فقرة تلخيص كتب، فقرة جديدة معانا، هدفها اننا نلخصلك أحسن كتب فى أكتر من مجال، ومن أعظم الخبراء فى مجالات مختلفة تهمنا كلنا. يعنى لو انت مش بتحب تقرأ يبقى لازم تتابع الفقرة دى، وتطبق المعلومات اللى فيها عشان هتوفر عليك كتير.

كتاب النهاردة هو كتاب الاب الغنى والاب الفقير للمؤلف العالم روبرت تى - كيوساكى.

وده واحد من أعظم الناس اللى اتكلمت عن الثقافة المالية، وازاى تكون ثروة وتتعامل مع الفلوس.

يلا بينا نبدأ فى ملخص كتاب الاب الغنى والاب الفقير، قراءة ممتعة ..

كان يا ماكان وفي بلد من البلدان كان في شاب اسمه سرحان.
سرحان كان في آخر سنة في المدرسة والسنة الجاية هيتخرج وخلاص هيدخل الجامعة ويبدأ حياة جديدة، والد سرحان دايمًا كان بيقوله: "المفروض تركز في دراستك عشان لما تتخرج تشتغل في وظيفة تخليك عندك حياة كريمة"
لكن سرحان عنده أحلام كبيرة (زي مثلًا إنه نفسه يسافر ويلف العالم) لكن الأحلام دي عمرها ما هتحصل إلا لو كان عنده فلوس كتير.

سرحان كل ما كان بيقول لوالده إنه نفسه في يوم من الأيام يكون غني، والده كان يزعقله ويقوله: "الغنى ده حاجه وحشه والأغنياء كلهم ناس أشرار و وحشين واوعى تفكر إنك تكون غني في يوم من الأيام" وفي يوم قابل سرحان واحد من صحاب والده غني جدًا، وكان عنده الفضول يعرف إزاي الراجل ده كان غني جدًا بالرغم إن الراجل ده مكانش عنده نفس المؤهلات العلمية اللي كانت عند والده

فسأله سرحان : إزاي أكون شخص غني ؟ إزاي أقدر أجمع فلوس علشان أعمل اللي أنا عايزه؟
الراجل رد عليه وقاله : شوف أنا في الدقايق اللي جايه دي هقولك شوية مبادئ تتبعها عشان تكون غني على المدى الطويل (ولما اتكلم عن المدى الطويل قصدي ١٥ سنة أو ١٠ سنين مش قصدي إنك تكون غني في سنة أو سنتين أو تلاتة ) ا

للي لازم تعمله هنا هو إنك تفكر بخمس مبادئ مهمة، حاجات انا اتعلمتها من كتاب مهم اسمه Rich Dad Poor Dad - الأب الغني الأب الفقير
الكتاب ده كان مهم جدًا بالنسبالي وغير طريقة تفكيري وأنا صغير وساعدني إني لما أوصل للسن اللي أنا فيه ده أكون عندي الحرية المالية - Financial Freedom.

1- أول مبدأ لازم تفهمه هو مبدأ Passive Income - الدخل السلبي:

لو إنت بتشتغل أي شغلانه، فالوقت بتاعك = المرتب بتاعك Time = Money
لكن لو إنت عايز فعلا تكون غني يبقى لازم الوقت بتاعك لا يساوي الفلوس اللي انت بتكسبها، والمفروض انك ماتكنش بتشتغل للفلوس، المفروض الفلوس هي اللي بتشتغل ليك وده معناه انك بتستخدم فلوسك وبتشغلها في حاجات تجبلك ما يسمى بالدخل السلبي، الدخل اللي مش بيحتاج تكون موجود شخصيا علشان تقدر تكسبه

الدخل السلبي هو الأساس علشان تكون شخص غني، وعلشان تقدر تعمل الدخل السلبي يبقى لازم تدير مالك بذكاء وده تعمله عن طريق فهمك للمبدأ الثاني وهو

2- الالتزامات - Liabilities والأصول - Assets:

معظم الناس بتفكر بطريقة الـ
Income الدخل - Expenses النفقات
النفقات هي اللي بتدفعها بشكل يومي، أما الدخل فهو اللي بتاخده بشكل شهري.

