‎ بوابتك للتعلم الذاتى

أسرار تعليم اللغة الانجليزية بالطرق الحديثة + كورس انجليزى مجاني

أسرار تعليم اللغة الانجليزية بالطرق الحديثة + كورس انجليزى مجاني
يحتوي هذا الموضوع على:
    تعلم الانجليزية
    أكيد نفسك تتعلم انجليزى وتتكلم زى الأجانب، وتفهم طريقة كلامهم السريعة، وتقدر نفهم اى فيلم من غير ترجمة. وعشان توصل للمستوى الجميل ده يبقى لازم تغير الطريقة القديمه اللى اتعلمت بيها انجليزى خالص، فتح مخك معايا بقى وركز فى اللى جاى..

    هقولك في المقالة دي أسرار تعلم الانجليزية، هتخليك تعشق الانجليزى ويكون أسلوب حياة.

    أسرار وقواعد تعلم الانجليزية بالطرق الحديثة:

    السر الأول والقاعدة الأولى: تعلم جمل وعبارات!

    1- تعلم جمل وعبارات، اوعى تحفظ كلمات فردية لوحدها. "Learn English phrases, not individual words"

    طبعا دى قاعده غريبه شوية، ومختلفة عن الطريقة اللى متعودين عليها في المدارس اننا نحفظ كل كلمة لوحدها، ونفضل نكررها كتير في كشكول خارجى، ونحفظ كلمات كتير وكلنا ما شاء الله ايام ثانوى كان عندنا حصيلة كلمات كثيرة جدا، ولكن بعد الامتحان بتنسى كل الكلمات دى ومش بتعرف تستخدمها.

    ناخد مثال على الطريقة القديمة الغلط: زى كلمة "Hate" نفترض ان دى كلمة جديدة عليك وانت عايز تحفظها، لو بالطريقة الغلط بنفضل نكرر الكلمة ونشوف معناها بالعربى "يكره" ونكتب hate يعنى يكره حوالى 50 مره 😅

    تعالوا بقى نشوف على الطريقة الجديدة، وقدامك الجملة دى "John hates Ice-cream" وانت عايز تحفظ كلمة hate. هتيجى هنا تطبق القاعده الجديده وتحفظ الجملة كلها. وهتبحث عن معنى الكلمة في القاموس الانجليزى الأول عشان ده هيزود معرفتك باللغة اكتر و فهتلاقى معناها "Does not like"

    طب ايه فايدة القاعده دى انى احفظ الجملة أو العبارة كلها؟

    1. العبارة أو الجملة بتديك معنى:

    لأنها بتكون جوه قصص فبيكون سهل على العقل أنه يفتكرها. زى الجمله اللى ذكرناها فوق " John hates Ice-cream" لما تحفظ العبارة كلها هتفتكر القصه كلها وهتفتكر مين "جون" وهتفتكر انه مكنش بيحب الايس كريم.

    2. بتتعلم قواعد اللغة وازاى تستخدم الكلمة دى صح طبيعى وتلقائى من غير مجهود:

    ولما تيجى تكتب الجملة في الامتحان هتكتبها صح "John hates Ice-cream" انما لو حفظت الكلمة لوحدها هتلاقى نفسك بتكتبها زى ما حفظتها hate من غير ما تضيف ال S وهنا بتعمل غلطات من غير ما تحس لانك حفظتها غلط، انما لو حفظتها في جملة هتكتبها صح بالقاعدة اللغوية وهتستخدامها صح.

    افتكر دايما القاعده الاولى دى وابدء ذاكر واتعلم بيها، احفظ جمل وعبارات مش كلمات فردية، وهتلاقى الجرامر بتاعك اتحسن وهتعرف تستخدم الكلمات صح ومش هتنساها لانها دخلت عقلك جوه قصه بتحبها.

    الخطوة العملية: هات نوت بوك و قلم و كل ما تقابلك كلمة جديدة احفظها بالطريقة الجديدة.

    القاعدة الثانية والسر رقم 2 "أوعى تفكر فى قواعد اللغة":

    "Don't study grammar rules"
    واحنا فى المدرسة كان دايما يتقالنا ذاكروا القاعدة دى واحفظ القاعدة دى في المدرسة او الجامعة او حتى الكورس. وده من اكبر الاسباب إلى بتكرهنا فى اللغة وتحسسنا انها صعبة مع انها مصنفة انها اسهل لغة.

