-->

تجربتي مع التعليم الذاتي وازاى أنت كمان تتعلم اللى نفسك فيه!

رحلتى مع التعلم الذاتي
انا كنت بكرة التعليم جدا والمذاكرة، وفجأة اتحولت لشخص بيعشق التعلم، وعلمت نفسى بنفسى مجالات كتير زى، التسويق الالكترونى، تهيئة محركات البحث "SEO"، كتابة المحتوى، وغيرهم..

فى المقالة دى هشارك معاك رحلتى مع التعلم الذاتي وازاى علمت نفسى بنفسى مجالات بعيدة تماما عن تخصص دراستى فى الكلية، واشتغلت فى المجالات دى وحققت فيها نتائج كويسة ومازالت الرحلة مستمرة، وازاى انت كمان تبدأ تعلم نفسك بنفسك كل المجالات اللى نفسك فيها..

يعنى لو دخلت كلية مابتحبهاش، او بتتعلم حاجات مش بتحبها ونفسك تتعلم اللى نفسك فيه، او حتى لو كنت كرهت التعليم وبقيت مش عايز تتعلم اى حاجة، فى المقالة دى هخليك تشوف التعليم بشكل مختلف تماما ..

ازاى بدأت الرحلة؟

بدأت الرحلة سنة 2015 لما بطلت اعلق شماعات لفشلي! وأدركت انى لو اتعلمت، واكتسبت مهارات سوق العمل هقدر اشتغل، وان قيمتي في سوق العمل = مهاراتي العملية

دخلت تحدى مع نفسى وقلت أنا هثبت إن تقديرى فى الجامعة (مقبول) مش هو اللي هيحدد مستقبلى وان مهاراتى هى المقياس!

اقرأ أكتر عن تجربتى فى الجامعة ونصائح غالية جدا من هنا:  6 نصائح لتتميز فى الجامعة وتحصل على وظيفة فى سوق العمل

وقتها مكنتش اعرف اى حاجة عن كنز التعليم عبر الانترنت "MOOCs" وان كل المجالات تقريبا اقدر اتعلمها من على النت من أحسن المصادر كمان!

بس زى ما بيقولوا "أول الغيث قطرة، ثم ينهمر" وان لو صدقت فى السعي، واستغليت المتاح عندى ربنا هيفتحلى مليون مصدر وطريق..

بالفعل بدأت بأول خطوة وبالمتاح معايا، مكنش عندى لاب توب، ولا فلوس كفاية انى اخد كورسات، واطور مستوايا فى الانجليزى مثلا، او انى اشترى الكتب اللى نفسى فيها، كنت بحمل كتب pdf على موبايلى واقرا والخص واستغل وقتى صح.
صور التخرج

ساعتها مكنش عندى اى حاجة غير يقين وحسن ظن بالله كبييير جدا، ان كل اللى عليا هو السعى والاجتهاد، والنتيجة والكرم من عند ربنا. ومكنش عندى رؤية ولا عارف انا رايح فين او عايز ايه، غير انى عايز أطور من نفسى واكتسب مهارات أكتر

بعد فترة من السعى واختبارات كتيرة مع النفس اثبت فيها صدق سعيي، بدأت أقطف بعض ثمرات سعيي، وبدأ عقلى ومستوايا يتحسن فى اكتر من مجال..

الوعي الذاتي كان كلمة السر .. وكنت لو أول مرة أسأل نفسي انا مين؟
ايه المميز عندى؟ ايه مواهبى؟ ايه شغفي؟ مهاراتى ايه؟

واتصدمت انى مش عارف اى حاجة عن نفسى، ومن الصدمة بدأت الرحلة، ازاى هنجح وانا معرفش انا مين، ولا أى حاجة عن نفسى! ازاى هرسم طريقى؟ هحدد مستقبلى بناءا على ايه؟

بدأت أقرأ أكتر عن النفس البشرية والوعى الذاتى، وكل يوم كنت بحاول اكتشف نفسى، وأعرفها أكتر، وعرفت انى عندى موهبة الشرح وحبيت القراءة، والتطوير، وطلب العلم جدا، وادركت اني اقدر اساعد طلبة كتير يبدأوا الرحلة

وبما انى علمت نفسي بنفسي من الصفر، يبقى أى حد يقدر بس محتاج اللى يشاورله على الطريق!

بالفعل بدأت نادى القراءة العملية عشان انشر الرسالة لأكبر عدد ممكن وعندى حلم كبير"إذا تمنيت فاستكثر"

أساعد اكتر من مليون شاب يبدأوا رحلة التعلم الذاتي ويتعلموا اللى نفسهم فيه بغض النظر عن التنسيق او رغبة اهلهم

ازاى تعلم نفسك بنفسك؟

1- أولا لازم تدرك أهمية طلب العلم: ان هو سبب من أسباب وجودنا على الأرض، وانك بتتعلم عشان تطور من نفسك وبتتعلم لنفسك مش لحد ولا عشان شهادة ولا تقدير، انت بتتعلم وكل هدفك هو المعلومة نفسها، وازاى تطبقها فى حياتك..

