رحلة تطوير الذات : عقلية النمو طريقك الوحيد للتطوير والتعلم بشكل أفضل !

رحلة تطوير الذات : عقلية النمو طريقك الوحيد للتطوير والتعلم بشكل أفضل !
    رحلة جديدة هنبدها مع بعض هدفها تطوير الذات والتعلم واكتساب المهارات عشان نعيش حياة أفضل.

    كونك بتقرا المقالة دلوقتى ، فا ده مؤشر انك عايز تطور من نفسك ، ويمكن تكون مش عارف تبدا ازاى او منين وايه المصادر اللى تفيدك وتسهل طريقك ، وغيرها من الاسئلة اللى هنجاوبك عليها فى سلسلة مقالات رحلة تطوير الذات ..

    بس خلينى اكون صريح معاك مينفعش تبدا رحلة تطوير الذات الا لما يكون عندك عقلية النمو !

     عقلية النمو ممكن يكون مصطلح غريب على اغلبكم وناس تانى تكون تعرفه ، بس النهاردة خلينى اتعمق معاكم عن:
    • عقلية النمو " Growth mindset " 
    • عقلية الثبات " Fixed mindset " 
    ايه هى عقلية النمو وعقلية الثبات والفرق بينهم وانت مين فيهم ومحتاج تكتسب انهى عقلية عشان تتعلم كويس و تنجح فى حياتك ؟

    الناس متقسمة نوعين ، نوع يمتلك عقلية الثبات ونوع يمتلك عقلية النمو وهما دول اللى بياثروا بشكل كبير جدا فى قدرتك على التعلم والنمو وتحقيق اهدافك !

    لو انت عندك عقلية النمو صفاتك ونظرتك للعالم هتكون كده :
    بتؤمن ان كل المهارات قابلة للتعلم والاكتساب والتطوير ، وان عندك القدرة للتعلم والتطوير .. وان الناس الشاطرين فى شئ معين ، شاطرين بسبب مجهودهم وسعيهم مش عشان اتولدوا كده ، والناس اللى مش شاطرة فى شئ معين ، مش شاطرين بسبب انهم كسلوا وماخدتوش بالاسباب ولا عملوا المطلوب منهم ..
    اما لو انت من اصحاب عقلية الثبات:
     هبتكون مؤمن ان المهارات و الذكاء غير قابلين للتعلم او الاكتساب ، بمعنى انك بتكون فاكر انك ياما تتولد عند المهارة والذكاء ياما معندكش ، وصعب تزود نسبة ذكائك او مهاراتك !
    واحدة من أفضل الخبراء اللى اتكلمت عند الموضوع ده هى " Carol Dweck " صاحبة كتاب " Mindset: The New Psychology of Success " كتاب حقق نجاح كبير جدا ومرشح من اغلب الناس الناجحين فى العالم ومن الاكثر مبيعا ..

    و وضحت الفرق بين صفات اصحاب عقلية النمو و اصحاب عقلية الثبات زى ما مكتوب فى الصورة دى..


    عقلية النمو و عقلية الثبات

    بعض الصفات المذكورة فى الصورة :

    الهدف الاساسى لاصحاب عقلية النمو هو التعلم و التطوير المستمر وبيركزوا على السعى والرحلة فقط ، زى ما بنقول " الكنز فى الرحلة "

    اما اصحاب عقلية الثبات بيكون هدفهم وتركيزهم هو النتيجة النهائية بس مش بيحبوا السعى و الاجتهاد والمثابرة ، عايزين يحققوا كل حاجة بسرعة من غير تعب ولا مجهود !


    باختصار عقلية النمو بتساعدك على التعليم والتطوير بشكل مثمر و بتخلق ليك ارض صلبة وقوية جدا للتعليم ، لانها بتخليك تؤمن انك ديما تقدر تتعلم وتتطور فى اى وقت و اى سن و اى مكان ( التطوير المستمر )

    طب ندخل فى الكلام العملى بقى ، ازاى اكتسب عقلية النمو و ايه هى صفاتها و ازاى اطبقها فى حياتى ؟

    1- " المعتقدات - Beliefs " :

    • أصحاب عقلية النمو مؤمنين ان المهارات بتتبنى وقابلة للاكتساب والتعلم وتقدر تطور منها كل يوم.
    • أصحاب عقلية الثبات مؤمنين ان المهارات لازم تتولد بيها ومتقدرش تكتسبها ولا تطور منها !