    سؤال يثبت ان الطريقة دى مش صح هل تعلم القواعد بالطريقة دى علمك قواعد اللغة هل بقيت بتتكلم إنجليزى زى العربى وأنت بتتعلم الانجليزى بطريقة ميس مرفت مع ان ليك سنين بتتعلم؟

    طيب ليه مش بتتكلم إنجليزى؟

    لأن وأنت بتتعلم بالطريقة دى تركيزك كله بيبقى على تحليل اللغة اكثر من ممارستها، والطريقة دى كويسة لو انت بتكتب لأن عندك وقت تفكر فى القاعدة قبل ما تكتبها لكن لو انت بتتكلم مش هتلاقي وقت للتفكير وإلا هتبقى بطئ جدا فى الكلام.

    طيب انا عايز اتكلم إنجليزى زى العربى.. مش ده السؤال الصح، المفروض السؤال يكون "ازاى متحدثي اللغة الاصليين بيتعلموا قواعد اللغة؟"

    المتحدث الاصلى للإنجليزى مبيتعلمش قواعد اللغة إلا علشان يستخدمها في الكتابة. أومال ازاى بيتكلم إنجليزى بطلاقة وانا مش قادر أتكلم أصلا!

    هقولك بالظبط زى ما حضرتك اتعلمت العربى وانت صغير محدش جه و علمك قواعد النحو و إلا كنت هتكرها ومش هتتعلم بردو لكن انت قعدت تسمع العربي كتير جدا و بعدين لما كبرت نطقت و هى دى بالظبط الطريقة إلى هنتعلم بيها إلانجليزى انك تسمع و تقرا إنجليزى صح كتير جداً.

    متقراش كتب قواعد الانجليزى اقرا كتب بسيطة و سهلة فى البداية وهكذا الاستماع متسمعش حاجات صعبة اسمع حاجات سهلة ومفهومة. وبعد كده ذاكر جرامر براحتك لانه مهم جدا.

    طيب ايه ده اومال هنتعلم قواعد اللغة ازاى من غير ما نذاكرها؟ ده هتجاوبك عليه القاعدة الثالثة

    القاعدة التالتة والسر رقم 3: "استمع أولا"

    دى أهم قاعدة فى قواعد تعلم إلانجليزى علشان تتعلم صح بلاش تقرأ كتب، اسمع إنجليزى سهل ومفهوك كتير الأول علشان متزهقش و تتعب لاننا قولنا هنتعلم بطريقة طبيعية وممتعة.

    يعنى هتتعلم إنجليزى بودنك مش بعيونك زى ما كنت بتتعلم ف المدرسة.

    "Learn with your ears, not with your eyes"

    لما اتعلمنا فى المدرسة كنا بتعلم عن طريق الكتب الدراسية الممله، ولما كنا بنسمع انجليزى كان بيكون قليل جدا وبنطق غلط زى "مس ميرفت الشهيره" فعشان كده لما بنتكلم انجليزى بيكون تلوث مش انجليزى.

    وفى جمله بتقول: "To speak well, you must listen a lot" عشان تتكلم كويس لازم تسمع كتيرر.

    ولكن فى شروط لازم تكون موجوده فى اى حاجه هتسمعها عشان تسمع صح.

    3 شروط أساسية لاي حاجة هتسمعها بالانجلش:

    1. مفهوم وسهل 
    2. ممتع 
    3. التكرار: كرر الى بتسمعه كتييييييييييييير.
    مهارة الاستماع تعتبر مفتاح سحرى عشان تتكلم كويس، ولما تسمع كتير مش بس هتحسن النطق، أنت كمان هتزود حصيلتك اللغوية، وزى ما اتفقنا لو قابلتك كلمه جديده هتحفظها فى جمله او عباره مش كلمه لوحدها.

    لازم تسمع انجليزى تكون فاهمه لأنك لو مفهتمش يبقى متعلمتش اى حاجة، وهتكون حافظ مش فاهم،
    ثانيا لازم يكون ممتع بالنسبالك يعنى اسمع لحاجات بتحبها ممكن برامج طبخ - ماتشات - أغانى - أفلام - كتب صوتية.. إلخ
    المهم يكون ممتع بالنسبالك عشان تقدر تحقق الشرط الثالث وهو التكرار.

