القائمة الرئيسية

الصفحات

افضل مجالات العمل على الانترنت في 2020 وما بعدها + (مصادر للتعلُم)


بتسأل نفسك ايه افضل مجالات العمل على الانترنت؟

فى المقال ده هتلاقي الاجابة ومش بس هتعرفهم، كمان هتعرف ازاى تتعلمهم، وتشتغل فيهم من اى مكان وتقبض بالدولار!

خليك متفقين ان مش كل مجالات العمل بنتعلمها من الكلية، فيه بعض المجالات تتقدر تتعلمها أون لاين حتى وأنت معندكش أي خلفية عنها.

التعليم الأكاديمي بتاع الجامعات منقدرش ننكر أهميته، لكن لو بصينا لعصرالتكنولوجيا السريعة اللي احنا عايشينه، والتغييرات في سوق العمل كل فترة، هنتأكد إنه عصر تنمية المهارات. 

وبديهي منقدرش ننمي أي مهارة غير باعتمادنا على نفسنا فقط! مع شويه مساعدة من مصادر لتعليم المهارة أو أشخاص شاطرين ومتخصصين فيها، لحد اللحظة اللي نقدر نقول على نفسنا فيها اننا متخصصين في مهارة معينة لما الناس تحكم على شغلنا فيها. 


وبعد ما تقرأ هتفهم ازاي تحصل على نوعين المساعدة دول سواء المصادر أو تعرف مين الأشخاص المؤثرة في أفضل المجالات دى.

قد يهمك أيضا: اسئلة انترفيو خدمة العملاء (الإجابات المضمونة عشان تتقبل فى الوظيفة)

بس قبل ما تفهم تعالى نتعرف سوا على المجالات اللي تقدر تتعلمها وتشتغل فيها أون لاين، واللي كل فترة هيزيدوا جوا المقال وبما انك أكيد حابب تتعرف عليهم كلهم فأنصحك تحتفظ بالمقال دا.

افضل مجالات العمل على الانترنت 2020


وفى المقال هنا هتلاقي كل المجالات اللى ينفع تشتغل فيها على الانترنت، والمقال هيتجدد باستمرار وهيتم اضافة مجالات جديدة كل فترة.

1- مجال التسويق عبر مواقع التواصل الاجتماعي (Social Media Marketing)


واحد من المجالات اللي أهميتها بتزيد في الوقت الحالي. ولو أنت متعرفش عنه كتير وقررت فجأة تتعلمه، فأكيد عشان شوفت قد ايه أثر في نجاح أو افلاس شركات وبراندات حوالين العالم مش بس في مصر في فترة الحظر اللي عيشناها.

طبعا أول حاجة هتيجي في بالك لما نقول تسويق الكتروني هي السوشيال ميديا، واعتقاد معظم الناس إنها سهلة ودا حقيقي.

كل الموضوع محتاج منك انك تتعلم ازاي تشتغل على السوشيال ميديا صح عشان تقدر تجيب منها نتايج كويسة، والأسهل إنك تقدر تتخصص في موقع تواصل واحد، بمعنى إنك تتعلم ازاي تدير صفحة فيس بوك مثلا أو تتعلم ازاي تعمل إعلانات عليها بس.

ودا يبقى شغلك الأساسي لأن التسويق الالكتروني من المجالات اللي التخصص فيها مطلوب، ودا هيسهل عليك دراستك فيه زيادة.


2- مجال (Copywriting)


الكتابة ليها أصول ومحتاجة خطوات عشان تتعلمها زي ما قولنا في مقال ازاي تكون كاتب محتوى

متخليش الأصول والاستراتيجيات بتاعت الكتابة دي تقلقك من مجال الـcopywriting، لإنه على عكس زمان، مصادر تعلمه بقت كتير، المعتمد منها وغير المعتمد بردو،

يعني مثلا بمجرد ما تطبق الطريقة اللى هتعرفها فى اخر المقال، هتقدر توصل لمصادر ملهاش آخر بتدي نصايح في الcopywriting، وشغلها تعلم كل المبتدئين في الكتابة عموما خاصة الـ copywriting.

وزي ما أنت عارف ان التسويق الالكتروني بيعتمد على التخصص بمعنى أوضح  ان فرص عمله بقت منفصلة عن السوشيال ميديا أو أي مجال في التسويق الالكتروني واللي بالمناسبة تقدر تلاقيها بسهولة، والأحسن من كدا إنه مرتباته كل مدى بتكون كويسة.

