خلينا نتفق ان مفيش اى سبب دلوقتى فى العالم يخليك متبدأش تطور من نفسك وتبقى حد شاطر فى مجالك. 

وفى بدل الطريقة مليون انك تعرض مهاراتك فى سوق العمل بشكل احترافى ومجانى تماما زى مثلا "

• تعمل قناة على اليوتيوب (احجز فى كورس اليوتيوب الشامل من هنا)
• تعمل مدونة لنفسك تكتب فيها مقالات (اعمل مدونة مجانا من هنا)
• تسجل حلقات صوتية ليك وتنزلها ..  

وغيرهم من الطرق المبدعة والفعالة وكلهم محتاجين منك مجهود فقط.

كل اللى ناقصك بس انك تبدأ.. 

3 خطوات عشان تعرض مهاراتك والمحتوى اللى عندك وتحول شغفك لمصدر دخل 

1.  " The What " هتتكلم عن ايه ؟ فى مجال ايه ؟
2. " The How " هتتكلم عن ازاى ؟
3. " The Where " هتعرضه فين ؟

هنقسمهم خطوه خطوة وهتعرف ازاى تطبقهم بعد ما تخلص المقالة وتعمل براند لنفسك محترف

1-"The What": هتتكلم عن ايه؟ 

عايز الناس تعرفك فى مجال ايه؟ عايز تبقى مشهور وليك بصمة فى مجال اية؟ 

بص لنفسك فى المراية دلوقتى واسأل نفسك "يا ترى انا عايز اتعلم ايه مدى الحياه وابقى شاطر فيه ؟"

ومتخفش او متقولش انا محدش هيعرفنى وغيرهم من المعتقدات السلبية اللى بتوقفك، عشان كل الناس الناجحة اللى شايفهم بدأوا من نفس النقطة بتاعتك دلوقتي..

وطريقة التفكير دى تعتبر جنون، أنت هتعيش حياة وحده بس، طب ليه تعيشها خايف؟ اعمل اللى بتحبه وسيب بصمة واثر.. 

لازم تعرف ان مفيش حد بدأ كبير، وكل الخبراء او الناس الناجحة اللى بتشوفها كل يوم فى يوم من الايام كانو زيك. بس هما عملوا اللى انت مكسل او خايف تعملوا! هما توكلوا على الله واجتهدوا، واشتغلوا على افكارهم لحد ما اتحولت حقيقة، مفيش حد فيهم بدأ وعنده رؤيه كبيره لبكره، بس مع السعى والاجتهاد طرق كتير بتتفتحلك.. مفيش حد كان يصدق ان الفيس بوك هيوصل للنجاح ده.. ولا حد كان يصدق ان الانسان ممكن يطير من مكان لمكان بالطيارة ..

  ( The key is just, Start )

وأول شماعة بسمعها كتييير "أنا مش معايا فلوس ابدء" بس خلينى اقول ان فى العصر اللى احنا فيه انت مش محتاج ثروة عشان تبدأ سواء عايز تكون فنان مشهور، رسام، مغنى، رجل أعمال، تعمل بيزنس اونلاين، وغيرهم من الاحلام، مش محتاجين غير جهاز كمبيوتر او سمارت فون و وصله نت، لو معاك الاتنين دول يبقى كل حاجه ممكنة بالنسبالك..

الخطوة العملية الاولى: ابدأ برسالتك وحددها

عايز تعمل ايه ؟ و ليه عايز تعمله؟ ايه رسالتك اللى عايز توصلها من خلاله؟
ايه الحاجة اللى بتحبها؟ اعرف انت فين دلوقتى وعايز تبقى فين فى المستقبل!
ممكن تعمل ده فى فيديو او فى صوره او مقالة

مثال رسالة نادى القراءه العملية 

 نادى القراءة بيحاول يبنى مجتمع فيه الغالبية العظمى من الطلاب بتصحى كل يوم الصبح متحمسة انها تطور من نفسها تبقى مبسوطة وهى بتتعلم المجال اللى بتحبه بعيدا عن التنسيق او رغبة الأهل، وفى اخر اليوم يكونو راضيين بمدى التقدم والانجاز اللى حققوه خلال اليوم. 

و الطريقة اللى معتمدين عليها لتحقيق الحلم ده، هى التعلم الذاتي واننا نخلى الطلبة تبص للتعلم بنظرة مختلفة تخليهم يحبوا التعليم من تانى، وبنعتمد على الكورسات الاونلاين والقراءة العملية و التطبيق عن طريق المنهج العملى الخاص بينا.

بالمناسبة شغفك وحماسك كل فتره ممكن يتيغر عادى، يعنى أنت ممكن النهارده تكون بتحب التسويق، بكره تحب التمصيم، وهكذا، كل ده طبيعى مش مشكلة، المهم أيا كان المجال اللى هتختاره اتعلمه صح واجتهد فيه وسيب فيه بصمة.

وده فيديو هيساعدك تتعلم من افضل الناس فى العالم فى مجالك

بس انت عارف المشكلة فين؟
المشكلة فيك أنت! عشان انا وغيرى بنكتب محتوى كتييير وانت تعجب بالكلام ويبقى عندك طاقة كبيرة، وفى الاخر مش بتعمل حاجة! ودى أهم حاجه فى الموضوع كله، وأهم وأول خطوة ناقصة عندك وهى " الفعل " " Action " 

فى مقولة بحبها جدا 

" If you want it, your actions have to match your ambitions."