    الطريقة الـ بنقدمهالك طبيعية بتعتمد على انك تسمع إنجليزى كتير من ساعة ل 3 ساعات في اليوم. علشان تتكلم بطلاقة قضي معظم وقتك وأنت بتسمع صح؛ لأن زى ما بتسمع هتنطق. وافتكر ديما عشان تتكلم انجليزى بشكل صح لازم تسمع انجليزى كتير من اهل اللغه الاصليين ويكون متحقق فيهم ال3 شروط اللى ذكرناها.

    ركز على الاستماع ثم الاستماع ثم الاستماع، بس لا تنسى الشروط.

    الخطوة العملية:
    اختار حاجه سهله تبدا بيها وتسمعها كتير، ممكن قصص صغيرة أو روايات لسن 20 سنة، لو صعبة عليك دور على حاجه اسهل زى قصص الاطفال وهكذا. واشترى هاند فرى جديد وحمل الدروس على الموبايل بتاعك واسمع انجليزى ممتع كل يوم فى اى وقت على الهاند فرى بتاعك. 

    القاعدة الرابعة والسر رقم 4: التعلم بعمق & "Deep learning"

    يعني ايه التعلم بعمق؟

    يعني انت لو سمعت الكلمة أو الجملة مرة أو اتنين كدة انت متعلمتهاش وهتنساها، وهيبقي صعب عليك تستخدمها في حياتك أو تنطقها صح..

    طيب اعمل ايه؟

    الحل في انك تكرر السماع كتير جدا 30 مرة علي الاقل و طبعا ده ال احنا متعودناش عليه في المدرسة الى بتعلمك كل يوم قاعدة جديدة و كلمات جديدة من غير ما نكررها علشان كدة بننساها و بيبقي صعب علينا نستخدمها.

    علي سبيل المثال يعني لو انت عندك دروس صوتية بتسمعها مطلوب منك تسمع كل درس 30 مرة علي الاقل، طبعا اكيد بتقول ان 30 مره كتير اوى، ازاى هقدر اسمع نفس الدرس 30 مره، الحل في تطبيق القاعده التالته وهتعرف ازاى تقدر تسمع الدرس اكتر من 30 مره كمان.

    وبعد كده تبدء فى الدرس الى بعده كل يوم تسمع مرتين لمدة اسبوعين، ولو لسة صعب عليك تنطق كرره اسبوع كمان او اتنين

    لحد ما تنطق الدرس زي ما بتسمعه، ولما تنطقه كدة أنت اتعلمته بعمق وعمرك ما هتنساه، وهتقدر تستخدمها في اي وقت حتي لو كنت عارف كلمات الدرس وحافظها بردو كررها لان حفظك ليها مش معناه انك بتنطقها صح. وطبعا وانت بتسمع لو قابلت كلمه جديده اتعلمها بالطريقه الحديثه اللى شرحناها فى القاعدة الأولي.

    مثلا لو انت هتتعلم الماضي البسيط فانت هتسمع ال point of view، هنتكلم عنها في باقي المقالة. ودي عبارة عن دروس من خلالها بتتعلم قواعد اللغة بطريقة طبيعية من غير ما تذاكرها. 

    و لما تكررها كتير جدا القاعدة، وكلمات الدرس هتثبت في عقلك من غير ما تذاكر وتحفظ أو تعمل مجهود كل ال هتعمله انك هتسمع الدرس كتير جدا، وتكرره لمدة اسبوعين او اكتر لحد ما يثبت في عقلك. وهى دى الطريقه الطبيعيه اللى هتكتسب بيها اى لغه فى الدنيا.

    نصيحة مهمة:
    حاول تطبق قاعده التعلم بعمق فى كل حاجه عايز تتعلمها مش بس الانجليزى، لو قدرت تطبق القاعده دى فى كل حاجه بتتعلمها فى حياتك هتلاقيك اتقنتها جدا.

    الخطوة العملية: اتعلم بعمق من تكرار سماع الدرس 30 مرة او اكتر لحد ما تنطقه زي ما سمعته.

    القاعدة الخامسة والسر رقم 5: ازاى تتكلم بجرامر صحيح من غير ما تذاكر جرامر! 

    القاعدة دي فعالة جدا ومن أسهل الطرق الى تخليك تتعلم إنجليزي بسهولة وكنا إتكلمنا عنها سريعا في القواعد ال قبل كدة، وجه الدور عليها علشان نتكلم عنها.

