نادي القراءة العملية نادي القراءة العملية

اتعلم انجليزى بطريقه طبيعيه من غير فلوس " القاعدة السابعة " Power English

نادى القراءه العمليه


- القاعدة الاخيره فى سلسلة مقالات احدث 7 طرق لاكتساب الانجليزى.

هنتكلم فى المقالة دى عن اكبر مشكلة بتواجهنا كلنا , وهى اننا بنفكر بالعربى الاول ونقعد نترجم لانجليزى ونرتب الجمل وكل ده بياخد وقت كبير وفى الاخر مش بنقدر نخرج جمل صحيحة وسريعة .

ولكن القاعده او الطريقة اللى هنشرحها النهاردة هتخليك تفكر بالانجليزى ;) باستخدام طريقة وقاعدة مهمة جدا ودى اهم و اقوى قاعدة فيهم كلهم اسمها :

  "USE LISTEN AND ANSWER STORIES "


قبل ما نشرح الطريقة , خلينى اقولك ان كلنا نفسنا نتكلم انجليزى بطريقة طبيعية و بتلقائية من غير ما نفكر او نتردد . وده اسمة " Fluency " يعنى إتقان او طلاقة.

وعشان نوصل للمستوى دى لازم لازم نفكر بالانجليزى مش بالعربى.

كام مره حاولت تتكلم بسرعة ومش بتقدر عشان الموضوع مرهق جدا وبتاخد وقت لحد ما تترجم من عربى لانجليزى وبعدين من انجليزى لعربى .! :(

جربت كل الطرق بتاع المدرسة و الكورسات وبردو بتفكر بالعربى الاول ؟! :(

تعالو الاول نفتكر ايه هى الطريقة القديمة اللى اتعودنا عليها فى المدرسة...

بتقعد فى فصل فى طلبة كتير , مدرس واقف بيشرح ويكتب قواعد وكلمات وترجمة على السبورة وانت بتسجل فى الكشكول بتاعك اللى بتشوفه بعينيك , بتتعلم بعينك مش بودانك

مع ان الصح زى ما اتفقنا فى الطريقه رقم 3

- اننا نتعلم بودانك مش بعينيك اقرا المقاله من هنا

وبعد كده يقولك افتح كتاب الورك بوك صفحة 15 تمرين 2 . ونقعد نقول الملون ولا العادى  . وبعد كده يقولك المدرس "Listen and Repeat after me " قول وكرر ورايا , وطبعا النطق بتاع اغلب المدرسين بيكون زى ميس ميرفت او انشراح .

يلا قولو ورايا يا ولاد " Hi, How are you " وطبعا دى طريقة مملة جدا وبتخليك تكرر من غير ما تفكر حتى وبتفضل طول عمرك تفكر بالعربى مش بالانجليزى..

معلش فكرتكم بالجرح القديم .


طب ايه الحل ؟ الحل فى القاعدة والطريقة بتاع النهاردة

  "USE LISTEN AND ANSWER STORIES "


ببساطه دى عباره عن قصص اتعملت باحترافية جدا جدا عشان تساعدك تفكر بالانجليزى وتفهم اى انجليزى تسمعه وتتكلم بسرعة جدا من غير تفكير.

تعالو بقى نشرح القاعدة , باختصار المدرس بيسألك القصة مش بيحكيهالك .!

ايه الكلام الغريب ده ؟

تعالو ناخد مثال علشان الصوره توضح اكتر ..

تخيل معايا دلوقتى مدرس انجليزى واقف بيحكى قصة بالطريقة القديمة .

" There was a boy, his name was Ahmed, and he was playing football ... "

ويكمل القصة عادى وانت قاعد بتسمع بس مش بتفكر وبتزهق بسرعة وممكن تنام او تلعب فى الموبايل او غيرة .

طب تعال معايا نتخيل الطريقة الحديثه بقى , المدرس هيبدا يسأل القصه قبل ما يحيكها.

- What was there ؟

- انت بقى هتفضل تفكر , وتخمن الاجابة لحد ما المدرس يقولك .

-There was a boy. ويسالك تانى بعد ما قالك الاجابة بقى . What was there?

- وقتها انت هترد بكل ثقه وتقول . ايوه صح زى ما جاوبت دلوقتى قبل ما انا اصلا اكتبلك الاجابة . There was a boy .

- المدرس يكمل القصة ويقول . His name was Ahmed . ويسالك بقى What was his name ?

- الله ينور عليك بدات تدرب عقلك يفكر بالانجليزى اهو , والاجابه هتقولها بكل ثقة وسهولة . His name was Ahmed .. وهكذا لحد اخر القصة ..

مش ملاحظ حاجه ؟ انك بدات تفكر بالانجليزى وكمان بتقول الجمل بجرامر صح ;) ما بالك بقى لما تسمعها من مدرس امريكى بينطق صح 100% تخيل نطقك هيكون عامل ازاى ؟ ^_^

- هى دى بقى باختصار طريقة "USE LISTEN AND ANSWER STORIES "

طريقة بتخليك تفكر بالانجليزى وتدرب عقلك انه يفكر ويرتجل ويفهم انجليزى بسهولة و اتقان . لانك بتسمع جمل كتير سهلة من قصص ممتعة ومفيدة ومش هتزهق منها وبتجاوب عليها وطبعا هيفيدك فى الجرامر والنطق والتعلم بعمق اللى هى القاعدة الرابعة .

وكده اقدر اقولك الف مليون مبروك انت خلصت احدث 7 طرق لاكتساب الانجليزى .

دلوقتى جه دورك بقى لو عايز نتيجة مختلفه لازم تعمل حاجات بطريقة مختلفة . بمعنى انك لو نفسك تطور الانجليزى بتاعك يبقى لازم تغير الطريقة القديمة اللى بتستخدمها من زمان ومجبتش معاك اى نتيجة كويسة غير انها كرهتك فى الانجليزى . ولو كملت بنفس الطريقة القديمة هتوصل لنفس النتيجة و المستوى اللى انت عليه دلوقتى لو انت مبسوط بمستواك دلوقتى خلاص كمل زى ما انت بالطريقة القديمة . اما لو انت فعلا مش مبسوط بمستواك ونفسك تتحسن يبقى لازم تتعلم بطريقة مختلفه عشان توصل لنتيجة جديدة.

دلوقتى دورك انك تاخد خطوه وتطبق ال7 طرق وتسمع كتير وتصبر مع اللغة.

وساعتها هتلاقى مستواك بقى احلى بكتيرر من زمان وعن تجربة. ;)

الطريقه الاولى  : ازاى تحفظ كلمات الانجليزى ومتنسهاش . "احفظ جمل مش كلمات " .
الطريقة التانيه : زهقت من كتر ما بتذاكر الجرامر ومش عارف تستخدمه. الطريقه دى هتحل المشكله .
الطريقة الثالثة : اتعلم بودانك مش بعينيك. بس بشروط اعرفها من المقالة دى .
الطريقة الرابعة : ازاى اتقن اللى بسمعه وانطق صح . طبق القاعدة دى وادعيلى  .
الطريقة الخامسة : ازاى اتعلم جرامر من غير ما اذاكرة. ! 
الطريقة السادسة : ايه نوع الماتريل اللى اذاكرها .؟


- لو عندك اى سؤال او استفسار اكتبه فى كومنت .

بالتوفيق ليكم جميعا

- المصدر:


التعليقات



جميع الحقوق محفوظة

نادي القراءة العملية

2016