والأهم من كل ده انك تقدر تشتغل فى المجال ده من موبايلك، ومش محتاج ادوات اكتر من الكبيبورد أو الورقة والقلم.

باقي المجالات فى الصفحة التالية


3- مجال (SEO) تحسين محركات البحث

من أحسن المجالات وهتقبض منه أعلى المرتبات بالمقارنة مع أي جزء في التسويق الالكتروني. 
مجال الـSEO زي ما هو مجال مهم وبتاخد منه فلوس كتير،

فهو بيحتاج منك تبقى دايما على علم بكل جديد بيحصل سواء في كل حاجة حوالينا من تريندات وغيره، وهو مجال متغير عشان كدا لوأنت ناوي تشتغلفيه، لازم تكون على علم بكل تفصيلة جديدة، ودا شئ ممتع لأي حد بيتعلم لأن شغلها مفيهوش روتين.

4- تصميم المواقع Web design


المجالات اللي زي web design مبقتش منحصرة على خريجين حاسبات ومعلومات، حتى تعلمها مبقاش بياخد وقت يعني مش محتاج تستنى أربع سنين الجامعة،

في ظرف شهورمن دلوقت تقدر تشتغل كمصمم مواقع سواء فري لانسر أو لحساب أي شركة. ومبيختلفش الموضوع كتير في خامس مجال هنتكلم عنه.

5- البرمجة Coding

فيه أكتر من لغة برمجة تقدر تختار منهم واحدة وتتخصص فيها، زي php, java, css.  ومش بعيد تتعلمهم كلهم طول ما أنت شغوف بالمجال وبتحلم تتطور وتقبض مرتب أكبر،

اللي بتحلم بيه دا مش صعب لإن المجال مبقاش تعلمه صعب دلوقت، بوجود المصادر لتعلمه في الأماكن اللي هرشحها لك.


6- تصميم الجرافيكس Graphic design


رحلة قصيرة من تعلم الفوتوشوب والاليستريتور والتدريب عليهم، هتخلي منك مصمم جرافيكس ممتاز بيقبض آلاف وأنت فري لانسر وقاعد في بيتك. 

فرصة زي دي مينفعش تضيع خصوصا إنه من أكتر المجالات المطلوبة للعمل، في أغلب الأحيان مش هتدور على شغل، أنت هتتكعبل فيه.

7- تعديل الڤيديوهات (Video editing)

الحياة دلوقت الناس بتتجه فيها ناحية حاجتين الصور، والڤيديوهات. الدليل على كدا كل مواقع السوشيال ميديا اللي بتتنافس في عرض محتوى ڤيديوهات أفضل من التانية بعد ما كان يوتيوب مستحوذ عليهم، 

ودا طبعا نتيجة للعرض والطلب بما اننا كلنا بنفضل الڤيديوهات على أي نوع محتوى تاني. ودا خبر مهم ليك عشان تبدأ من النهاردة تتعلم ازاي تعدل ڤيديو، تعرف ازاي تعمل مونتاج محترف، وتشتغل أول ما تخلص لحسابك أو لحد من البلوجرز.

مجالات سهلة للعمل عبر الانترنت


8- مجال ادخال البيانات (Data Entry)
9- مجال التعليق الصوتي (Voice Over)
10- مجال التدوين (Blogging)

ازاي تتعلم أفضل مجالات العمل على الانترنت أون لاين مجانا

 بعد ما قررت أنت هتتخصص في أي مجال من اللي فاتوا، نيجي بقى للجزء المحتاجه عشان تبدأ، وبدل ما أرشح لك كورسات بعينها، هرشح لك مواقع تدورعلى الأنسب فيهم ليك، 

ودا لإن في البداية أحسن حاجة إنك تبدأ بكورس يحببك في المجال ومتزهقش منه اللي هيرجع لاختيارك أنت ما دام كدا كدا فيه محتويات كتير لكنها أحيانا مملة.

1- موقع skillshare


من أفضل المواقع للتعليم والتطبيق، ودا لإنه بيضم الناس المحترفة في كل المجالات اللي اتكلمنا عنها وبتقدر تتواصل معاهم بعد نهاية الكورس في مرحلة التطبيق على اللي اتعلمته. 

الموقع باشتراك شهري بيدخلك على كل الكورسات الموجودة عليه مش بس اللي أنت محتاجه. تقدر تعرف عنه أكتر وعن طريقة الدفع من هنا.