    طيب ايه هي القاعدة دي؟
    هي عبارة عن قصة مسموعة بيحكيها المتحدث في أوقات مختلفة مرة في الماضي ومرة في المضارع ومرة فى المستقبل ومع تكرار سماعك ليها بتثبت القاعدة معاك من غير ما تعمل مجهود ف مذاكرتها أو حفظها.

    مثال:

    انا بكتب المقالة دي دلوقتي و هحكي قصة في الوقت الحالي:

    Sara does very well on grammar tests. She knows all of the grammar rules. She knows English verbs.

    دلوقتى نحكي نفس القصة بس في الماضي حاجة حصلت وعدى عليها وقت خلاص:

    Sara did very well on grammar tests. She knew all of the grammar rules. She knew English verbs.

    ونحكيها ف المستقبل كمان:

    Sara will do very well on grammar tests. She will know all of the grammar rules. She will know English verbs.

    النوع ده من القواعد معمول علشان يعلمك قواعد الإنجليزي تلقائي بس فيه حاجات انت ملتزم بيها علشان تحصل على النتيجة المطلوبة.

    متفكرش في القاعدة وجات منين، واتقالت كدة أزاي الطريقة دي انت بتتعلم بيها ليك سنين بس أنت مش بتعرف تتكلم لان دي طريقة تحليلية بيهتم بيها الناس الي هتعلم اللغة مش ال بيتعلموا.

    لو انت هتعمل اختبار فى قواعد الإنجليزي هتجتازه بامتياز لو اتعلمت بالطريقة التقليدية، لكن لو عايز تتكلم صعب بالطريقة دي؛ لان عقلك هيقف، ويقعد يفكر استخدم قاعدة ايه؟ فتنطق غلط مع الحيرة لكن لو اتعلمت بقاعدة النهاردة انت هتنطق اللي سمعته تلقائي من غير ما عقلك يفكر في القاعدة.

    اسمع القصص افهم الكلمات لاحظ تغيير المصطلحات من زمن لاخر لان النوع ده من الدروس بيحكيلك نفس القصة بنفس الكلمات مع تغيير الزمن.

    الخطوة العملية:تسمع قصص كتيره بنفس الاحداث بس في ازمنة مختلفة من غير ما تفكر في القاعدة لاحظ بس التغيير.

    القاعدة السادسة والسر رقم 6: "Use real English materials"

    القاعدة دى بتطلب منك أنك تستخدم منهج صح وأنت بتتعلم إنجليزي أياً كان سنك فانت ليك على الاقل 4 سنين بتتعلم انجلش بس أنت لسة عندك مشكلة في انك تتكلم إنجليزي زى متحدثين اللغة الاصليين؛ وده بسبب انك مش بتستخدم منهج صح.

    انت لما بتستخدم كتب المدرسة انت بتذاكر الكتاب مش بتذاكر إنجليزي، وده مش هيساعدك انك تتكلم، اللي هيساعدك فعلا انك تتعلم إنجليزي نستخدمه في يومنا في المحادثات بنسمعها في الأفلام، والأغانى كدة أنت هتقدر تفهم المتحدثين وتقدر تتكلم زيهم كمان.

    طيب المناهج دى اعرفها ازاى؟؟ هقولك..

    1\ لما تيجى تقرا متقراش الكتب المدرسية اقرا قصص قصيرة سهلة وممتعة لأن الكتب دى مش مفيدة، ومش هتعلمك اللي أنت محتاجه. اقرا قصص مغامرات أو أى حاجة بتحبها، ولو مقدرتش تفهم انزل بمستوي القصص يعنى هتجيب قصص ل 15 سنة لو لقيتها صعبة اقرا قصص ل 10 سنين و هكذا لحد ما تفهم ال بتقراه.

    2\ لما تيجى تسمع هتطبق نفس الكلام هتسمع قصص قصيرة و ممتعة و اهم حاجة تكون فاهم اللي بتسمعه علشان تنطقه صح وبلاش تسمع كلام معقد ومش بنستخدمه فى الكلام في أول ما تبدء علشان مش هتكمل. وركز اكتر ع الاستماع لانه بيمثل 80% من عملية تعلمك للغة.

    3\ استخدم مجلات وصحف يومية، اتفرج على أفلام اجنبي، اسمع أغاني، وتكون بردو مفهومة ليك لان هو ده اللي انت بتستخدمه فى محادثاتك اليومية.

