‎ بوابتك للتعلم الذاتى

تلخيص كتاب قوة العادة - كيف تتخلص من عاداتك السيئة؟

تلخيص كتاب قوة العادة - كيف تتخلص من عاداتك السيئة؟
    تلخيص كتاب قوة العادة

    ملخص كتاب "قوة العادة" "The Power Of Habit"

    للكاتب تشارلز دوهيج

    تانى كتاب معانا فى سلسلة مقالات "تلخيص الكتب هدفها اننا نلخصلك أحسن كتب فى أكتر من مجال، ومن أعظم الخبراء فى مجالات مختلفة تهمنا كلنا. يعنى لو انت مش بتحب تقرأ يبقى لازم تتابع الفقرة دى، وتطبق المعلومات اللى فيها عشان هتوفر عليك كتير.

    وتقدر تشوف ملخص كتاب الأب الغنى والأب الفقير من هنا:
    تلخيص كتاب: الأب الغنى والأب الفقير - كيف تدير أموالك بذكاء؟

    كتاب النهاردا بيتكلم عن قوه العادة ومدى تأثيرها علينا، كل واحد فينا عنده نقطة ضعف عادة سيئة بتأثر عليه فحياته سواء فشغله، فحياته الشخصية، أو حتى على صحته.
    زى مثلا "ملك" مهوسه بفيديوهات اليوتيوب، ممكن تفضل ماسكة التليفون، وتتفرج علي الفيديوهات من أول ما تصحى من النوم لحد ما ترجع تنام تانى، ومن هنا بتلاقي سعادتها. "ملك" بقى عندها عادة سيئة بتأثر عليها، وعلى صحتها: زى انها بتضعف نظرها، أو انها ممكن تتفرج على حاجات تضرها.
    أو مثلا زى صاحبا اللى عنده عادة التدخين، وكلنا عارفين اضرار التدخين، صاحبنا بقى عنده نقطة ضعف بتسيطر عليه، ومش قادر يبطلها، وبيلجألها بحجة ضغوطاته النفسية، ضغوطات الحياة، وأحيانا النسيان، العادة السيئة أثرت عليه فحياته الشخصية، والصحية.
    المهم إن الدراسات اللى قام بها الكاتب بتقول إن 40%  من الناس بتتخذ قرارات بناء على العادات بتاعتها  
    وعشان تغير عاداتك السيئة أو تكون عادات كويسة لازم تفهم يعنى ايه عادة؟

    العادة بتتكون من 3 مراحل:

    • الاشارة  Cue
    • الروتين  Routine
    • المكافأة  Reward
    ولو قدرت تفهم المراحل دى وتربطهم ببعض هتقدر تفهم يعنى ايه عادة، وكمان تقدر تغير العادة بتاعتك!

    1-الاشارة Cue:

    الاشارة هى الحاجة اللى بتحفز الانسان وبتقوله ابدأ العادة دى، سواء كانت فمكان معين أو وقت معين من اليوم، أو الحالة النفسية اللى بتمر بيها أو أفعال الناس اللى حواليك، أو الحاجة اللى بتعملها قبل العادة مباشرة اللى بتحفزك انك تبدأ العادة بتاعتك ، والاشارة دى بتختلف من واحد للتانى

    وأول خطوة فى تغير العادة هو انك تجيب ورقه وقلم، وتكتب الحاجات اللى بتحصلك قبل العادة،
    هل مثلا اصحابك والناس اللى حواليك هما السبب فانك تشرب سجاير، أو مخدارت، أو انك مبتصليش، هل هما السبب؟
    ولا السبب انك قاعد لوحدك، أو قاعد في مكان معين، أو إنك عملت فعل معين خلاك تبدأ العادة دى 
    اكتب كل الحاجات دى وابدأ فكر ازاى هتعزل السبب اللى بيخليك تبدأ العادة السيئة

    2-الروتين  Routine:

    الروتين هو الفعل نفسه، الشئ اللى بتفضل تقرره سواء كانت عادة سيئة أو عادة كويسة، التعود على فعل العادة زى مثلا صاحبنا اللى اتعود يشرب سجاير ,يعنى ببساطه الروتين هو الشئ اللى احنا عاوزين نغيره

    3-المكافأة  Reward:

    هى الشئ اللى بيجبر الواحد انه يعيد الحاجة مره، واتنين، وتلاته، لحد ما تبقيى عادة، والمكافأة هو شعوره بالسعادة من الحاجه اللى بيعملها
    وبعد ما فهمنا المراحل اللى بتتكون منها العادة، لازم تفهم انك عشان تغير أى عادة مينفعش انك تغير الروتين، ديما الناس تقولك عشان تغير اى عادة لازم يكون عندك قوة الارادة، عشان تبطل سجاير، أو عشان تبطل تكون مهوس باليوتيوب أو الفيس بوك
    الدراسات أثبتت ان الناس اللى عندها قوة الارادة بتبقى فرصتها فى النجاح أكتر، بس المشكله أن قوة الارادة لوحدها مش هى الحاجة اللى هتخليك تبطل اى عادة سيئة

    وعشان تغير العادة لازم انك تعزل الاشارة، وانك تغير المكافأة 
    • تعزل الاشارة: 
    اللى بتحفزك وبتخليك انك تبدأ العادة السيئة، سواء كانوا أصحابك، أو المكان اللى أنت فيه، أو الحالة النفسية اللى أنت فيها
    • تغير المكافأة: 
    زى مثلا بدل ما أضيع وقتى بمتابعة الفيديوهات اللى مش هتفيدنى في اليوتيوب إبدا اتفرج، وأبحث عن فيديوهات مفيده تضيف لهاراتى وتحسن من سلوكى وشخصيتى ، وبدل ما أضيع وقتى، وصحتى فى شرب السجاير، ممكن اشترك ف جيم والعب رياضه

    الخاتمة:

    العادات هى اللى بتحركنا، وبتتحكم فينا، ولو قدرت تغير عاداتك السيئة هتقدر تنجح فى حياتك بشكل أسرع.
    أتمنى تشاركنى العادات اللى نفسك تتخلص منها فى التعليقات، وهندور مع بعض على حل ليها.

    ده كان تفريغ لـ ملخص كتاب "The Power of habit - قوة العادات" من قناة جيل يقرأ، مع بعض التعديلات الطفيفة بما يناسب صياغة المقال.

    Rehab Gaber
    @مرسلة بواسطة
    مهتمة بمجال التسويق والتصميم وكل ما يخص التعلم الذاتي وكاتبة خواطر يومية