يعنى ميبقاش عندك كورس الساعه 7 الصبح وانت تنام 5 الصبح . متبقاش عايز تخس وعمال تاكل 24 ساعه. متبقاش عايز تتعلم انجليزى ومش بتمارسه اصلا. متبقاش عايز تطور من نفسك وقاعد على الفيس وبتضيع وقتك كله فى كلام فاضى!

كده أنت مش صادق مع نفسك للاسف! وعايز النجاح كصوره وخيال وكلام بس من غير سعى ولا أفعال عمرك ما هتوصل لحاجة.

انا مش بقولك كده عشان تدايق او تزعل منى، انا بقولك كده عشان انا كل يوم بشوف شباب كتير بتقول انا عايز اعمل واعمل وفى الاخر تبص على افعالهم تلاقيهم مش بيسعو اصلا، لازم تعرف ان كل حاجه ليها تمن ومفيش نجاح من غير تعب.

واحسن طريقة انك تبدأ هى انك تبدأ وتسعى، تبطل كلام وتبدأ فى الفعل والسعى والاجتهاد.

2/  " The How " 

هتوصل رسالتك دى ازاى ؟

بعد ما عرفت شغفك ورسالتك وبدات تسعى وتتعلم وتقرا وتخلص , كده انت بقى عندك معلومات ومحتوى مفيد بيحل مشاكل فى المجال اللى انت اخترتة . دلوقتى جه دور توصل المحتوى ده لمتابعين المجال ده , بس ازاى ؟

فى 3 طرق بس تقدر تعمل بيهم المحتوى بتاعك " كتابة - فيديو - صوت " وكل وحده من دول ليها طرق كتييير واغلبها مجانية

يعنى لو انت من النوع اللى بيبدع لما بيكتب , دلوقتى حالا روح على عمو جوجل واساله " ازاى اعمل مدونة " هتلاقى منصات كتير مجانية زى " Blogger - WordPress - Meduim " وغيرهم كتير . اول انك تعمل صفحة على الفيس بوك وتبدا تنشر رسالتك عليها واللى بتتعلمة وتنشر علم . بس الاول طبق اللى فى المقالة دى 3 خطوات تساعدك تغير حياتك من الفيس بوك

ولو انت من النوع اللى بيحب الفيديو ممكن تعمل قناه على اليوتيوب " ليه لازم يبقى عندك قناه على اليويتوب "
او فيديوهات على الفيس بوك او حتى لو هتصور من كاميرا موبايلك .

ولو بتحب الصوت ومش حابب تظهر بشكلك : ممكن تعمل قناه على " SoundCloud " او تعمل " Podcast " وهكذا .

اختار المناسب لشخصيتك و اللى هتبدع فيه وابدأ انشر رسالتك وسيب بصمه

3/ " The Where " 

انت كده حددت رسالتك , وجهزت الطريقة اللى هتملها بيها سؤاء " فيديو - كتابة - صوت " كده مش ناقص غير المكان اللى هتنشر رسالتك فيه و ازاى هتنتشر وتعمل براند لنفسك وتبدا الناس تعرفك فى المجال ده وتساعدهم .

لازم تستغل انتشار السوشيال ميديا وان العالم كله بيستخدمها دلوقتى , فاكيد هتلاقى الناس المهتمة بالمجال بتاعك هناك
طبعا رقم واحد واكبر منصة وموقع فيهم هو " الفيس بوك " اعمل صفحة وانشرها مع صحابك وفى الجروبات المهتمة بالمجال ده
ودى مقالة هتعلمك ازاى تنتشر بشكل احترافى " ازاى تزود الانتشار لصفحتك ب 200% من غير ما تعمل اعلانات "

تانى منصه هو اليوتيوب ,  اتعلم ازاى تعمل قناه على اليوتيوب , هتلاقى كورسات كتييير على يوديمى

شرح كامل لموقع يوديمى و ازاى تحجز كورسات فى كل المجالات اللى بتحبها

ممكن تستخدم " instagram " او " snapchat " " twitter "
ممكن  تعمل انترفيو مع الناس الناجحين فى مجالك وتتعلمهم منهم وتنشر الانترفيو ده على قناتك وصفحتك ومدونتك وهكذا .

ولو عايز تنتشر بشكل اسرع , ممكن تعمل اعلانات سؤاء على الفيس بوك وتقدر تحدد بالظبط مين يشوف المحتوى بتاعك، أياً كان مكانه واهتماماته وعمره، كل ده مفيش اسهل منه تقدر تعمله بسهوله من الفيس بوك لما تتعلم ازاى تعمل اعلانات من الفيس بوك.

او ممكن تعمل اعلانات على شبكات كتير زى " Google AdWords " ودى طرق سريعة للانتشار.

قد يهمك أيضاً: شغل على النت بالدولار من البيت | خطة كاملة للبدء من الصفر!


كده انت عرفت الطريق وعرفت تعمل ايه بعد ما تعرف شغفك " تتعلم من أحسن المصادر فى مجالك - تلخص اللى انت اتعلمته - تشرحه للناس - وتطبقه ودى اهم حاجه - وتنشره فى كل مكان وتعمل لنفسك براند فى مجالك "

واستخدم الطرق اللى اتكلمنا عنها فى المقالة دى وافتكر ان نور العلم يكتمل بالتطبيق ولازم تتاكد ان موهبتك هتضيف لناس كتير وانك هنا فى الدنيا لسبب وغاية دور عليها لحد ما تلاقيها .. واستعن بالله ولا تعجز.

يا ترى ناوى تعمل ايه بعد ما قريت المقالة دى ؟

طب لو انت لسة مش عارف شغفك اصلا يبقى لازم تقرا المقاله دى :

 مش عارف شغفك ؟ جاوب الاسئله دى وهتعرفه