    بعد ما تستخدم المنهج الصح 6 شهور هتكون قادر انك تفهم متحدثين الغة الاصليين، وكمان هتقدر تتكلم زيهم وطبعا مع تطبيق باقى القواعد باذن الله.

    وهتلاقى قصة نجاح فى اخر المقالة لطلبة اتعلمت من الكورس ومستواهم فى الانجليزى اتحسن جدا.

    الخطوة العملية:ارمى كتب المدرسة او الكورسات اللى ملهاش لزمة و ابتدئ استخدم مناهج صح.

    القاعدة والسر رقم 7: أزاى تحل مشكلة التفكير بالانجليزي وتتكلم بطلاقة زى الأجانب!

    أكبر مشكلة بتواجهنا كلنا، وهى اننا بنفكر بالعربى الأول ونقعد نترجم لانجليزى ونرتب الجمل، وكل ده بياخد وقت كبير وفى الاخر مش بنقدر نخرج جمل صحيحة وسريعة.

    ولكن القاعده أو الطريقة اللى هنشرحها النهاردة هتخليك تفكر بالانجليزى بإستخدام طريقة وقاعدة مهمة جدا، ودى أهم وأقوى قاعدة فيهم كلهم اسمها:

    "USE LISTEN AND ANSWER STORIES"

    قبل ما نشرح الطريقة، خلينى اقولك ان كلنا نفسنا نتكلم انجليزى بطريقة طبيعية وبتلقائية من غير ما نفكر أو نتردد. وده اسمه "Fluency" يعنى إتقان او طلاقة. وعشان نوصل للمستوى دى لازم لازم نفكر بالانجليزى مش بالعربى.

    كام مره حاولت تتكلم بسرعة ومش بتقدر عشان الموضوع مرهق جدا وبتاخد وقت لحد ما تترجم من عربى لانجليزى وبعدين من انجليزى لعربى!

    جربت كل الطرق بتاع المدرسة والكورسات وبردو بتفكر بالعربى الأول؟

    تعالوا الأول نفتكر ايه هى الطريقة القديمة اللى اتعودنا عليها فى المدرسة...

    بتقعد فى فصل فى طلبة كتير، مدرس واقف بيشرح ويكتب قواعد وكلمات وترجمة على السبورة وأنت بتسجل فى الكشكول بتاعك اللى بتشوفه بعينيك، بتتعلم بعينك مش بودانك.

    مع ان الصح زى ما اتفقنا فى الطريقه رقم 3: اننا نتعلم بودانك مش بعينيك.

    وبعد كده يقولك افتح كتاب الورك بوك صفحة 15 تمرين 2. ونقعد نقول الملون ولا العادى. وبعد كده يقولك المدرس "Listen and Repeat after me " قول وكرر ورايا، وطبعا النطق بتاع أغلب المدرسين بيكون زى ميس ميرفت او انشراح.

    يلا قولو ورايا يا ولاد "Hi, How are you" وطبعا دى طريقة مملة جدا وبتخليك تكرر من غير ما تفكر حتى وبتفضل طول عمرك تفكر بالعربى مش بالانجليزى..

    معلش فكرتكم بالجرح القديم.

    طب ايه الحل؟ الحل فى القاعدة والطريقة بتاع النهاردة

    "USE LISTEN AND ANSWER STORIES "

    ببساطه دى عباره عن قصص اتعملت باحترافية جدا جدا عشان تساعدك تفكر بالانجليزى وتفهم اى إنجليزى تسمعه وتتكلم بسرعة جدا من غير تفكير.

    تعالو بقى نشرح القاعدة، باختصار المدرس بيسألك القصة مش بيحكيهالك!

    ايه الكلام الغريب ده؟

    تعالو ناخد مثال علشان الصوره توضح اكتر.

    تخيل معايا دلوقتى مدرس انجليزى واقف بيحكى قصة بالطريقة القديمة.

    "There was a boy, his name was Ahmed, and he was playing football ... "

    ويكمل القصة عادى وانت قاعد بتسمع بس مش بتفكر وبتزهق بسرعة وممكن تنام أو تلعب فى الموبايل..

    طب تعال معايا نتخيل الطريقة الحديثه بقى , المدرس هيبدء يسأل القصه قبل ما يحيكها.

