قصص نجاح - مسكة قلم غيرت كل شئ!

قصص نجاح - مسكة قلم غيرت كل شئ!
    بعد اول مسكة قلم كل حاجه اتغيرت!

    طبيعي انك تجيب لبنتك اسكتش تلون وتتعلم و توديها لمحفظ عشان يحفظها القران
    بس الاجمل ان الخطوه دي تكون بوابه لنجاح و قصه طويله لسه بتتكب لحد دلوقتي!

    ده كان كلام بطلة قصتنا النهاردة " يمنى " اللى علمت نفسها الرسم من خلال التعلم الذاتى و الكورسات الاونلاين والممارسة.

    ودى بعض انجازتها على لسانها:
    • قدرت اشتغل ف دار نشر و نزلي شغل السنه دي فى معرض الكتاب.
    • بدي كورسات رسم دخله ف سنتين و ماشاء الله طلعت جروبات تشرف و اديت من اول 5 سنين ل 40 سنة.
    • بعت 5 لوحات برا مصر ( فرنسا ، دبي ، الاردن ، 2 السعودية ).
    • خدت مركز 5 على مستوي الجمهورية. 
    • نزلي شغل هاند ميد و اكسسوار فى اغلب محافظات مصر
    • بلعب تايكوندو و بوكس و قريب هدخل بطوله باذن الله
    • عملت فكره جديده تجمع بين ايدي و الاسكتش بطريقه 3d 
    • جربت خامات كتيره جداا ( خشب و قماش و رسمت ع ورق و عربيات و ايدي و حيطان و الباب وكله ....)
    نسيبكم بقى مع الحوار اللى عملناه معاها والدروس المستفادة منه..

    بدأتي رحلتك في اكتشاف نفسك إزاي؟

    بدأت من أول مسكة قلم كانت وانا 4 سنين ومن وقتها ماسبتهوش
    الطريق بدأ بتلوين اسكتشات عشان اتعلم الحروف و الارقام و بعد كدا دخلت مرحله ابتدائي برسم حلو بشهاده اللي حوليا و بدات اتكرم ك سنه و كنت في الصف الخامس و السادس برسم لوحات الفصول كلها و كلمه انتِ سابقه سنك و فنانه كنت بثبتها للي حوليا يوميا لحد ماوصلت للي فيه دلوقتي، و اخترت ارسم بطرق مختلفه علشان فني يكون مختلف وافضل ف التميز ده

    نقطة التحول في حياتك كانت ايه وامتى؟

    نقطه التحول ف 3 اعدادي حصلي كام موقف و كانوا نقطة التحول
    الاول لما قابلت اول فنان وكان عايش ف اوروبا صدفه و تنبألي بمستقبل كبير ف الفن
    تاني حاجه اقرب ناس ليا قطعولي لوحات
    والاخير لما ناس وقفوا ف طريقي و قالوا متفكريش نفسك بتعرفي ترسمي و ان دا اخرك و كمية احباط حلوه يعني.

    ايه التحديات اللي قابلتك وازاي قدرتي تتغلبي عليها؟

    تحديات كتير زي مثلا كميه الاحباط اللي شوفته من كل اللي حواليا و ان بقيت ماشيه عكس اتيار و مبقابلش فنانين و معرفش حاجه مكنتش لسه دخلت عالم السوشيال يعني ولا اتعاملت مع حد يقدر يقدملي نصيحه و مفيش مكان بيدي كورسات ف مكانش قدامي غير الاستمرار بشكل اقوي والتمرين كتير و بدات انتج يوميا لوحات واسكتشات و اتفرج ع صور كتير ‘ اعرف الفرق و ادقق و ربنا سعدني ف قوه الملاحظه و التطور و كان هدفي  خلال الاجازه اكون بعت اول لوحه و فعلا تم و قبل الاجازة ماتنتهي.

    لو هتقولي نصيحة لحد مبتدأ هتكون ايه؟

    يرسم كتير ، يطلع انتاج يوميا حتي لو اسكتش شخبطه المهم يمسك القلم و يرسم
    دا لو مبتدأ فى مجال الرسم و في اسكتشات صغيره جدا فى اي حته انتظار او غيره هيعمل اسكتش سريع.

    بتحلمي بإيه؟

    هتصدقني لو قولتلك ان احلامي ان اي علم عندي اوصله لغيري و افضل اكتشف نفسي كل يوم و اضيف البهجه و متعه الحياه لاي حاجه حوليا.

    وانا بعشق البيزنيس و حاليا بدرس حاجات خاصه بيه زي رياده الاعمال و الماركتينج و غيره عشان بأسس البراند بتاعي
    و من ضمن احلامي ادرس فن ف أوروبا.

    ايه اللي نفسك تعلميه لغيرك؟

    اعلم اي لغيري ف انا حرفيا عايزه اي حاجه بستفادها اعلمهالهم و اوصلهم ان الحقيقه الوحيده ان الدنيا مش هتمشي زي ما بتخططلها عشان كدا هتقابل عقابات كتير و صدمات اكتر لازم تكون جاهز و مجهز ل دا جدا

    نفسك تحققي ايه من خلال الرسم ؟

    احقق اثر و يكون ليا اسلوبي الخاص و لوحاتي تلف العالم كله و الشو بتاعي يتعرض ف اكبر الحفلات و مع اقوي جمهور

    ايه اهم الدروس اللي اتعلمتيهم في حياتك؟

    • الدنيا مش بتمشي زي ما بتتوقع نهائي و كلها مطبات كتير جدا و الواقعه بتفتكرها نهايه الدنيا عشان كدا لازم يكونلك بدل الخطه خطط كتير و طرق اكتر للهدف 
    • الاستمرار مهما وقعت تقوم وتكمل اكيد هتوصل فى يوم ومتكبرش اي مشكله لان لكل قفل مفتاح يمكن جربت مفتاح غلط بس حتما هتوصل للمفتاح الصح
    • ادرس الاساسيات و بعدين ابتكر و حط طريقك و اثرك بنفسك
    • الهدف بدون خطه مجرد حلم عشان كدا لازم ولابد من الخطه و العمل ع تجديدها دايما
    • كل متتعب خد بريك بس متستسلمش 
    • لازم يكونلك ناس ثقه تقدر تاخد رأيها ف طريقك دايمًا 

    ايه الدافع ال بيحركك ؟

    عايزه اكون سند لنفسي و للي حوليا
    متعودتش اكون ضعيفه عشان كدا لازم اقف بعد كل وقعه متعودتش اكون عاديه
    و دايما حاطه الجمله دي قدامي ( سأكون شريكًا في صناعة التاريخ)
    ____________________________

    دى كانت قصة نجاح يمنى ، يا ترى ايه اكتر حاجة عجبتك فى قصتها ؟ وايه الدروس المستفادة ؟ ولو حابب تقولها نصيحة هتكون ايه ؟

    مقالات متعلقة: 
    Ahmed Sysy
    @مرسلة بواسطة
    كاتب ومحرر اخبار اعمل في موقع نادي القراءة العملية | بوابتك للتعلم الذاتى .

    إرسال تعليق