القائمة الرئيسية

الصفحات

بتدور على شغفك؟ جاوب الاسئلة دى ! Discover Your Passion

ازاى تعرف شغفك
شباب كتير بتسئل " ازاى اعرف شغفى؟ "ازاى اكتشف شغفى"
تايهه ومش عارف أبدا ازاى ولا عارف شغفى "

يعنى ايه شغف او Passion؟

وغيرها من الاسئله المتعلقه بالشغف وتعريفه وازاى نعيش بيه ونشتغل فى مجال بنحبه مش مفروض علينا ونبدع فى المجال ده ..

والحقيقه كلمة "الشغف" بقت متنشرة جدا الأيام دى وكل الناس بتتكلم عن اهميتها، وده مش من فراغ لانك لو بحثت عن كل قصة نجاح أو أى شخص ناجح أثر فى العالم هتلاقيه بيقولك ديما "حياتى اتغيرت لما بدأت اعمل اللى بحبه واعيش بشغف"
وبتكون ديما النصيحه منهم "انك لازم تعرف انت بتحب ايه وتتعلمه وتعيش عشانه، وهتلاقى حياتك كلها اتغيرت وبقيت مبسوط"

قبل ما تبدأ رحلتك فى انك تعرف شغفك، لازم الأول تعرف نفسك (مميزاتك - مهاراتك - نقاط القوه - نقاط ضغفك ..)
طب الخطوه دى تعرفها ازاى ؟ عملنا كورس مجانا هيساعدك تعرف نفسك تقدر تشوفه من هنا 
بعد ما تعرف نفسك، هتكون عملت أول وأهم خطوة فى حياتك وبعدها تقدر بكل سهوله تعرف شغفك، وفى أكتر من طريقه تقدر تعرف بيها شغفك هنشارك معاكم فى المقاله دى طريقه منهم وهتكون عن طريقه اسئلة مرتبطه بقلبك لأن الشغف مكانه القلب
ورغم سهولة الاسئلة الا انها هتكون صعبه جدا على أغبلكم، وده يرجع لأسباب كتير وعشان كده عملنالكم مقاله فيها خطوات عملية تساعدكم تجاوبوا على الأسئله لو كانت صعبه بالنسبالكم.
ودى المقالة: خطوات عمليه تساعدك تصحى قلبك وتعرف شغفك

قبل ما نبدأ فى الاسئلة هنتفق على كام حاجة وأدوات تجهزها عشان تستفيد من المقالة:
  • طلع ورقة وقلم وخليهم جمبك
  • دور على مكان هادئ ومفيش أى مشتتات واقفل موبايلك
  • اكتب اجابة كل سؤال لوحدها واكتب اول اجابة تيجى فى بالك من غير تعديل 
  • خليك صادق مع نفسك محدش هيشوف الاجابات وهيراجع اجاباتك
  • استمتع جدا بكل سؤال وكل اجابة وابتسم وانت بتكتبها 
ندخل بقى فى الاسئلة، وخلينا نتفق انك مش مطالب تجاوب على كل الاسئلة، ممكن اجابه سؤال واحد بس تلمس قلبك وتخلى عينك تلمع وتكون هى دى نطقة انطلاقة انك تعيش حياه مبسوط فيها وتكتشف الكنز اللى ربنا سبحانه وتعالى خلقه جواك ..

نبدأ فى الاسئلة:

1/ لو قدامك فرصه انك تتعلم حاجة وحده بس انت اللى تختارها هتكون ايه؟

نوضح السؤال اكتر، يعنى ايه اكتر مجال نفسك تتدرسه أو تتعلمه، بعيدا بقى عن التنسيق او الكلية، ممكن تفتكر وانت فى ثانوى ايه اكتر ماده أو مجال كنت بتحب تذاكره، لما بتروح مكتبة ايه اكتر مجال بتكون فضولى انك تقرأ فيه؟

لو حددت مجالك، ابدء اتعلمه اونلاين من خلال مواقع الكورسات الاونلاين من هنا:  أفضل 3 مواقع كورسات اون لاين تعلمك أي مجال من الصفر للإحتراف!

2/ ايه الموضوع اللى لما بيتفح مع صحابك بتحب تتكلم فيه؟

بمعنى لما بتكون فى قاعده وتيجى سيرة موضوع معين انت عينك بتلمع أو بيكون عندك فيه معلومات، وبتكون نفسك تفضل تتكلم فيه معاهم وتنصح وتجاوب على اسئلتهم فى المجال ده وبتكون مبسوط جدا لما بتتكلمو فى الموضوع ده، بعيدا طبعا عن النميمة على اصحابنا والمدرسين والدكاتره.

