‎ بوابتك للتعلم الذاتى

تعليم الرسم للاطفال خطوة بخطوة في المنزل (لكل المراحل العمرية لطفلك)

تعليم الرسم للاطفال خطوة بخطوة في المنزل (لكل المراحل العمرية لطفلك)
يحتوي هذا الموضوع على:
    تعليم الرسم للاطفال
    تعليم الرسم للاطفال هو استثمار مهم جدا لأولادنا، ولو قدرنا نوفرلهم البيئة الصحية والأدوات المناسبة، هنقدر ننمي عندهم موهبة الرسم ومهارات كتير زى الإبداع وغيره.. وده موضوع مقالتنا النهاردة.

    وقبل ما نتكلم عن تعليم الرسم للاطفال خطوة بخطوة في البيت محتاجين نجاوب على كام سؤال مهمين الاول!

    ليه عايز/ة طفلك يتعلم الرسم؟

    فيه أسباب كتير جدا تدفعك لتعليم طفلك الرسم وهنذكر هنا بعض ايجابيات الرسم وأهميته كمهارة عند الأفراد والأطفال

    لكن محتاجين تجاوب/ي ع السؤال دا مع نفسك الأول لانه هيفرق جدا في مدى الدعم اللى هيتلقاه طفلك واللى هيأثر على معدل تطوره واستمراريته.

    جاوبت واتاكدت انك فعلا عايزه يتعلم الرسم وهتدعمه في دا؟ (عرفنا اجابتك في التعليقات)

    تعالى نزود عندك رغبتك ونتعرف سوا على أهمية الرسم وبعض ايجابياته فى حياة الأطفال
    1. بيبعد الطفل عن الموبايل والتابلت والتلفزيون: اللى بيخلوه شخص مستهلك. 
    2. بيحفز جانب الخيال والإبداع عند الأطفال وينميه اكتر
    3. الثقة بالنفس: الرسم بيعزز ثقة الطفل بنفسه جدا خاصة لما بيكون فيه دعم وتشجيع من الوالدين،احساس انه قادر يعبر عن نفسه ويرسم حجات من حواليه، ويلاقي غيره بيسقف ليه وبيقوله برافو اللى أنت بتعمله دا كويس بيزود ثقته في نفسه في العموم مش بس في الرسم
    4. الرسم بيطور جدا من مهارة حل المشكلات عند الطفل: وهو بيرسم هيتوجب عليه رسم مستطيل عشان يرسم باب، أو يعمل خط عشان يوصل عضو جسم باخر، ووقتها كل اللى عليك تساله بس ليه رسمت دا بالطريقه دي عشان تسمع حل!
    5. مهارة التركيز: الدقائق البسيطة ال بيقضيها الطفل يوميا وهو مركز في رسمه بتكسبه مع الوقت مهارة التركيز والانتباه لاي حاجة يعملها بعد كدا.
      المهارات دي وغيرها زي الصبر وتنمية الذكاء والخيال وتوسيع الادراك والتعبير عن المشاعر بطريقة راقية اكيد هتفرق معاكي ف تربية طفلك لما يكتبسها

    هل طفلك موهوب بالفطرة؟

    طب لو مش موهوب ممكن يتعلم الرسم بردوا؟

    الحقيقة ان كل الاطفال بيتولدوا عندهم مهارة الرسم، الا ان رعاية المهارة دي والاهتمام بيها وبتنميتها من الصغر، هو اللي بيظهرها ويطورها أو يدفنها في مهدها.

    في عمر كم اقدر ابدأ أعلم طفلي الرسم؟

    الطفل من وهو بعمر الاشهر بيبدأ يميز بين الالوان وبيميل لبعضها، هنا احنا ممكن نبدأ بفاعليات فنية بسيطة، زي ان اجيب الوان مائية بوستر او جواش، واحطها على ايده ورجله واخليه يطبع بيهم على الورق

    لحد ما يبدأ يمسك القلم والفرشة ويدخل في مرحلة الشخبطة العشوائية، وعند المرحلة ال بيكون قادر يسيطر على مهارات ايده العضلية بنبدأ نوجه لمهارات الرسم الاساسية

    بدأ من الاشكال الهندسية ورسم الدوائر والزوايا تدريجيا لرسم الحيوانات، والطيور، والشخصيات الكارتونية المفضلة صعودا للطبيعة الصامتة واللاند سكيب والبورتريه ان شاء الله.