2- لازم تكتسب عقلية النمو:
وايه هى المفاتيح الأربعة للتعلم والتطوير، اللى هما (المجهود - التحديات - الأخطاء - ردود الأفعال)

تقدر تقرأ اكتر عنهم من هنا: عقلية النمو طريقك الوحيد للتطوير والتعلم بشكل أفضل !

3- حدد ايه الصفات، والمهارات اللى محتاج تكتسبها عشان تأهل نفسك للحياة، ولسوق العمل:
زى: الانجليزى، مهارات التواصل، التفكير النقدى، القراءة، مهارة البحث، الالتزام، التعلم المستمر.. وبجانب مهارات مجالك اللى اختارته او لسه هتختاره

4- إلزم نفسك بأعمال بسطية وداوم عليها:
أحب الأعمال الى الله أدومها وإن قل" على سبيل المثال، قررت تتعلم انجليزى، حدد لنفسك وقت ولو صغير، " نص ساعة يوميا هتتعلم بيها انجليزى سواء عن طريق الاستماع او الكتابة او الممارسة، المهم تداوم على النص ساعة دى كل يوم، ممكن تحدد وقت اكتر او أقل حسب طاقتك بس المهم الوقت اللى هتحدده هتداوم عليه وتلتزم بيه.

5- التطبيق والممارسة – تعليم غيرك:
زى ما بنقول ديما "نور العلم يكتمل بالتطبيق" عايز تتعلم اى حاجة علمها لغيرك
او مارسها كل يوم لحد ما تتقنها

ازاى تتعلم مجالك من الكورسات الاونلاين؟

كنز الكورسات الاونلاين (MOOCs) اللى هى اختصار ل Massive Open Online Courses تعتبر ثورة فى مجال التعليم لانها فتحت كل المصادر فى كل المجالات تقريبا لكل الناس ومن اى مكان فى العالم وده باختصار تعريف المووكس..

إعرف اكتر عن المووكس والكورسات الاونلاين:  الكورسات الاونلاين والتعلم الذاتى - الحقيقة وراء ال MOOCs !

ازاى تستخدمها صح بشكل مؤثر؟

1- هتحدد المجالات اللى محتاج تتعلمها:
ايا كانت ايه المجالات دى هتلاقي ليها كورسات اونلاين مجانية، ومدفوعة بملبغ بسيط
طب لو انت مش عارف تحدد المجالات اللى انت شغوف بيها وحابب تتعلمها
يبقى شوف الفيديو ده: 


2- حدد المنصات أو المواقع اللى هتتعلمها عليها:
في مواقع كورسات اونلاين عربى وفيه انجليزى، كل موقع او منصة تعليمية بيكون له طابع خاص وطريقة مختلفة فى التعليم.. لو حابب تبدأ بمواقع الكورسات الاونلاين العربية مؤقتا لحد ما تطور الانجليزى بتاعك تقدر تشوف مواقع الكورسات العربى من الفيديو ده: أفضل مواقع كورسات اونلاين عربية مجانية 2019 - تعلم الآن من منزلك

ولو الانجليزى كويس، يبقى يفضل طبعا انك تبدأ بالمواقع الاجنبية زى كورسيرا ، يوديمي، وليندا وغيرهم
ده فيديو عن 3 مواقع تقدر تتعلم منهم اى مجال من الصفر:


3- حدد وقت مخصص للكورسات الاونلاين:
لما تحدد وقت معين للمذاكرة هتقدر تبنى عادة بكل سهولة، يعنى مثلا حدد نص ساعة كل يوم قبل ما تنام، أو قبل ما تروح الجامعة، ويكون الوقت ده مقدس، وتلتزم بيه على اد ما تقدر، شوف الوقت اللى يناسبك انت ويناسب ظروفك.

4- سجل المعلومات والملاحظات اللى بتتعلمها فى ورقة او ملف وورد:
المعلومة لما تسجلها هتفهمها اكتر، وتفتكرها أسرع، وانا شخصيا بفضل استعمال الورقة والقلم
لان مفيش طالب علم من غير ورقة وقلم.

حمل الكتاب المجانى اللى هيخليك تبدأ الرحلة صح من هنا:  ازاى تبدا كورسات اونلاين بشكل فعال؟ (كتيب PDF حمل الان مجانا)

الخاتمة:

كنز التعلم الذاتى هيخليك تتعلم كل حاجة نفسك بيها، وتبص للتعليم بشكل مختلف خالص عن زمان، بلاش تهجر الكنز ده، لأنك هتخسر كتييير، وهتفوت فرص كتير جدا ممكن تغير حياتك للأفضل.

اتمنالك رحلة تعليمية ممتعة، ولو مؤمن برسالتنا، وبقوة التعلم الذاتى شارك المقالة دى مع شخص غالي عليك، وساعده يبدأ رحلة التعلم الذاتى من دلوقتى.

أتمنى تعرفنى فى الكومنتات ايه اللى انت محتاجة عشان تبدأ؟ ايه المشاكل اللى بتواجهها؟ اتعلمت ايه من المقالة؟
تقدر تنضم للجروب الخاص بينا من هنا: اتعلم اللى بتحبه من بيتك مجانا " نادى القراءة العملية