    2- التركيز " Focus " 

    • اصحاب عقلية النمو بيركزوا على التعلم و التطوير المستمر والسعى !
    • اصحاب عقلية الثبات بيركزوا على النتيجة وشكلهم قدام الناس !
    المفاتيح الرئيسية للنمو ( المجهود - التحديات - الاخطاء - ردود الافعال )

    لو انت من اصحاب عقلية الثبات هتبص ليهم بالشكل ده:

    1- المجهود : هتبص للمجهود كاشئ سلبى ، انت لو شاطر فى حاجة هتبقى شاطر فيها طبيعى من غير مجهود ولا سعى !
    2- التحديات : بتتجب التحدياث و المواقف الصعبة ومش بتكون مقدر اهمية انك تبذل مجهود عشان توصل لحاجة او تكسب تحدى معين!
    3- الاخطاء : بتبص للاخطاء كحاجة وحشة ، وبتحبط جدا لما بتغلط وبتكره الاخطاء !
    4- ردود الافعال : بتشوف ان نقد الناس و ردود افعالهم تجاهك ، حاجة شخصية وبتدافع عن نفسك ومش بتشوف اى قيمة لرايهم او نقدهم البناء !

    اما اصحاب عقلية النمو بيبصو ليهم بالشكل ده:

    1- المجهود : بتشوف المجهود شئ مهم واساسى للتعلم و التطوير
    2- التحديات : بيعشقوا التحديات وبتبص ليها كفرصة للتحسين من نفسهم ونقاط ضعفهم
    3- الاخطاء : بالنسبالهم فرص للتطوير وبيتعلموا من اخطاءهم ومش بيخافو منها
    4- ردود الافعال : بيقدروا النقد و ردود الافعال وبيستخدموه عشان يطورا من نفسهم للاحسن فى كل مرة.

    هتلاقو كل حاجة متوضحة فى الصورة دى 👇

    عقلية النمو و عقلية الثبات
    بعد ما عرفت صفات كل عقلية ونظرتها للعوامل و المعتقدات اللى ذكرناه فوق دى ، يا ترى عرفت انت انهى عقلية فيهم ؟

    تعالى نوضح الكلام اكتر بشكل مبسط ، عقلية الثبات بتخاف من التحديات ومش بتحب تبذل مجهود فى حاجة لانها معتقدة ان المهارات غير قابلة للاكتساب و انهم صعب يطورا من نفسهم لو هما مش عندهم المهارات دى !
    بيخافو من الاخطاء و ردود الافعال لانهم معتقدين انهم لما يغلطوا يبقى انت كده وحش ومش شاطر ومفيش أمل فيك !

    اما عقلية النمو بتعشق المجهود والسعى ومش بتخاف من التحديات لانها مؤمنة انهم مش هيتحسنوا ويطوروا نفسهم الا بالمجهود وبيركزوا كل يوم على انهم يكونوا افضل من اليوم اللى قبله عشان كده بيحبوا ياخدوا فيدباك ونقد بناء من الناس المقربة ليهم عشان يطوروا من نفسهم اكتر ..

    احب اطمنك ان كل واحد فينا عنده الاتنين ، احيانا فى مواقف او ايام معينة بتكون فى عقلية الثبات واحيانا عقلية النمو ..

    فا تعالى ناخد مثال عملى على ازاى نوصل لعقلية النمو فى التعلم ..

    ركز فى الصورة دى هشرحهالك بالتفصيل تحت الصورة ..

    عقلية النمو و عقلية الثبات

    بص للصورة و ابدا الدايرة من عند " Belief " اللى هى معتقد وشرحناه المقصود بيها فوق ..

    لان المعتقد " Belief " بياخدك للفعل " Action " ومن خلاله بتوصل للنمو " Growth " او نتيجة اللى بتوصلك لمعتقد " belife " جديد فا تعمل اكشن جديد فا توصل لنتيجة جديدة وهكذا ..

