا..

ايه بقى المجال او الحاجة اللى بتنسى بيها الوقت والتعب؟ لو مش عندك ابدا جرب مجالات وانشطة جديدة..

لأن التجربة هى خير دليل..


9/ لو قدامك تختار علم واحد تعلمه لغيرك هيكون ايه وفى مجال ايه ؟


عشان تتعلم اى حاجة بسرعة، علمها لغيرك !
يا ترى ايه هو المجال اللى نفسك تعلمه للناس اللى حواليك؟
المجال اللى نفسك كل الناس يكون عندها وعى بيه؟

10/ ايه التحديات اللى واجهتك طول حياتك و ازاى اتغلبت عليها و اتعلمت منها ايه ؟

واحد مثلا كان عنده تحدى مع الكسل والمماطلة فا بدا يقرا ويبحث لحل عن المشكلة ويطبق لحد ما اتغلب عليها
يا ترى ممكن يتعلم ايه من التحدى ده؟
يتعلم انه شخص عنيد وبيقدر يحل المشاكل اللى بتواجهه ويبحث ويدور لوحده وهكذا..

11/ لو معاك فلوس كتيييير جدا هتعمل بيهم ايه ؟


عشان دى من اكبر الشماعات اللى بتوقف الناس عن حلمهم , " الفلوس " طب تخيل معايا مصباح علاء الدين وبيقولك معاك كل فلوس العالم , هتعمل بيهم ايه بقى ؟ هتفتح مشروع فى مجال معين مثلا ؟ ولا هتستخدمهم ازاى ؟

وبما اننا بنتخيل بقى , فتخيل انك على فراش الموت , وقدامك 6 شهور بس فى الدنيا , ايه الحاجه اللى هتعملها فى الوقت ده , غير انك هتصالح بابا وماما وتزور قرايبك وتصلى , سيب الجانب الروحى دلوقتى , ايه الحاجه اللى هتندم انك معملتهاش لو انت فعلا على فراش الموت دلوقتى؟ وخلينا اقولك ان ده مش تخيل ولا حاجه لانك حرفيا مش ضامن تعيش ثانيه كمان , فعيش حياتك وانت بتعمل اللى بتحبه لان مفيش وقت تضيعه .

كفايه كده عليكم اسئله  وهنتسنى طباعكم بعد ما شوفتوه الاسئله دى , هل لقيت اجابه بسهوله ؟ هل حاسس بلغبطه وانك مصدوم ؟ قولنا اول انطباع حصلك بعد ما شوفت الاسئله , اكتب انطباعك فى تعليق تحت المقاله ..

لو عندك اى سؤال او لغبطه ممكن تكلمنى على الاكونت الشخصى من هنا : Ahmed Sysy

مواضيع ذات صله :

 اختصر طريقك واتميز فى مجالك لو طبقت السر ده

خطوات عمليه لمعرفه شغفك

التعليقات



جميع الحقوق محفوظة

نادي القراءة العملية

2016