الرسم على الزجاج دليل كامل وشرح بالصور وأمثلة لأفضل التصاميم

فن الرسم على الزجاج من اروع وامتع أساليب الرسم على الاطلاق.

محتوى المقالة:

ادوات الرسم على الزجاج

الوان زجاج

الرسم على المرايا

الرسم و الكتابة على الزجاج

قلم حفر على الزجاج

متعة الرسم على الزجاج مش بتنتهي بانتهاء الرسمه وانما بتستمر ببهجة الألوان الزجاج لما بيتخللها ضوء ف تسحر العيون وتتولد متعة النظر بجانب متعة الممارسة ولذتها

وفي المقاله دي هنتعرف على كل ما يخص الرسم على الزجاج من أدوات وتكنيك وطريقة رسم بالصور

أول حاجه معانا هي:

أدوات الرسم على الزجاج واسعارها

1- أنبوب تحديد على الزجاج

واسمه ريليف ودا متوفر منه اللون الاسود والفضي والذهبي والنحاسي
اسعاره بتبدأ من 20ج ل 55ج على حسب جودته وماركته

2- فرش للتلوين

ودي اسعارها بتبدأ من 1.5ج ل 35 ج وممكن اكتر على حسب نوع الفرشاة ورقمها وماركتها

3- الوان زجاج ودي متوفر منها نوعين

النوع الأول:

الوان زجاج شفافه ودي بتسمح بمرور الضوء من خلالها ف بتنعكس الالوان على السطح المقابل وبتدي منظر مبهج جدا وجميل

اسعارها بتختلف مع اختلاف الماركة وعدد الألوان ولكن بشكل عام دا اكتر نوع متوفر حاليا في المكتبات في مصر وسعره 70ج والعلبة بيكون معاها الريليف والقطارة وبتحتوي على 7 ألوان

وفيه الالوان دي بردوا شفافه ومتوفرة في المكتبات الكبيرة وفيها عدد الوان اكتر ولكن معرفش سعرها الحقيقة

النوع الثاني

الوان زجاج غير شفافه ودي مش بتسمح بمرور الضوء من خلالها وقاتمة
ودي انا جربت منها نوع واحد وهو اللي ف الصورة دا وسعره 150ج

4- لوح زجاج للرسم عليه
5- تنر لمسح الزجاج والفرش او تخفيف الالوان او ازالتها
6- باترون للشكل اللي هيتم رسمه على الزجاج بنفس حجم لوح الزجاج
وفي الفولدر دا هتلاقوا مجموعة من الباترونات قبل وبعد الرسم

اضغط هنا

خطوات الرسم على الزجاج

اول حاجه تنظيف لوح الزجاج كويس بقطنه وتنر
تثبيت الباترون تحت لوح الزجاج بشكل كويس او لو هيتم الرسم على الزجاج مباشرة
بدون استخدام باترون ف يفضل وضع ورقة بيضاء تحت لوح الزجاج
استخدام الريليف (أنبوب التحديد) لتحديد الشكل على الزجاج وهنا بنحاول
تكون ايدينا ثابتة قدر الامكان عشان خط التحديد يكون سلس ومتساوي ويكون ضغطنا على الريليف بنفس القوة
وكمان بيفضل ان الريليف مايكونش لازق في لوح الزجاج اثناء التحديد
وإنما يترفع عن الزجاج حاجه بسيطه جدا حوالي 1 ملم مثلا دا هيساعد اكتر في انتظام الاوتلاين بتاع الرسمه
هنستنى لحد ما ينشف الريليف تماما وبعدها نبدأ في التلوين هنوزع الألوان باستخدام الفرشاة على هيئة طبقات

مثلا لو هستخدم لون بينك وانا محتاجه الدرجه الروز منه ف هعمل طبقه خفيفه خالص لو عايزة البمبي او درجه اغمق هنستنى لحد ما ينشف واحط طبقه تاني فوقه وهكذا لحد ما نوصل للدرجة ال عايزينها

وهنا فيه كام ملحوظه خاصة بالتلوين لازم يتقالوا :

طريقة تثبيت الألوان على الزجاج

اضغط على زر التالى بالأسفل لتكمل قراءة المقال

↚

1- الوان الزجاج وسيطها نفطي فى أكاديميا هي غير قابلة للدمج يعني ماينفعش نخلط لونين ببعض.

لكن هنا انا فيه حاجه بعملها وهي ان لو عايزة لون موف مثلا وهو مش متوفر في علبة الالوان

فانا بجيب غطاء لون او قطارة واحط فيها 4 نقط من اللون البينك مع نقطه من اللون الازرق واخلطهم بسرعه كويس ف بيدوني اللون الموف وابدأ استخدمهم بسرعه قبل ما الالوان تنفصل عن بعضها تاني او تنشف
وهنا لو حد حب يدمج الالوان عشان يخرج بالوان جديده ماينفعش تدمج كميات كبيره لان هتنشف او هتنفصل ومش هتستفيد منها

2 - ان مفيش قاعده ثابته للدمج ف الخلط يكون بنسب

يعني مثلا مش ديما خلط اللون البينك بالازرق بينتج عنه موف ممكن لو زودت الازرق هتلاقي طلع لون كحلي او ازرق غامق ولو ساويت الكمية اللي من اللون الأزرق والبينك هيطلع لون مختلف تمام
وبردوا بيتوقف دا على نوع الالوان المستخدم سواء شفافه ولا قاتمة والماركة بتفرق في درجة اللون بردوا.

اللى بيتم تعليمه أكاديميا هو ان مفيش دمج الوان زجاج بسبب الصعوبات دي
لكن انا بدمج الوان الزجاج بالطريقة اللى ذكرتها دي وحبيت اقولها للي يحب يجرب

3 - بعد ما ننهي التلوين بنسيب لوح الزجاج لحد ما الالوان تنشف تماما وبعدها نبروزه ونعلقه ك لوحة فنية او نستخدمه زي ما نحب ك زجاج شباك او قاعدة ل احد صواني التقديم ويفضل تعريضه للضوء لإظهار الوانه ومدى جمالها

الرسم على الزجاج أمثلة بالصور

انا ذكرت فوق بشكل عابر إمكانية الرسم على الزجاج مباشرة بدون استخدام باترون ودا اللي انا بحاول اعمله حاليا هو حاجه مش دارجه ومشوفتش حد بيعملها قبل كدا ولكن للي يحب يجرب ف دي بعض رسوماتي على الزجاج هتلاقوها في الفولدر دا
وافضل ان ال يجربها يكون جرب استخدام باترونات في البدايه لحد ما ايده تكون اتعودت على التحكم في الريليف وفي الالوان وتدريجها

الفولدر الخاص برسوماتى