    يلا ناخد مثال عملى بتطبيق :

    أحمد مؤمن ومعتقد ان عنده القدرة على التطوير وتعلم اى حاجة سواء مهارة معينة ، مشروع جديد ، مجال معين ، او تحدى .. او ايا كان ، خلينا نقول انه مؤمن انه يقدر يحسن من شكل جسمه للافضل ويكون اقوى ، ايمانه انه يقدر يتعلم ويتطور حفزه وشجعه انه يبذل مجهود ويسعى وياخد اكشن و بدأ يروح الجيم ومشى على نظام غذائى وبدء ياخد feedback من الناس ويدخل فى تحديات كتير ويواجهه خوفه وكان صابر وعارف ان كل حاجة بتاخد وقت.. 

    فكان مستمتع بالرحلة والمجهود نفسه مش مستنى نتيجة معينة ،، وبعد فترة من المثابرة والاجتهاد بدء جسم يتحسن ويشوف نتيجه كويسه ، فا زاد عنده معتقده وايمانه انه ممكن يحسن اكتر واكتر وهكذا لحد ما بقى اسلوب حياة..

    شوفت البداية كانت منين ؟ كانت من ايمانه انه يقدر يتعلم ويطور ويكتسب اى مهارة ،، لو كان معتقد ان جسمه هيفضل زى مهو مفيش منه فايدة مكنش اتحمس اصلا انه ينزل جيم ويعمل نظام غذائى وهكذا وكان هيبقى مستعجل وعايز يحسن شكله من غير ما يتعب ولا يبذل مجهود ..!

    ملحوظة : الاعتقاد والايمان لوحده مش هيعمل حاجة ، يعنى متقولش انا مؤمن انى اقدر اتطور وابقى افضل وانت مش بتعمل اى فعل ولا بتاخد اى أكشن " Action " لازم تكمل الدائرة اللى فوق عشان توصل لعقلية النمو والتطوير المستمر .


    اعتقد انت كده فهمت و أدركت ليه عقلية النمو مهمه وليه محتاج تكتسبها عشان تطور من نفسك ، الكلام يطول عن عقلية النمو بس هنكتفى بالقدر ده ، انا حبيت تكون دى اول مقالة فى سلسلة مقالات تطوير الذات لانى مؤمن ان لازم يبقى عندك اساس قوى عشان

    تقدر تتعلم اى حاجة و يبقى التطوير بالنسبالك اسلوب حياة ..

    هستنى منك تعليق على المقالة باللى اتعلمته منها ، وخليك متاكد اننا بنبذل أقصى مجهود عشان نوصلك محتوى يليق بيك ، فا نتمنى منك ما تبخلش على غيرك بانك تشارك معاه المقالة وتنشرها عشان نوصل رسالتنا لاكبر عدد ممكن من الطلبة ..


    Ahmed Sysy
    @مرسلة بواسطة
    كاتب ومحرر اخبار اعمل في موقع نادي القراءة العملية | بوابتك للتعلم الذاتى .
    1. مقالة روعة جدا بجد ، شكرا ليكم :)

      ردحذف
    2. مقال رائع لكن المشكلة الكسل في ان الانسان يبدا يبحث عن اللي حيساعده في تطوير مهارة معينة وطبعا الكورسات الاونلاين مشكلتها بتحتاج متابعة من البيت وفي ناس مابتعرفش تواظب على متابعتها وبالتالي لو حتعلم شوية حوقف في النص ودي مشكلة صبر وارادة وبالتالي عقلية النمو مابتستمرش وبيرجع الانسان لنقطة الخبرات اللي عالجاهز

      ردحذف
      الردود
      1. معاك حق الكسل مشكلة بتواجهنا كلنا، وعقلية النمو بتاخد وقت ومجهود لحد ما تكتسبها..
        الفكرة فى انك تكمل مهمها وقعت، مفيش حد مش بيوقع ولا بيكسل المهم مين بيستمر وده بيفرق الانسان الناجح صاحب عقلية النمو عن الانسان الكسول

        حذف