3/ ايه اكتر حاجه كنت بتحب تعملها وانت صغير؟

فترة الطفوله هى أهم فتره فى حياتنا لاننا كنا عايشين بنعمل اللى بنحبه، ومش بنفكر فى كلام الناس أو غيره، فحاول تفتكر كده ايه اكتر حاجه كانت بتخليك مبسوط وانت صغير، أو كنت مميز فيها جدا وأنت صغير، اسال بابا و ماما واخواتك أو قرايبك لو انت مش فاكر، وبعد كده اكتبهم كلهم فى ورقه وابدا شوف ايه من الحاجات دى اقدر استفيد بيه فى حياتى حاليا!

4/ ايه الحاجه اللى الناس بتقولك انك شاطر فيها وبتعملها بابداع او جودة عالية؟

احيانا كل واحد فينا بيكون شاطر فى مجال معين بس بيكون فاكر انها حاجه عاديه وممكن كل الناس تعملها، عشان كده انت لازم تخلى ودنك مع الناس وتسالهم ايه احسن مجال انا مميز فيه، ايه احسن مهاره عندى اقدر استغلها فى حياتى وهكذا، هتتصدم انك فيك مميزات كتير مكنش واخد بالك منها او فاكرها عادية، بس حاول تسال الناس المقربين منك وهيكونوا صادقين معاك فى اجابتهم

5/ ايه الحاجه او الخدمه اللى لما بتقدمها بتكون مبسوط؟

ممكن يكون "تطوع - تصميم - رسم - تسويق - كتابة - وغيرهم"

المهم حاجه انت بتعملها لمجرد المتعه سواء كانت بمقابل مادى أو لا، نقول تانى بتعملها لمجرد انك بتكون مبسوط ومستمتع بيها.

6/ مين مثلك الاعلى؟

وهنا ممكن يكون اكتر من شخص فى اكتر من مجال، مثلا مثلى الاعلى فى الدين فلان، مثلى الأعلى فى الشغل فلان، مثلى الأعلى فى الحياه عمتا فلان وهكذا. بس هناخد بالنا من حاجه احنا مش عايزين شخصيته، السؤال هنا، هو ليه بيلهمك؟  ايه الخدمات أو النجاح اللى حققه وانت نفسك تتحققه؟ ايه القيمه اللى بيقدمه للناس أو المشاكل اللى بيحلها سواء مهنيا او شخصيا"

7/ ايه البصمه اللى نفسك تسيبها فى مجالك؟ ايه المشكله اللى نفسك تحلها فى مجال معين والناس بتعانى منها؟

كل واحد فينا عنده مشكلة أو اكتر فى جوانب كتير، كل مجال في الدنيا محتاج ناس تسيب في بصمة أو تقدم فيه حل جديد لمشكلة ظهرت الناس بتعانى منها، دورك بقى انك تدور على بصمة تسيبها أو مشكلة معينة تلاقى ليها حل..

مثلا لو شغوف بمجال الفيتنس واللياقة وخلافه وكنت بتعانى ان جسمك تخين ونفسك تخس ويبقى وزنك مثالى وبعد فترة من القراءة والتطبيق بدأت تعرف ازاى تحل المشكلة دى وبقى جسمك مثالى وبقى عندم قدر كافى من المعلومات تقدر تساعد بيها غيرك، تفتكر تقدر تحل المشكلة دى لكام شخص موجود حاليا؟! ده فى حد ذاته دافع كبير جدا ليك عشان تكمل..

8/ ايه الحاجة اللى لما بتعملها بتنسى الوقت وبتنسى نفسك وأنت بتعملها؟

ودى من أهم العلامات لمعرفة شغفك، واحد بينسى نفسة لما يكون معاه ريشة وبيرسم، حد تانى بينسى نفسه لما يكون معاه ورقة وقلم ويكتب، حد تانى بينسى الوقت لما يكون معاه الكاميرا بتاعته ويصورـ حد تانى بينسى الوقت والتعب لما يقرا فى مجال معين أو لما يكتب اكواد فى مجال البرمجة، وهكذا..

ايه بقى المجال أو الحاجة اللى بتنسى بيها الوقت والتعب؟ لو مش عندك ابدء جرب مجالات وانشطة جديدة..

لأن التجربة هى خير دليل..