    مراحل تعليم الرسم للاطفال حسب الفئة العمرية

    مع ترشيحات لمصادر وفيديوهات على اليوتيوب تساعد في كل مرحلة + ترشيح للأدوات المناسبة

    أول حاجة الأطفال اقل من سنتين، الطفل أقل من سنتين بيكون عضلاته ضعيفة، وصعب يتحكم في قلم او فرشة في السن دا فى ممكن نوفر ليه اوراق والوان مائية

    ونخليه يحط ايده ويبدأ يطبع بيها ويدخل الالوان على بعضها
    • تعليم الرسم للاطفال من سنتين ل4 سنين:
    في السن دا الاطفال بتكون قادرة تمسك فرشة وقلم لكن تحكمها مش بيكون كامل بردوا، فمش مطلوب نعلمهم رسم حجات معينه ممكن نوجههم للتلوين فقط.

    هنوفر ليهم ألوان خشب وكراسات تلوين للأطفال ودي هتلاقوها متوفرة في معظم المكتبات
    • تعليم الرسم للاطفال من 4 ل 7 سنين
    يفضل الاطفال في السن دا يستمروا في التلوين وندعمهم بأفكار رسم عشوائية تنمي الابداع عندهم ونخليهم يجربوا خامات مختلفة

    زي الالوان الاكريليك، والاكواريل، والالوان الشمع
    والفولدر دا فيه مجموعة أفكار وأنشطة متعلقة بالرسم تقدروا تمارسوها مع اطفالكم في السن دا او توجهوهم لممارستها

    رابط الفولدر:


    اضغط هنا
    • تعليم الرسم للاطفال من عمر 7 ل 10 سنين
    في السن دا الطفل بيكون بدأ ينمي مهارة الكتابة عنده وقادر يمسك قلم ويتحكم فيه زي ما يطلب منه
    ف بنبدأ نوجه في البداية لرسم اشكال هندسية وشخصيات كارتونية بسيطة معتمده على الاشكال الهندسية زي اسبونج بوب مثلا
    وفي المرحلة دي ممكن نوجه لرسم حجات من الطبيعه زي الاشجار والورد وهكذا

    ودي بعض الفيديوهات اللى ممكن تساعد الطفل في المرحلة دي: اضغط هنا
    • تعليم الرسم للاطفال ما بعد 10 سنين
    بيكون الطفل في المرحلة دي انضج ومعدل استجابته ورغبته في تنمية مهارته اكبر، هنا ممكن نبدأ بتعريفه بالظل والضوء
    ورسم عناصر محيطه وتطبيق دا عليها بشكل يدي واقعيه اكتر للرسم، مع تعريفه باساليب مختلفه وتحديد الاسلوب اللى بيميل ليه بحيث يكمل فيه ويبقى له اسلوب خاص بيه.

    ودا ممكن يتم من خلال تعريفه بالمدارس الفنية والاساليب المتبعه فيها ونسيبه هو يحدد الأسلوب اللى يعجبه ومافيش مشكله لو جرب كل الاساليب.

    ودي فيديوهات تعريفيه بتاريخ الفن: اضغط هنا

    وفيديوهات عن الظل والضوء:

    1. https://youtu.be/v8M4yoc0ZbY
    2. https://youtu.be/JogQJLyk76U
    فيديو تعريف بدايرة الالوان وتكوين الدرجات المختلفة:  https://youtu.be/J5VKbToUZlE

    الخاتمة: 

    تعليم الرسم للاطفال هو شئ مهم جدا، وهيعود على الطفل بمكاسب كبيرة في المستقبل، ومين عارف يمكن الرسم يخلى طفلك حاجة كبيرة في المستقبل، زى قصص نجاح كتير لشباب واطفال قدروا يحققوا نجاحات كبيرة من الرسم، وهنا هتلاقي قصص نجاح هتخليك تعلم الرسم لطفلك دلوقتي حالا
    عرفنا عمر طفلك كام ومستواه في الرسم ايه؟
    نتمنالك رحلة ممتعة لتعليم طفلك الرسم.
    Mona g mohamed
    @مرسلة بواسطة
    كاتب ومحرر اخبار اعمل في موقع نادي القراءة العملية | بوابتك للتعلم الذاتي .

    إرسال تعليق