كيف تستفيد من العزلة لتغيير حياتك 180 درجه ! بدلا من مئة عام من العزلة - نادي القراءة العملية
404
نعتذر , لا نستطيع ايجاد الصفحة المطلوبة

22 يونيو 2017

كيف تستفيد من العزلة لتغيير حياتك 180 درجه ! بدلا من مئة عام من العزلة

مئة عام من العزلة

لما يكون المجتمع اللى حواليك فاسد او سلبى او محبط وانت عارف انك ضعيف على نفسك الاماره بالسوء وممكن ياثروا عليك وتبقى زيهم , يبقى انت محتاج للعزلة ..

ملحوظه : بعض المعلومات من كتاب ( إحياء علوم الدين - للامام الغزالى )

ولكن ما هى العزلة ؟ 

العزلة هى اعتزال الناس و المجتمع ولها الكثير من الانواع , ممكن تكون عزلة كليه او مؤقته وهنتكلم فى المقاله دى عن خطوات عمليه تساعدك فى انك تحصل على اقصى استفاده لما تنعزل بالطريقه الصحيحه.

اول حاجه لازم نتكلم فيها هى , حال قلبك ؟ هل انت عايز تنعزل عشان الناس وحشه وانت احسن منهم ومتدين عنهم ؟ خد بالك لان ده فخ شيطانى خطير لانه بيكون كبر خفى وظلمه فى القلب . 

خلى حال قلبك انك عايز تنعزل للعزلة نفسها , تنعزل عشان تزكى نفسك الاماره بالسوء , عشان تشوف عيوبك وتصلحها ..

من اكتر الاحاديث اللى فرقت فى معايا جدا وكانت من النقاط المحوريه فى حياتى
حديث سيدنا النبى صل الله عليه وسلم
( إِذَا رَأَيْتَ شُحًّا مُطَاعًا وَهَوىً مُـتَّـبَـعًا وَدُنْـيَا مُؤْثَـرَةً وَإِعْجَابَ كُلِّ ذِي رَأْيٍِ بِرَأْيِهِ فَعَلَيْكَ بِخَاصَّةِ نَفْسِكَ وَدَعْ عَنكَ أَمْرَ الْعَامَّـةٍ )

يعنى ايه عليك بخاصه نفسك ؟ 

يعنى خلى شغلك الشاغل هو نفسك الاماره بالسوء تزكيتها وتطوريها وتفيد غيرك وهكذا , احكيلكم تجربتى الشخصيه مع الموضوع ده و ازاى غير حياتى 180 درجه . فى اول سنين الجامعه انا كنت تافهه جدا ومضيع كل وقتى ومجهودى وحماسى فى مجالات كتير زى " السياسه – الكوره – الفن – الاغانى " وكنت ديما باصص على عيوب البلد و الناس وغافل  تماما عن عيوبى و تطويرى من نفسى وانى معنديش اى مهارات .

لحد ما سمعت النصيحه دى :
" اغلب الشباب بيضيعو 95% من وقتهم فى الكوره والسياسه وشاغلين نفسهم بعيوب البلد وبينتقدو من غير ما يقدمو حاجه , لو عايز تفيد نفسك و المجتمع وبلدك خلى 95 % من وقتك ومجهودك لنفسك وتطويرك منها "

وبالفعل عملت كده انعزلت وقطعت صلتى تماما عن كل المجالات دى وقلت انا هعمل بالنصيحه دى واجرب , قعدت مع نفسى وحاسبتها وكتبت كل عيوبى والمهارات اللى محتاجه عشان اطور من نفسى وافيد غيرى , عملت ال3 خطوات السحريه دول 
تخليت عن كل حاجه مرتبطه بالمجالات دى و لغيت اشتراكى فى كل الجروبات او الصفحات المرتبطه بالمجالات دى , وتحليت بعادات مفيده وصفحات ايجابيه وناس شغوفه.
و دى مقالة هتعرفك كل الصفحات المفيدة على الفيس بوك: رابط المقالة

وكانت النتيجه و التجلى انى بقيت شخص تانى خالص بفضل الله عندى نادى القراءه العمليه – عندى الموقع الخاص بتاعى على الانترنت – شغال فى شركه من اكبر شركات الشرق الاوسط فى مجال الديجتال ماركتينج – اقدر اتعلم اى حاجه نفسى فيها – ربنا جعلنى سبب انى افيد شباب كتير وبقيت عايش حياتى باكتر طريقه تخلينى مبسوط وراضى عنها وعايش بشروطى.

