عقلية النمو - Growth Mindset طريقك الوحيد للتطوير والتعلم بشكل أفضل!

عقلية النمو وعقلية الثبات
كونك بتقرا المقالة دلوقتى، فا ده مؤشر انك عايز تطور من نفسك، ويمكن تكون مش عارف تبدأ ازاى أو منين وايه المصادر اللى تفيدك وتسهل طريقك، وغيرها من الاسئلة اللى هنجاوبك عليها فى سلسلة مقالات رحلة تطوير الذات ..

بس خلينى أكون صريح معاك مينفعش تبدأ رحلة تطوير الذات إلا لما يكون عندك عقلية النمو!

 عقلية النمو ممكن يكون مصطلح غريب على أغلبكم وناس تانى تكون تعرفه، بس النهاردة خلينى اتعمق معاكم عن:
  • عقلية النمو "Growth mindset" 
  • عقلية الثبات "Fixed mindset" 
ايه هى عقلية النمو، وعقلية الثبات، والفرق بينهم وانت مين فيهم، ومحتاج تكتسب أنهى عقلية عشان تتعلم كويس وتنجح فى حياتك؟

الناس متقسمة نوعين، نوع يمتلك عقلية الثبات، ونوع يمتلك عقلية النمو وهما دول اللى بيأثروا بشكل كبير جدا فى قدرتك على التعلم والنمو وتحقيق أهدافك!

لو أنت عندك عقلية النمو صفاتك، ونظرتك للعالم هتكون كده:
بتؤمن ان كل المهارات قابلة للتعلم والاكتساب والتطوير، وان عندك القدرة للتعلم والتطوير .. وان الناس الشاطرين فى شئ معين، شاطرين بسبب مجهودهم وسعيهم مش عشان اتولدوا كده، والناس اللى مش شاطرة فى شئ معين، مش شاطرين بسبب انهم كسلوا وماخدتوش بالاسباب، ولا عملوا المطلوب منهم ..
اما لو أنت من أصحاب عقلية الثبات:
 هبتكون مؤمن ان المهارات والذكاء غير قابلين للتعلم أو الاكتساب، بمعنى انك بتكون فاكر انك ياما تتولد عند المهارة والذكاء ياما معندكش، وصعب تزود نسبة ذكائك أو مهاراتك !
واحدة من أفضل الخبراء اللى اتكلمت عند الموضوع ده هى "Carol Dweck" صاحبة كتاب "Mindset: The New Psychology of Success" كتاب حقق نجاح كبير جدا، ومرشح من اغلب الناس الناجحين فى العالم ومن الأكثر مبيعا..

ووضحت الفرق بين صفات أصحاب عقلية النمو وأصحاب عقلية الثبات زى ما مكتوب فى الصورة دى..


عقلية النمو و عقلية الثبات

بعض الصفات المذكورة فى الصورة:

الهدف الاساسى لاصحاب عقلية النمو هو التعلم والتطوير المستمر، وبيركزوا على السعى والرحلة فقط، زى ما بنقول "الكنز فى الرحلة"

اما أصحاب عقلية الثبات بيكون هدفهم وتركيزهم هو النتيجة النهائية بس مش بيحبوا السعى والاجتهاد والمثابرة، عايزين يحققوا كل حاجة بسرعة من غير تعب ولا مجهود!


باختصار عقلية النمو بتساعدك على التعليم والتطوير بشكل مثمر وبتخلق ليك أرض صلبة وقوية جدا للتعليم، لأنها بتخليك تؤمن انك ديما تقدر تتعلم وتتطور فى أى وقت وأى سن وأى مكان (التطوير المستمر)

طب ندخل فى الكلام العملى بقى، ازاى اكتسب عقلية النمو وايه هى صفاتها وازاى اطبقها فى حياتى؟

1- "المعتقدات - Beliefs":

  • أصحاب عقلية النمو مؤمنين ان المهارات بتتبنى، وقابلة للاكتساب والتعلم وتقدر تطور منها كل يوم.
  • أصحاب عقلية الثبات مؤمنين ان المهارات لازم تتولد بيها، ومتقدرش تكتسبها ولا تطور منها !

