مقابلة مع أيه هانى - قصة نجاح تلهمك - اتبع شغفك - نادي القراءة العملية
404
نعتذر , لا نستطيع ايجاد الصفحة المطلوبة

الثلاثاء، 24 أكتوبر 2017

مقابلة مع أيه هانى - قصة نجاح تلهمك - اتبع شغفك

قصه نجاح أيه هانى

أيه هانى , اسم لمع مؤخرا فى مصر و الوطن العربى , رغم صغر سنها الا انها اصبحت رمز للسعى ورا الشغف والهدف . 

و ده مكنش من فراغ , لانها قدرت تغير مفهوم الرسم عند الناس , وترسم البسمة و تزرع الامل فى شباب كتير جدا برسوماتها المبدعة و المجنونه ومش بس كده طورت من موهبتها جدا , وبدات ترسم باشكال و انواع كتير جدا , وبقى عندها حاليا " Gallery " خاص بيها فى المنصورة . وحاليا بدات تعلم شباب كتير الرسم من خلال كورساتها الممتعة و العملية جدا . 

احنا قابلنا " أيه هانى " وعملنا معاها انترفيو وسالناها اسئلة كتير جدا عشان نعرف ازاى قدرت تنجح وتبدع فى مجالها وموهبتها, واخدنا منها نصائح و دروس تهمك ولو طبقتها فى حياتك هتقدر تحقق حاجات كتير بتحلم بيها , هنسيبكم دلوقتى مع الاسئلة و اجايات " أيه هانى " عليها .

1/ أيه هانى اكتشفى موهبه الرسم اللى عندك امتى ؟ 

أيه : ماكتشفتهاش ! كنت طول الوقت حاسه أني برسم عادي بل وحش , بس زمايلي فالمدرسة هما الي كأنو بينبهرو برسوماتي وانا مش عارفه هما عجباهم كده ليه , كأنو بيغششوني طول ايّام الامتحانات عشان ارسملهم يوم امتحان الرسم 😂
وكأنو يومها كلهم يتلمو حواليا و يتفرجو علي رسمتي و يقلدوها و يدوني ورقهم اساعدهم .

الدرس المستفاد :

زى ما بنقول ديما فى عملية اكتشاف شغفك و موهبتك وقدراتك , لازم تسمع لصوت اللى حواليك , شوف الناس بتقولك انت شاطر فى ايه , وبتلمع فى ايه , لان احيانا كتير الحاجة اللى انت مميز فيها بتشوفها عادية جدا واى حد يقدر يعملها ومش بتاخد بالك منها , رغم ان اللى حواليك مش بيعرفو يعملوها زيك , فلازم تخلى ودنك مع صحابك وتسالهم " ايه الحاجه اللى انا شاطر فيها وبلمع فيها وبعملها كويس جدا ؟ "


2/ نقطه التحول فى حياتك كانت ايه و امتى ؟

أيه : كانت لما جبت صورة واحده صحبتي و قررت ارسمها وكانت اول مره ارسم حد و ادرج بالقلم من الفاتح للغامق و ده كان اكتشاف و لما رسمتها و الناس عرفوها فرحت جداً و قررت ارسم ناس اكتر و اشوه صحابي و قرايبي كلهم 😂

الدرس المستفاد : 

ان موهبتك و شغفك مش هتعرفهم وتطور فيهم الا بالممارسة والتجربة والتعلم والمحاولة , وفيها معادلة بتقول 
" Talent + Investment = Strenght " 

اوعى تقول انا عندى موهبه ومش محتاج اتعلم واطور من نفسى ! صدقنى هتخسرها ومش هتستفيد بيها , أيه هانى وغيرها من الناجحين , نجاحهم ده مش من فراغ , نجاحهم ده بعد تعب وسعى و تطوير وتعلم وتجربة مستمرة , موهبة لوحدها لا تكفى , شغف لوحده لا يكفى ,, السر فى السعى و الاجتهاد و التطوير .. 


3/ بداتى ازاى ؟ و ازاى قدرتى توفقى بين شغفك بالرسم و دراستك ؟

أيه : ماوفقتش برضو .. عمري ماوفقت بينهم , أنا مش مؤمنه ولا عمري آمنت بالدرجات أو بالمجموع .. الدرجات والمجموع دول مش هما الي يقولولي أنا ناجحة ولا فاشله .. أني احفظ حاجه وأروح اكتبها و أعدي فالماده ده بنسبالي ماسموش نجاح .. كنت بفضل طول الوقت ببني فالحاجة الي شايفه فى اخرها نجاح مش اللي مش هاستفيد بيها بقيت اخلي كل حاجه تتطلب مني فالكلية ارسمها بالطريقه الي تعجبني عشان ابقي مبسوطة وانا بعملها و اعرف احطها و اعلقها عندي و اوريها للناس .