9/ لو قدامك تختار علم واحد تعلمه لغيرك هيكون ايه وفى مجال ايه؟

عشان تتعلم اى حاجة بسرعة، علمها لغيرك !
يا ترى ايه هو المجال اللى نفسك تعلمه للناس اللى حواليك؟
المجال اللى نفسك كل الناس يكون عندها وعى بيه؟

10/ ايه التحديات اللى واجهتك طول حياتك وازاى اتغلبت عليها واتعلمت منها ايه؟

واحد مثلا كان عنده تحدى مع الكسل والمماطلة فا بدء يقرا ويبحث لحل عن المشكلة ويطبق لحد ما اتغلب عليها

يا ترى ممكن يتعلم ايه من التحدى ده؟

يتعلم انه شخص عنيد وبيقدر يحل المشاكل اللى بتواجهه ويبحث ويدور لوحده وهكذا..

11/ لو معاك فلوس كتيييير جدا هتعمل بيهم ايه؟

عشان دى من اكبر الشماعات اللى بتوقف الناس عن حلمهم، " الفلوس " طب تخيل معايا مصباح علاء الدين وبيقولك معاك كل فلوس العالم، هتعمل بيهم ايه بقى؟ هتفتح مشروع فى مجال معين مثلا؟ ولا هتستخدمهم ازاى؟

وبما اننا بنتخيل بقى، فتخيل انك على فراش الموت، وقدامك 6 شهور بس فى الدنيا، ايه الحاجه اللى هتعملها فى الوقت ده، غير انك هتصالح بابا وماما وتزور قرايبك وتصلى، سيب الجانب الروحى دلوقتى، ايه الحاجه اللى هتندم انك معملتهاش لو انت فعلا على فراش الموت دلوقتى؟ وخلينا اقولك ان ده مش تخيل ولا حاجه لانك حرفيا مش ضامن تعيش ثانيه كمان، فعيش حياتك وانت بتعمل اللى بتحبه لان مفيش وقت تضيعه.

كفايه كده عليكم اسئلة، وهنتسنى طباعكم بعد ما شوفتوه الاسئله دى، هل لقيت اجابه بسهوله؟ هل حاسس بلغبطه وانك مصدوم؟ قولنا أول انطباع حصلك بعد ما شوفت الاسئله، اكتب انطباعك فى تعليق تحت المقالة.

لو عايز تعرف ازاى تحول شغفك أو موهبتك لمصدر دخل اونلاين، شوف الفيديو ده:


لو عندك اى سؤال أو لغبطة ممكن تكلمنى على الأكونت الشخصى من هنا : Ahmed Sysy

مواضيع ذات صلة:

 اختصر طريقك واتميز فى مجالك لو طبقت السر ده

Ahmed Sysy
Ahmed Sysy
مؤسس نادي القراءة العملية، ومتخصص فى صناعة المحتوى، وتحسين محركات البحث "SEO" أسعى لمساعدة مليون شاب لبداية رحلة التعلم الذاتي

تعليقات

31 تعليقًا
إرسال تعليق
  1. الأسئلة كويسة ،حاجات اكتشفتها فعلا مع أنها ظاهرة قدامى طول الوقت وفيه ترابط فى أكتر من سؤال بإجاباته. شكرا

    ردحذف
    الردود
    1. الشكر لله، مبسوط انك عرفتى تجاوبى والله

      حذف
  2. بص هو انا جاوبت يعني :D بس المجال طلع بعيد اوى دانا في كلية آداب وشغفي في هندسة الميكانيكا -_-

    ردحذف
    الردود
    1. طيب فيها ايه متتعلمي اللي بيدرسوه ف هندسة انا اهو هدخل جامعة ومجموعي جايب اداب هدخلها واخد كورسات برمجة وكان نفسي ادخل هندسة قسم عمارة ولو في نصيب هدرسه دي حياتي وانا بس اللي هتحكم فيها

      حذف
  3. ياه الاختبار ده كان يفرق معاى من ٣٠ سنه الان عندى ٥٠ الحياه الان مختلفه حتى لو لقيت شغفى معندىش الهمه والعزيمه الكافيه لانجازة ليت الشباب يعود يوما علما بانى حسه انى شباب بس مش عايزة اجاهد اكتر من انى عايزة اكمل رحلتى مع اولادى وارتاح واستمتع انتهزوا الفرص العمر بيجري باسرع مما تتوقعوا

    ردحذف
    الردود
    1. ربنا يبارك في حضرتك و اولادك

      حذف
  4. شغفى تقريبا طلع فى مجال التنميه البشرية والقراءة والسوشيال ميديا والسفر
    دول اكتر اهتماماتى وبنسى الوقت فيهم بس معرفش ممكن استفاد بيها ازاى او اعمل ايه