كل ده لما عملت بنصيحه سيدنا النبى صل الله عليه وسلم " عليك بخاصه نفسك " و الاعتزال هنا مش معناه انك تسكت عن الباطل او غيره . بس معناه انك متخليش طاقتك كلها تضيع فى حاجات انت مش هتقدر تغيرها الا لما احنا نتغير الاول


" لا يغير الله ما بقوم حتى يغيروا ما بانفسهم "

فلما انا وانت نغير نفسنا ونبقى نموذج ايجابى هنسيب اثر و لو المجتمع كله عمل كده هتلاقى ربنا بدل حالنا لاحسن حال " كما تكونو يولى عليكم "

طب نعمل ايه عشان ننعزل بشكل صحيح و مثمر ؟

هتحتاج حاجه اسمها العزلة الجزئيه :

 بمعنى انك هتخلى ليك مع ربنا وقت , تخلو فيه بربك وتكون انت وربنا بس " زى مثلا قيام الليل " حاول تخلى ولو نص ساعه كل يوم او يوم فى الاسبوع حسب مقدرتك , تقوم بالليل سؤاء فى اول الليل او اخره او قبل الفجر , وتناجى ربنا وتنعزل عن العالم كله , تستغفر او تسبح وتخلى ليك ورد يومى مع الله بس تنعزل فيه عن الدنيا كلها , كلنا بنحتاج العزله الجزئيه دى و ننسى الدنيا ونركز مع نفسنا وعيوبنا وندوق اعلى لذه ممكن يدوقها الانسان فى حياته " لذه مناجاه الله والقرب منه ومعرفته "

العزلة المنتصفه :

 بمعنى انك تختلط بالناس عادى جدا سؤاء فى الدراسه او فى صلاه الجماعه او فى شغلك بقدر الحاجه الى الاختلاط وبعد كده تنشغل بتهذيب نفسك , بمعنى عملى اكتر هتقل اختلاطك بالناس الا على قدر الحاجه فقط  وده فى حاله لو انت حاسس انك ضعيف واختلاطك بيهم هيضرك او هيضيع وقتك فا انت هتعوض الوقت ده فى انك تشغل نفسك بتطويرها او بذكر الله وبالعلم والتفكر او عمل الخير لحد ما نفسك تبقى قويه وتبقى عارف ان اختلاطك بيهم مش هياثر عليك بشكل او باخر.

من الذى تجب عليهم العزلة سؤاء كليه او مؤقته او منتصفه  ؟

الناس اللى وصلو لدرجه من الضعف انهم لما بيختلطو بالناس بيقعو فى المعاصى او بياثرو عليهم بالسلب او بيضرهم بشكل او باخر وهما لسه مش اقوياء كفايه انهم يرفضو يسمعو كلامهم وهنا بتكون عزله واجبه عليك انك تعملها. و انا اول واحد محتاج العزله دى جدا.

وفي عزله مستحبه , بمعنى انك تنعزل مجالس اللغو اللى فيها مضيعه لوقتك , اى حاجه مش هتضيف ليك شئ ايجابى وهتضيع وقتك ..

بس لو انت شخص عندك علم معين هيفيد الناس مينفعش تنعزل ولازم تقدملهم النصحيه او الحاجه اللى انت شاطر فيها , لان حقهم عليك انك تديهم وتعلمهم و تساعدهم فى الحاجه اللى انت شاطر فيها وبعد ما تخلص معاهم ممكن ترجع تنعزل وتطور من نفسك حتى لو نص ساعه يوميا زى ما اتفقنا.

انعزل شويه عن الزحمه و النقاشات اللى ملهاش لزمه و اعطى لنفسك حقها , شوف ايه ناقصك عشان تبقى كويس واكتسب المهارات دى , شوف ايه العاده الوحشه اللى لازم تغيرها و اكتسب عاده جديده .. العزله هتساعدك تفهم نفسك اكتر ومن ثمار فهم النفس هى " الحكمه " ( ومن يؤت الحكمة فقد أوتي خيرا كثيرا )


وافتكر القاعده دى اتعلمتها من سيره سيدنا النبى صل الله عليه وسلم لما هتدفع التمن بانك تتخلى عن حاجات كتير اغلب الناس بيعملها وتنعزل هيحصل معاك الاتى ودى الجمله اللى ختمت بيها اخر ايفنت لنادى القراءه فى جامعه بنى سويف

 " عزله ثم صاحب واحد شبهك هيكون سند ليك ثم صحبه كتير شبهكم ثم عزوه كبيره ".

 ربنا عز وجل بيقول " والذين جاهدوا فينا لنهدينهم سبلنا " هيعينك وياخد بايدك والله بس انت ابدا .

ونختم بمقوله الامام الغزالى فى موضوع التعامل مع الناس " صبر طويل و حلم عظيم و نظر لطيف و استعانه بالله تعالى دائمة "

النصيحه :

كلنا محتاجين العزلة وانا اول واحد فيكم , انشغل بتزكيه نفسك وتطويرها فى سن الشباب جدا , دى احلى مرحله فى حياتك واللى هيتسغلها صح هو اللى هيلاقى مكان فى المستقبل اما اللى هيضيعها فى شكوى فلا يلوم الا نفسه . وفى الاخر القرار ليك ..

 ها قررت ايه ؟!

 متنساش تقرا المقاله دى فى سلسله مقالات واللى هتلاقو فيها عشان تنفذ العزلة بشكل صحيح " ابنى مملكتك وطور نفسك " 

شارك المقال

2 تعليق

جميع الحقوق محفوظة لـ نادي القراءة العملية | تصميم :