    - What was there؟

    - انت بقى هتفضل تفكر، وتخمن الاجابة لحد ما المدرس يقولك.

    -There was a boy. ويسالك تانى بعد ما قالك الاجابة بقى . What was there؟

    - وقتها انت هترد بكل ثقه وتقول: ايوه صح زى ما جاوبت دلوقتى قبل ما انا اصلا اكتبلك الاجابة . There was a boy.

    - المدرس يكمل القصة ويقول: His name was Ahmed . ويسالك بقى What was his name ?

    - الله ينور عليك بدأت تدرب عقلك يفكر بالانجليزى أهو، والاجابه هتقولها بكل ثقة وسهولة. His name was Ahmed .. وهكذا لحد اخر القصة ..

    مش ملاحظ حاجه؟ انك بدأت تفكر بالانجليزى وكمان بتقول الجمل بجرامر صح! ما بالك بقى لما تسمعها من مدرس امريكى بينطق صح 100% تخيل نطقك هيكون عامل ازاى؟

    - هى دى بقى باختصار طريقة "USE LISTEN AND ANSWER STORIES "

    طريقة بتخليك تفكر بالانجليزى وتدرب عقلك انه يفكر ويرتجل ويفهم انجليزى بسهولة واتقان. لانك بتسمع جمل كتير سهلة من قصص ممتعة ومفيدة ومش هتزهق منها وبتجاوب عليها وطبعا هيفيدك فى الجرامر والنطق، والتعلم بعمق اللى هى القاعدة الرابعة.

    وكده اقدر اقولك الف مليون مبروك انت خلصت احدث 7 طرق لاكتساب الانجليزى.

    دلوقتى جه دورك بقى لو عايز نتيجة مختلفه لازم تعمل حاجات بطريقة مختلفة. بمعنى انك لو نفسك تطور الانجليزى بتاعك يبقى لازم تغير الطريقة القديمة اللى بتستخدمها من زمان ومجبتش معاك اى نتيجة كويسة غير انها كرهتك فى الانجليزى. ولو كملت بنفس الطريقة القديمة هتوصل لنفس النتيجة، والمستوى اللى انت عليه دلوقتى لو انت مبسوط بمستواك دلوقتى خلاص كمل زى ما انت بالطريقة القديمة. اما لو انت فعلا مش مبسوط بمستواك ونفسك تتحسن يبقى لازم تتعلم بطريقة مختلفه عشان توصل لنتيجة جديدة.

    دلوقتى دورك انك تاخد خطوه وتطبق ال7 طرق وتسمع كتير وتصبر مع اللغة.
    وساعتها هتلاقى مستواك بقى احلى بكتيرر من زمان وعن تجربة.

    طبعا أكيد هتسأل عن الكورس المجاني اللي هيساعك في تعلم الانجليزية بطلاقة وتطبيق كل القواعد والأسرار دى.
    هتلاقي الكورس بتحميل مجاني من هنا:  أفضل كورس انجليزى مجانى - Power English للمدرس رقم 1 فى العالم هتتكلم زى الأجانب!

    يلا مستني ايه؟ ابدء دلوقتي وهنستني تجربتك مع الكورس عشان نحكي قصة نجاحك.

    وتقدر تنضم للجروب الخاص بينا من هنا: اتعلم اللى بتحبه من بيتك مجانا " نادى القراءة العملية.

    Ahmed Sysy
    @مرسلة بواسطة
    مؤسس نادي القراءة العملية، ومتخصص فى صناعة المحتوى، وتحسين محركات البحث "SEO" أسعى لمساعدة مليون شاب لبداية رحلة التعلم الذاتي
    1. الفكرة ممتازة وانا كنت بسال عن كورسات body language ممكن وياريت تكون فرى من فضلكم اشكركن ومجهدد اللهم اجعلة في ميزان حسناتكم

      ردحذف
      الردود
      1. ربنا يكرمك .. باذن الله هنبحث ولو لقينا هنبعتلك .. بس يفضل تدخل علي موقع يوديمي وتبحث هتلاقي كورسات واختار الانسب ليك

        حذف
    2. الله ينور المقال تحفة جدا

      ردحذف
    3. ليه مش بيحمل من تاني ريكورد بيقولي مش هينفع أحمله

      ردحذف
      الردود
      1. جربي تحملي من الرابط ده
        https://www.facebook.com/groups/1448170135228609/permalink/1911912148854403/

        حذف