ممكن متكونش عارف مفاجأتنا لإن لما تعرف عن الموقع أكتر من خلال اللينك اللي فوق هتكتشف انك تقدر تاخد شهرين مجانا لكل الكورسات من Skillshare، كل اللي عليك تسجل بس بالخطوات الموجودة.

2- يوديمي Udemy


من المواقع السهل تتعامل عليها لإنه بيوفر كورسات مدفوعة بأسعار متفاوتة في بعض الاوقات بتنزل عليها كوبونات خصم، وكورسات مجانية بتلاقيها من خلال عملية البحث السهلة اللي موفرها الموقع. 

ومحتوى الكورسات المجانية ميقلش عن المدفوعة وهتكتشف دا بنفسك لما تشوف التقييمات. وتقدر تسجل على الموقع وتعرف عنه أكتر لما تشوف الڤيديو دا



3- موقع LinkedIn learning


لما موقع خاص بالبحث عن العمل يعمل كورسات، يبقى تتأكد إن الكورسات عملية على أرض الواقع ومش هتضيع فيها وقتك.

فرصة المسارات التعليمية اللي وفرها لينكد ان في مجالات مطلوبة زي Digital marketer و Graphic designer هيقدموا لك الخلاصة.

اتعرف علي LinkedIn Learning والمسارات التعليمية بتاعته  من هنا.


أكتر من طريقة موجودة  للحصول على محتوى كفائته عالية غير الكورسات، عشان تلاقيهم دي حاجة سهلة جدا، الموضوع كله بيتوقف على سر البحث.

المدونات Blogs


إنك تقرأ عن مجالك كل يوم هو دا اللي هيساعدك تطور فيه وتكون محترف فتقبض فلوس أكتر. ومش بس زي ما قولنا في مجال SEO، لا، يستحسن في كل المجالات. وعشان توصل لأحسنها فيه طريقتين:

1.  أكتب في البحث  Blogs: (اسم المجال)

هيظهر لك أفضل المدونات اللي بتنزل مقالات باستمرار عن المجال اللي اختارته، وطبعا المحتوى كله بالإنجليزي ودا هيضمن لك إنه يكون متخصص وهادف.

2.  أكتب في البحث How to become (اسم المجال)

مثال: How to become a graphic designer expert.

ومتنساش في طريق بحثك عن المصادر إنك تدور على يوتيوب، في معظم الأحيان بتلاقي محتوى هادف وهتبقى محظوظ لو لقيته بالعربي كمان.

ايه الخطوة اللى بعد ما تتعلم اى مجال من مجالات العمل على الانترنت؟

ده أهم سؤال هيجي فى بالك فى المرحلة دى، زى ما اتفقنا قبل كدة ان شغل العمر الحر او العمل على الانترنت بشكل عام، بيتطلب وجود مهارة عندك، ودى انت بتكتسبها فى مرحلة التعلُم اللى شرحناها الخطوة اللى فاتت..

بعد ما بتتعلم، تشتغل ازاى بقي؟ 

هنا بيجي دور مواقع العمل الحر، وأسهل موقع تبدأ فيه هو موقع خمسات وموقع منجز، هتقدر تاخد منهم خبرة كبيرة، بعدها هتكون جاهز انك تشتغل على مواقع العمل الحر الاجنبية، زى موقع Up work. 

شرح موقع منجز للربح من العمل الحر




هتلاقي هنا شرح شامل لموقع خمسات وازاى تقدم خدماتك عليه وتحصل على أول عميل: اضغط هنا للمشاهدة

كلامنا عن مجالات العمل على الانترنت مخلصش، لإن المقال هيتجدد كل فترة وهتلاقي فيه مجالات تانية يا هتفيدك يا هت غيرك، عشان كدا متبخلش بمشاركته.

شاركنا فى التعليقات، ايه المجال اللى هتبدأ فيه؟
Nada Zaki
Nada Zaki
كاتبة محتوى تسويقي وإبداعي، مقدمة ومعدة لبرنامج في محطة راديو اون لاين.

تعليقات

3 تعليقات
إرسال تعليق
  1. فين باقي المجال في المقاله

    ردحذف
    الردود
    1. اضغط على الصفحة التالية هتلاقي الباقي

      حذف
    2. هنا
      https://www.prceg.com/2020/08/work-online.html?page=2

      حذف

إرسال تعليق