-->

كورس التحضير لامتحان الآيلتس مجانا من British Council (فرصة متتعوضش)

التحضير لامتحان الآيلتس مجانا

أول خطوة لحلم إنك تسافر لبلد أجنبية جات على بالك دلوقت لما جيبنا سيرة السفر، هو امتحان IELTS،
وبين ايديك فرصة مجانية للخطوة دي.

بس الأول هنتعرف هنا على كل التفاصيل والمعلومات المحتاج تعرفها عن الآيلتس، 
والفرصة المجانية لامتحانه.

قولنا إن الايلتس IELTS أول خطوة لحلم السفر سؤاء عشان منحة او سفر سياحة أو شغل، 
لإنه أول حاجة هتطلبها منك أي بلد بتتكلم إنجليزي هو إثبات 
إنك على مستوى عالي في الإنجليزي وتحديدا في امتحان IELTS. 


طبعا أول خطوة دايما صعبة ومحتاجة مجهود. والمُقلق للي بياخد الخطوة دى مش المجهود للأسف، 
لكن كم التحضير، والفلوس الكتير اللي بيتطلبها التحضير دا. 
بس القلق دلوقت تقدر توفره لرحلة تجهيزك للسفر عشان هتعرف من خلال المقالة دى 
كورس التحضير لامتحان الآيلتس مجانا وكمان من British Council

بس ايه التعريف بالظبط لامتحان الايلتس، وليه اسمه كدا؟

ايه هو امتحان ايلتس IELTS؟ 


التعريف العام لـIELTS هو اختصار لجملة: International English Language Testing System.


وبالتعريف دا نقدر نفهم إنه الامتحان العالمي المعتمد للإنجليزي حوالين العالم، من معظم المعاهد، 
الجامعات وأكتر من 6000 مؤسسة في كتير من الدول اللي بيتكلموا فيها إنجليزي، 
خاصة بريطانيا واستراليا، وعشان كدا هتلاقي British Council وجامعة كامبريدج 
والمؤسسة الأسترالية IDP بيقدموا كل ما يخص الامتحان.


بيشمل المهارات الأربعة الرئيسية لأي لغة واللي هي:

  1. الكتابة: جزء المهارة دي هتمتحن فيه أهم قواعد الكتابة (Grammar)،
     تنظيم الأفكار، والكلمات والمفردات.
  2. القراءة: هتقرأ في المهارة دي، 3 فقرات بسرعة،
     وتفهم قصد الكاتب وتعرف تجاوب برأيك ودا طبعا لازم يبقى بشكل صحيح،
    دا غير إجابتك على مجموعة الأسئلة اللي ليها علاقة بالقراءة.
  3. التحدث: طبعا هتتكلم مع حد متخصص في المواقف الحياتية وغيرها،
    وهيتكلم معاك بكل اللهجات وفي أي موضوع بيقيس بيهم مدى إجادتك للغة.
  4. الاستماع: الجزء دا بقى لازم تكون فاهم فيه الأفكار والمعلومات اللي بتتقال لك،
    عشان يعرفوا إنك هتقدر تفرق بين الأراء والمواقف اللي هتتعرض لها.

طب هل هو كدا امتحان واحد ولا أكتر من امتحان؟


بعد ما فهمنا كل اللي فات، وعرفنا بيتقبل فين وينحتاجه قد ايه،
يمكن تحس إنك كنت عارف كل دا، بس دا مش كل حاجة عنه،
ويمكن تتفاجئ لما تعرف بإن امتحان الايلتس
هو امتحان واحد رغم إننا اتكلمنا عن كل مهارة إنها جزء منفصل!



بس الامتحان نوعين وفيهم نفس المهارات اللي عرفتهم متقلقش،
لكن بيختلفوا شويه لإن هدفهم مختلف، واللي هم:

  1. 1- IELTS Academic Test الامتحان الأكاديمي:
    ودا هيبقى ليك لو أنت طالب وعايز تسافر تكمل دراستك برا
    في أي مؤسسة أكاديمية سواء جامعة أو معهد.

  2. IELTS General training امتحان التدريب العام
    والامتحان دا زي ما أنت توقعت بالظبط، هو عكس الأول،
    بيكون للناس المقدمين على هجرة أو هيشتغلوا برا في أي وظيفة.

مميزات الفرصة المجانية لكورس ايلتس IELTS


ايلتس IELTS كغيره من أي مهارة بتكتسبها ممكن تلاقي نفسك تايه في إنك تاخد مصادرك منين. 
فممكن تلاقي مواقع تأهلك لامتحان IELTS زي كورسيرا أو ،EDX، 
بس اللي بيوفره British Council أنا قولتلك عليه فرصة لإنه على غير العادي بيقدم:

  • مصادر مجانية، ودا أول سبب خلاها فرصة حقيقية.
  • تمارين تحلها، بحيث تدرب على شكل الامتحان.
  • خطوات تجهيزك كاملة للامتحان الأساسي.
  • وتقدر تتواصل مع المدربين بتوعك أون لاين، هتشاركهم أرائك وكل تفصيلة بتتعلمها،
    ومش محتاجة أقولك يعني مدى كفاءة مدربين الbritish council أكيد أنت عارف أكتر مني.

ازاي تشترك في كورس IELTS من British Council؟

عرفنا يعني ايه IELTS، وعرفنا إن المميزات اللي بيقدمها الBritish Council مختلفة. 
هتتعلم ازاي تحسن الأربع مهارات خلال 5 أسابيع بس، بمعدل 3 ساعات كل أسبوع، 
وبكدا زي ما هترتاح في الفلوس هترتاح في الوقت. ما فاضلش غير إنك تملى بياناتك وتسجل.


وده تخصص كامل مكون من 3 كورسات على موقع كورسيرا، هيخلي مستواك ممتاز: رابط التخصص

بما إنك عرفت كل حاجة عن الفرصة هل تبدأ ولا لسه؟

الحقيقة إنه لسه، عشان دي مش كل حاجة، الجامعة البريطانية 
قدمت 1000 كورس مجانا في 8 مواضيع دراسة مختلفة. 
هنشوف إن المهم فيهم إنهم من جامعة كبيرة وشهادتهم ببلاش!
 
بس لما تعرف إن مفيش ميعاد بداية ولا نهاية لكورسات الجامعة البريطانية 
وعندك أريحية في إنك تبدأ أي وقت أنت عايزه، دا بقى الأهم بكتير.


ولو لسه معرفتش المستوى المفروض تبدأ منه ايه، فعدد الكورسات دي متوزع 
من أول المستوى المبتدئ لحد المستوى المتقدم.

وبكدا تكون الجامعة البريطانية حققت المعادلة الصعبة اللي مش موجودة في معظم أماكن التعليم.
 
تقدر تتعرف على كل كورسات الجامعة البريطانية من خلال الرابط دا


بعد ما اتعرفت على IELTS وشوفت الروابط الموجودة لواحد من أهم الأماكن اللي بتقدم كورسات، 
واتفاجئت بكل المميزات دي، أقدر أقولك إنك جاهز تبقى على أول خطوة في طريق سفرك. 

وشويه مجهود ووقت بسيط بيفصلك عن تحضير شنطتك. 

ما تنساش تشارك المقال مع رفيقك في السفر.