    ردحذف
    الردود
    1. تابع سلسلة الفيديوهات دى :
      https://www.youtube.com/watch?v=t2gD0__19L0

      حذف
  5. انا من الجزائر لم أفهم اللغة الإنجليزية شكرا لك اخي

    ردحذف
  6. الحمد لله كنت عارف شغفي واتاكدت منه بالاسئلة
    انا بحب مجالات الديزاين والتعديل ع الصور و التصوير والحرافيك والمونتاج
    وحلمي اني اكون صاحب شركة كبير زي ديزني هل هقدر

    ردحذف
    الردود
    1. اه تقدر طبعا بالسعي وتطويرك من نفسك في المجالات
      شوف الفيديو ده
      https://www.youtube.com/watch?v=t2gD0__19L0

      حذف
  7. متل ما كنت متوقعة التصوير الفوتوغرافي والرسم والاعمال التطوعية

    ردحذف
    الردود
    1. ما شاء الله مجالات جميلة جدا، نتمنالك التوفيق فى رحلة شغفك

      حذف
  8. مش عرفت اجاوب علي معظم الاسالة..اعمل اي؟

    ردحذف
    الردود
    1. اعمل الخطوات اللى في المقالة دى الأول
      https://www.prceg.com/2017/11/Restore-your-passion.html

      حذف
  9. هو ليه بعد السؤال 29 بيوقف الاسئله

    ردحذف
  10. انا أظل ع اليوتيوب ع مواضيع تطوير الذات وانماط الشخصية والرياضة والأمور الدينية وما احس بالوقت ونفسي اقرأ كتب بس مشكلتي انسى كل الي اتعلمه

    ردحذف
    الردود
    1. بالتطبيق والمشاركة مش هتنسى

      حذف
  11. فيه حاجات جاوبت عليها واجاباتى مختلفة يعنى مفيش ترابط كبير بين اختياراتى دا غير فيه حاجات معرفتش اجاوبها أو ملقتش إجابة بمعنى اصح

    ردحذف
  12. مساعده الناس بس ازاى

    ردحذف
    الردود
    1. وانا كمان بالاخص حل مشكلاتهم

      حذف
  13. لك كل الشكر انت انسان كريم لأنك بتساعد الناس انا استفدت كتيرررررررر

    ردحذف
    الردود
    1. الشكر لله، اتمنالك كل التوفيق يا ريم

      حذف
  14. انا عايشه ف الدنيا مش عارفه اي حاجه مش عارفه هوايه ولا عارفه احددها حتى الحاجه الا كان عندي فضول وحب أن ادرسها بدرس غيرها ومش عارفه أذا كانت هي فعلا كانت حلمي أو لا بس لسه بحبها لأن حاسه كنت هلاقي فيها نفسي بدرس حاليا ف كليه قمه زي مابيقولوا بس لسه مش لاقيه فيها نفسي والموضوع دا مخليني مش عارفه اعيش ومأثر عليا بطريقه سلبيه لأن انا من النوع الا بحب ترتيب ونظام وطبعا شايفه حياتي فوضويه كدا اعمل ايه ياريت حد يساعدني بليييييز

    ردحذف
    الردود
    1. تواصلي معايا على الفيس بوك يء مريم أفضل

      حذف
  15. أزال المؤلف هذا التعليق.

    ردحذف
  16. انا مش عارفه اي حاجه ف حياتي حتى مش عارفه هوايتي كل حاجه ف حياتي مجهوله حاولت اعرف نفسي وفشلت اتمنى اعرف ان بحب ايه حتى الحلم أو الحاجه الا كان عندي فضول ادرسها بدرس غيري مع اني مش متأكده إذا كانت دي كانت حلمي فعلا ولا لا بس كنت حاسه ان هلاقي نفسي بيها مع اني دلوقت بدرس ف كليه قمه زي ما بيقولوا بس مش لاقيه نفسي فيها صح لما بتحط ف حاجه بحاول انجح فيها مش معنى كدا ان حابها انا بنجح عشان مبحبش الفشل شغوفه جدا وبحفز نفسي عشان كدا نفسي اعرف هدفي وهوايتي لأنها هتفرق معايا كتير خصوصا انا شخصيه منظمه مبحبش حياتي تبقا فوضويه وماشيه لطريق مش عارفه لو تقدروا تساعدوني بليييييز

    ردحذف
  17. ف اسئلة مش عارفة اجاوب عليها او مش عارفة افهمها انا متلغبطة حدا

    ردحذف

إرسال تعليق