تعلم الانجليزية مع مايكل يوسف مجانا - من دبلوم فندقى الى رائد فى اللغة الانجليزية

تعلم الانجليزية مع مايكل يوسف مجانا - من دبلوم فندقى الى رائد فى اللغة الانجليزية
    تعلم الانجليزية مع مايكل يوسف

    مايكل يوسف شاب مصرى كرس حياتة لتعليم اللغة الانجليزية للوطن العربى كله مجانا. 

    وعدناكم اننا هنعمل " حوارات و مقابلات " مع شباب ناجحة فى مصر عشان ننشر الامل لكل شاب مصرى انه يسعى ويطور من نفسة ويسيب اثر فى الدنيا . 

    وقصتنا النهاردة مع شاب مصرى عظيم , اسمة " مايكل يوسف ", عملنا معاه حوار شيق وممتع جدا وسالناه الاسئلة دى :


    • بدأت ازاى ؟ وايه نقطة التحول فى حياتك ؟ 
    • اية التحديات اللى قابلتك فى تعلم الانجليزى وفى حياتك و ازاى تغلبت عليها ؟ 
    • ايه الدروس اللى اتعلمتها خلال رحلتك ؟ 
    • مفهوم النجاح عندك ايه واتعلمت انجليزى ازاى ؟
    • ازاى بتعلم الشباب انجليزى و ايه رسالتك والاثر اللى نفسك تسيبه فى الدنيا ؟
    • نصائح للشباب !

    مايكل يوسف بدا ازاى و نقط التحول فى حياتة ؟ والتحديات اللى قابلتة خلال رحلتة؟


    بدا حياتة فى دبلوم فندقى و اشتغل شغل كتير مؤقت زى انه يكون جرسون , وكان عايش بلا هدف وبيعانى من كل حاجه حتى اقرب الناس ليه ونظرة المجتمع لكونة شخص بيدرس فى دبلوم مش تعليم عالى ! 

    وهنا كانت نقطة التحول الاولى فى حياتة , انه قرر يطور من نفسة ويغير نظرة الناس لية , و بدا فى كلية تجارة بس محبهاش وملقاش نفسة فيها , بعد كده قرر انه يشتغل مبرمج وفى الوقت ده " 2001 " تعليم البرمجة كانت مقتصرة على المهندسين وهو كان معاه دبلوم , وهنا قابل تريقة كتيير جدا سؤاء من أهلة او من الطلبة اللى كان بيدرس معاهم. 

    بس هنا قابلته عقبه جديدة وهى " الانجليزى " اتصدم لما بدا يدرس برمجة ان كل الكتب بالانجليزى , وكان مستواه فى الانجليزى وقتها ضعيف جدا جدا ,  و هنا كانت نقطة التحول التانية فى حياتة و التحدى الجديد اللى تحداة لنفسة وهو انه هيطور من نفسة فى الانجليزى والبرمجة مهما كان الثمن . وبدا يشترى كتب برمجة كتير بالانجليزي , وبدا يذاكر انجليزى اكتر من البرمجة عشان يطور من نفسة فى الانجليزى وقتها مكنش باصص لاى تريقة بيسمعها ومركز مع نفسة وحلمة وبس ومكنش بيخرج من بيتة من كتر المذاكرة لان حلمة مكنش بيخلية يضيع وقت وكان صادق مع نفسة . 

    وبعد سنة ونص بدا يتجلى عليه شخص جديد تماما , بقى شاطر فى الانجليزى والبرمجة و بدا يشتغل ويجيب فلوس من الحاجة اللى بيحبها , وهنا كان وقت نقطة تحول جديدة تماما فى حياتة , فى 2003 بعت مقال لموقع https://www.devarticles.com 

    و المقال كان بيتكلم عن البرمجة و قرا المقال ده اكتر من مليون شخص , وده اللى خلى صاحب الموقع بنفسة يكلم " مايكل يوسف " ويعرض علية انه يكتب مقالات فى الموقع مقابل 100 دولار للمقال الواحد ! 