الدرس المستفاد :

الحقيقة فى اكتر من درس نقدر نتعلمهم من الاجابة دى , اولا ان نجاحك الحقيقى مش فى درجات الكلية او قانوى ! نجاحك الحقيقى فى مهاراتك و قيمك واحلامك و رسالتك اللى عايز تسيبها فى الدنيا. ثانيا , لو لاحظتو هتلاقو ان أيه قدرت توفق بين موهبتها ودراستها من غير ما تاخد بالها , لان المقصود بالتوفيق هنا , انك تخلى دراستك تساعدك او على الاقل متعطلكش فى موهبتك , أيه كانت كل يوم بتبنى وبتسعى فى حلمها و بتطور من موهبتها جدا حتى لو كل يوم نص ساعة بس , مكنتش بتحط اعذار ان مفيش وقت و عندى ضغط مذاكره و غيرها من الاعذار اللى بنحاول نريح بيها ضميرنا . و اخيرا , أيه كانت عايزة تكون مبسوطة وبس, فاهم حاجة فى الدنيا انك تدرس وتعمل الحاجة اللى بتخليك مبسوط بس.

4/ ايه التحديات اللى قابلتك و ازاى قدرتى تتغلبى عليها ؟ 

أيه: التحديات مش هي الي بتقابلك , انت الي بتحطها لنفسك  " أنا الي بحطها لنفسي ".. مش هاقول كنت تعبانه, لا كنت شايفه نفسي تعبانه , و كنت بتحجج واقول مش قادره و مش عامله و فى يوم بقول لماما أنا تعبانه و مش هاعرف أحقق أحلامي , تقولي لا إنتي أحسن من ناس كتير , اقولها لا برضو مش هقدر لحد ما في مره راحت بهزار و قالتلي آه إنتي تعبانه اسكتي بقي .. روحت بصالها كده .. و قولتها لا علي فكره .. أنا بس الي أقول كده انتو ماتقولوش .. و قررت اسبت أني اقدر انجح اكتر من الناس السليمه تماماً.

الدرس المستفاد : 

فى نوعين من الناس , ناس بتشوف حلمها وبتسعى وراه مهما كانت العقبات و الظروف وبتكسر الشماعات و الحجج , وناس تانية بتشوف الحاجات اللى تمنعها من الوصول لحلمها وعنيها بس على العقبات و الظروف ! 
أيه فى الاول كانت بتبص على العائق اللى بينها وبين حلمها , لحد ما قررت تكسر الشماعات دى بايدها وتسعى ورا حلمها وفعلا قدرت تحقق وعدها لنفسها انها تنجح . اسعى ورا حلمك و اكسر شماعتك .

5/ رسالتك فى الدنيا ايه و ايه الاثر اللى عايزه تسبية ؟

ان الرسم كل الدنيا و بتقدرو تعملو بيه كل حاجه و مجلاتو مابتخلصش.

أنا اللي حببني فالرسم أصلا من وانا صغيره , برنامج كان بيجي علي ديزني و عمو الي فالبرنامج ده كان بيقول " انت مش محتاج تكون فنان فظيع اوي  .. عشان تكون فنان فظيع أوي .. " هو ده الي حمسني و خلاني أكون أنا النهارده .

هو الي ساب جوايا حته كده حببتني فالرسم و حفزنى أحقق ده فانا عاوزه قبل مامشي أكون  سيبت حته مني في حد تاني زي ما هو عمل معايا .. لو حد واحد بس حب الرسم بسببي أو قرر يكمل فيه من كلامي أو حتي في المستقبل حقق حلمة وبقي رسّام ساعتها مش هبقي عايزه حاجه مالدنيا خلاص كده :') 

الدرس المستفاد :

ابدا صغير واستخدم المتاح معاك دلوقتى واحلم براحتك , وملكش دعوه بحد سبقك او نجح قبلك , خلى ديما المنافسة الوحيدة بينك وبين نفسك الامارة بالسوء فقط , اكبر عدو ليك هو نفسك , انتصر على نفسك اولا ثم انتصر على العالم.

6/ لو قلتك ايه اهم و اغلى درسين اتعلموهم فى حياتك هيكونو ايه ؟

ان انت الي بتقرر تبقي ايه , انت الي ممكن تخلي نفسك الحاجه الي بتحبها أو لا .. انت الي تقدر تخلي نفسك سعيد او لا .. أو تعبان او لا .. وان الناس مش هتبقي مكانك و انت قاعد فالبيت زعلان انك ماحققتش حلمك ولا هايفرق معاهم و لا هايكونو مكانك وانت فرحان و طاير من الفرحه يوم ماتحقق الحلم ده .