لكن في حاجتين مهمين الناس بتغفل عنهم وهم الأصول والالتزامات

الأصول هي الحاجات اللي بتجيب لك دخل بشكل مستمر زي الـ
Businesses المشاريع - Real Estate العقارات - Stocks الأسهم - Bonds السندات - Royalties الملكية الفكرية (زي اللي بتكون عندك لو إنت كاتب كتاب معين)

أما الالتزامات فهي الحاجات اللي بتسحب منك فلوس بشكل مستمر زي مثلا إنك تشتري بيت أو عربية أو موبايل آخر موديل ... إلخ، كل الحاجات دي بتسحب فلوس منك مع الوقت يعني مثلا لو انت اشتريت بيت هتضطر انك تعمل صيانة للبيت، تصلح حاجات، تدفع فواتير مياه وكهرباء
ولو انت اشتريت عربيه هتحتاج انك تعملها صيانه كل فتره او يحصلها حادثة فتحتاج تصلحها وهكذا

كل الحاجات اللي قلتها دي حاجات ممكن تكون انت فاكر انك محتاجها لكنك ممكن تقدر تشتري حاجات أرخص منها أو أصلا ماتحتاجش انك تشتريها.

انت ممكن تكون ماعندكش فلوس كتير دلوقتي حالا لكنك علشان فعلا تكون ثروة على المدى الطويل يبقى لازم تبعد عن الحاجات اللي بتسحب منك فلوس، تبعد عن الالتزامات أو تحاول تقلل من التزاماتك على قد ما تقدر وتحاول تركز انك تستغل كل فلوس انت بتحوشها في الاصول اللي هتجبلك الدخل السلبي على المدى الطويل علشان تقدر فعلا تبقى شخص غني.

3- هو Mind Your Own Business - اهتم بعملك الخاص:

لو انت بتشتغل اجدع شغلانه في الدنيا عمرك ما هتقدر تكون غني، وده مش بإيدك لكن اللي بإيدك فعلا هو انك لازم تعرف انه حتى لو انت في وظيفة وعايز تكون شخص غني يبقى لازم يكون عندك ال own business - العمل الخاص بتاعك.

" Your profession pays the bills, but your business is what makes you wealthy "
" وظيفتك تدفع لك فواتيرك، لكن عملك الخاص هو ما سيجعلك غنيا "

انا مش بقولك تسيب دلوقتي شغلك وتروح تفتح مشروعك الخاص لكنك على الأقل دلوقتي لازم تفكر إزاي تبني مشروعك الخاص مع الوقت لإن المشروع الخاص هو أكبر جزء من الأصول - Assets وهو الجزء اللي ممكن يجبلك عوائد كبيرة جدا على المدى الطويل.

4- هو financial Education - التعليم المالي:

وده بيديك بما يسمى ب financial intelligence - الذكاء المالي بمعنى انك تستخدم فلوسك بذكاء، القطاع المالي زي أي قطاع تاني محتاج انك تدرسه وتفهم ازاي الامور بتمشي فيه.

و محتاج تفهم اربع حاجات مهمه زي ما الكاتب روبرت كايوساكي بيقول

1- المحاسبة - Accounting
ازاي تعرف تحسب الفلوس وتعرف دخلك ومصروفاتك وازاي فعلا تخطط تخطيط مالي للمستقبل.

2- تتعلم الإستثمار - Investing
إزاي تستثمر فلوسك في البورصة او السندات.

3- تحاول تفهم الأسواق - Markets
الأسواق اللي انت بتستثمر فيها.

4- تحاول تتعلم عن القانون - law
القانون اللي بيحكم الاستثمار في البلد بتاعك اللي انت عايش فيه، القانون ده مهم جدا لان في بعض البلاد بيكون عندها قوانين معينة ليها علاقة بالضرائب بتأثر على الدخل بتاعك وعلشان كده لازم تفهم النقطة دي كويس جدا عشان تقدر تكون ثروة على المدى الطويل.

أما المبدأ الخامس والأخير فهو خمس مشاعر بتمنعك انك تكون شخص غني

1- الخوف - Fear
انك تخاف تاخد الخطوة الأولى.