    وهنا قرر مايكل يوسف انه يتعلم اكتر وياخد 9 شهادات معتمدة من ميكروسوفت فى البرمجة . لحد سنه 2008 وحصل ابتلاء لمايكل يوسف وهو مرض خطير صرف عليه فلوسه كلها تقريبا عشان يتعالج منه و قرا اكتر من 100 كتاب عن الصحة والامراض والابتلاء ده وطريقة تعامل مايكل معاه حولة لميزة ونقطة قوه لانة لما قرا كتب كتير بقى شاطر جدا فى مجال الترجمة الطبية 
    بجانب دراستة فى كلية اداب ترجمة جامعة القاهره فى 2006 لحد 2010 وهنا بدا مايكل رحلة جديدة فى مجال الترجمة و الانجليزى.

    وهنا اخد عهد على نفسة انه يساعد كل الناس انها تتعلم انجليزى وتطور من نفسها وتتحدى الظروف مهما كانت .

    ايه الدروس اللى اتعلمتها خلال رحلتك ؟ 

    لخص مايكل يوسف الدروس اللى اتعلمها فى 3 دروس فقط !

    1. لو اجتهدت بتلاقى
    2. العلم هو البداية و الطريق الصح للنجاح 
    3. الانجليزى هيوصلك لحاجات كتيير جدا

    مفهوم النجاح عندك ايه ؟

    النجاح وتعريفة هو نسبى من شخص للتانى والنجاح بالنسبة لمايكل يوسف لخصة فى جملة واحدة فقط

    " النجاح انك تشتغل فى مجال بتحبة وتكون مبسوط فيه وتروح بيتك اخر اليوم راضى ومبسوط " 

    وده اللى بنحاول نقولة لكل شاب فى مصر من خلال نادى القراءة العملية , انك لما هتطور من نفسك وتشوف نقط القوة عندك وتتميز بيها وتعيش بشغف , وتتعلم وتجتهد وتزود قيمتك فى مجالك اللى اختارتة بعيدا عن التنسيق وعن رغبه اهلك هتلاقى بدل الشغل والفرصة مليون فرصة .

    لو تايهه وعايز تعرف شغفك ونفسك اقرا المقالات دى وخد الكورس ده : رابط الكورس 

    ايه رسالتك والاثر اللى نفسك تسيبة فى الدنيا ؟

    رسالة مايكل يوسف والاثر اللى نفسة يسيبة فى الدنيا هو انه يخلى كل الناس تتعلم وتتكلم انجليزى كويس لانة مؤمن ان الانجليزى عامل مهم جدا جدا فى الوقت الحاضر و المستقبل وهو بيحاول يخدم الرسالة عن طريق انه عمل منهج وخطط للمذاكرة عشان تتعلم انجليزى لوحدك من غير كورسات . عمل خطة فى 2014 بس كانت صعبه شوية وبتاخد حوالى سنه , بس اغلب الناس طلبو منة خطة ومنهج اسهل لحد ما قدر انه يعمل خطة اسهل للمبتدئين فى 2016 بتاخد 6 شهور بس واسهل وامتع بكتير من الخطة الاولى 
    واستفاد من المنهج ده اكتر من 100 الف شخص فى الوطن العربى كله و تمت مشاركة الخطط والمناهج الخاصة بمايكل يوسف اكثر من 18 الف مره على الفيس بوك .

    للحصول على الخطة الخاصه ب تعلم الانجليزية للمبتدئيناضغط هنا 

    للاشتراك فى القناه الرسمية لمايكل يوسف : اضغط هنا

    نصائح مايكل يوسف للشباب !

    • متصدقش اى حاجه تسمعها .
    • اوعى تمشى ورا المظاهر لان المظاهر خداعة جدا .
    • اتعلم انجليزى مهما كان السبب . 
    • اجتهد واسعى واتعلم وهتلاقى نتيجة سعيك واجتهادك وهتفرض شروطك على الحياه . 
    • العلم ثم العلم ثم العلم لازم تتعلم كل يوم حتى لو معلومة واحدة .

    ودى كانت مقابلتنا مع أ/ مايكل يوسف  اللى الهمتنا جدا قصته وكفاحه واجتهادة وسعية انه يعلم اكبر عدد من الناس انهم يتعلمو انجليزى  ويطورا من نفسهم ويشتغلو فى مجالات بيحبوها . 

    تحب الحوار الجاى يكون مع مين من الشخصيات الناجحه ؟ 

            Ahmed Sysy
            @مرسلة بواسطة
            كاتب ومحرر اخبار اعمل في موقع نادي القراءة العملية | بوابتك للتعلم الذاتى .

            إرسال تعليق