الدرس المستفاد:

انت اللى بترسم مستقبلك , انت مخير تماما , و المكانة او الحاله اللى انت فيها دلوقتى , انت السبب فيها مش حد تانى . فى نفس الوقت اللى بتقول فيه انا مش هقدر و الظروف مش مساعدانى , اهم حاجه تبدا وتصدق فى السعى وتستعين بالله وصدقنى , ربنا سبحانة وتعالى وعدنا وقال
" و الذين جاهدوا فينا لنهدينهم سبلنا " 

7/ ايه النصائح اللى حابه توجيها للشباب ؟

ان يخافو براحتهم ! و يسمعو نقد و تخويف من اهلهم عادي مايتاثروش .. لأنه كده كده هايحصل و كده كده هايفضلو كده
فنا اسمع الكلام ده واقول خلاص ماشي .. وانزل لسعي برضو لحد ماسبتلهم العكس ..
ازاي الحلم بيتحقق ؟  بالدعاء والسعي ..
بس الدعا بيقيييييييين ان ربنا هايحقق الحلم ده.

و مادعيش واقعد ف بيتنا أقول لو ليا نصيب فالحاجة دي هاتجيلي ! او لو ليا انصيب انجح هانجح !
لاطبعا علي كده بقي لو ليك نصيب تنجح فالامتحان هاتنجح ليه تزاكر و تنزل تروح اللجنه .. مانت لو ليك نصيب اللجنه هاتجيلك البيت ! لا بالسعي اسعي ولو ربع متر .. اسعي ف اي حاجه .. حتي لو مالهاش علاقة بالي انت عايزه .. اتعلم اَي حاجه جديده .. جرب اَي حاجه جديده .. اَي تعب تعبتو بيتحوش عند ربنا .. و كل واحد بياخد علي قد تعبو واكتر .. يعني حتي لو سعيت و تعبت في حاجه و مانجحتش فيها , اوعي تتخيل ان ربنا مش فاكر تعبك ده لا طبعا ده محوشهولك فا اتعب تاني و تاني هتلاقي سكه جديده اتفتحت قدامك بالتدريج كده و انت مش مستوعب ان ده بيحصل بجد. 

الدرس المستفاد:

زى ما بقول ديما " لو صدقتك السعى , هتلاقى مليون سبيل و مصدر ".
ربنا امرك تسعى , انت مش مطالب تسعى زى صاحبك اللى بيشيلك وزن 100ك وانت لسه فى اول طريقك , انت مطلوب منك تسعى , بطاقتك انت ومجهودك انت .. و خلى النتيجة على ربنا وتاكد انه شايلك الانفع والاصلح ليك . عليك السعى والنتيجة على ربنا عز وجل.

8/ النجاح بالنسبالك تعريفة ايه ؟

النجاح او السعاده من وجه نظري ماطلعش هو أني أحقق حلمي
الأهم مالحلم ده حاجتين :
  •  الناس الي حوليك الي هايحسسوك بفرحة نجاحك ده 
  •   وان حلمك ده يكون بيفيد الناس 
يعني , لو انا حققت حلمي ووصلت في مكان فى صحرا , ساعتها مش هلاقي حد أصلا اقولو أني نجحت مش هلاقي تيته فرحانه بيا او صحابي او قرايبي ..
و لو كان حلمي أني ابقي حاجه كبيره اوي , و بقيت حاجه كبيره , اوي احنا استفادنا ايه ! كتر خيرك !
لازم يكون حلمك ده بيخدم الناس , لو هايخلي حتي حد يضحك بسببه ساعتها والله النجاح والفرحه دول هايتضاعفو و هاتحس ان كل الي فات ده حاجه واللحظه هي فعلاً الي يتقال عليها نجاح .

الدرس المستفاد:

خلى حلمك يقبل القسمة على تلاتة ديما ( ربنا - المجتمع - نفسك ) خلى حلمك يعمر الارض اللى ربنا خلقك فيها , خلى حلمك يضيف قيمة للناس اللى حواليك والمجتمع , ومتنساش نفسك بقى لانها تستاهل تكون احسن. 

انتهت المقابلة مع المبدعة " أيه هانى " والدروس اللى قالتها عظيمة جدا والهمتنا جدا اننا نكمل ونسعى ونمسك فى حلمنا ونديلة حقة ونضيف قيمة لنفسنا وللناس و ننور حياتهم .. 



كتبها لكم : Ahmed Sysy

شارك المقال

جميع الحقوق محفوظة لـ نادي القراءة العملية | تصميم :