2- التركيز "Focus" 

  • أصحاب عقلية النمو بيركزوا على التعلم و التطوير المستمر والسعى!
  • أصحاب عقلية الثبات بيركزوا على النتيجة وشكلهم قدام الناس!
المفاتيح الرئيسية للنمو (المجهود - التحديات - الأخطاء - ردود الأفعال)

لو أنت من أصحاب عقلية الثبات هتبص ليهم بالشكل ده:

1- المجهود: هتبص للمجهود كاشئ سلبى، انت لو شاطر فى حاجة هتبقى شاطر فيها طبيعى من غير مجهود ولا سعى!
2- التحديات: بتتجب التحدياث والمواقف الصعبة ومش بتكون مقدر أهمية انك تبذل مجهود عشان توصل لحاجة أو تكسب تحدى معين!
3- الاخطاء: بتبص للاخطاء كحاجة وحشة ، وبتحبط جدا لما بتغلط وبتكره الاخطاء !
4- ردود الافعال: بتشوف ان نقد الناس وردود افعالهم تجاهك، حاجة شخصية، وبتدافع عن نفسك ومش بتشوف أى قيمة لرأيهم او نقدهم البناء!

اما أصحاب عقلية النمو بيبصو ليهم بالشكل ده:

1- المجهود: بتشوف المجهود شئ مهم واساسى للتعلم و التطوير
2- التحديات: بيعشقوا التحديات وبتبص ليها كفرصة للتحسين من نفسهم ونقاط ضعفهم
3- الاخطاء: بالنسبالهم فرص للتطوير وبيتعلموا من اخطاءهم ومش بيخافو منها
4- ردود الافعال: بيقدروا النقد و ردود الافعال وبيستخدموه عشان يطورا من نفسهم للاحسن فى كل مرة.

هتلاقو كل حاجة متوضحة فى الصورة دى 👇

عقلية النمو و عقلية الثبات
بعد ما عرفت صفات كل عقلية ونظرتها للعوامل والمعتقدات اللى ذكرناه فوق دى، يا ترى عرفت انت أنهى عقلية فيهم؟

تعالى نوضح الكلام اكتر بشكل مبسط، عقلية الثبات بتخاف من التحديات ومش بتحب تبذل مجهود فى حاجة لانها معتقدة ان المهارات غير قابلة للاكتساب و انهم صعب يطورا من نفسهم لو هما مش عندهم المهارات دى!
بيخافو من الاخطاء و ردود الافعال لانهم معتقدين انهم لما يغلطوا يبقى أنت كده وحش ومش شاطر ومفيش أمل فيك!

أما عقلية النمو بتعشق المجهود والسعى ومش بتخاف من التحديات لأنها مؤمنة انهم مش هيتحسنوا ويطوروا نفسهم إلا بالمجهود وبيركزوا كل يوم على انهم يكونوا أفضل من اليوم اللى قبله عشان كده بيحبوا ياخدوا فيدباك، ونقد بناء من الناس المقربة ليهم عشان يطوروا من نفسهم اكتر ..

أحب أطمنك ان كل واحد فينا عنده الاتنين، احيانا فى مواقف أو أيام معينة بتكون فى عقلية الثبات وأحيانا عقلية النمو ..

تعالى ناخد مثال عملى على ازاى نوصل لعقلية النمو فى التعلم ..

ركز فى الصورة دى هشرحهالك بالتفصيل تحت الصورة ..

عقلية النمو و عقلية الثبات

بص للصورة وابدأ الدايرة من عند "Belief" اللى هى معتقد وشرحناه المقصود بيها فوق ..

لأن المعتقد " Belief" بياخدك للفعل "Action" ومن خلاله بتوصل للنمو "Growth" أو نتيجة اللى بتوصلك لمعتقد " belife " جديد فا تعمل أكشن جديد فا توصل لنتيجة جديدة وهكذا ..

يلا ناخد مثال عملى بتطبيق:

أحمد مؤمن ومعتقد ان عنده القدرة على التطوير وتعلم اى حاجة سواء مهارة معينة، مشروع جديد، مجال معين، أو تحدى .. أو أيا كان، خلينا نقول انه مؤمن انه يقدر يحسن من شكل جسمه للافضل ويكون اقوى، ايمانه انه يقدر يتعلم ويتطور حفزه وشجعه انه يبذل مجهود ويسعى وياخد اكشن وبدأ يروح الجيم ومشى على نظام غذائى وبدء ياخد feedback من الناس، ويدخل فى تحديات كتير ويواجهه خوفه وكان صابر وعارف ان كل حاجة بتاخد وقت.. 

فكان مستمتع بالرحلة والمجهود نفسه مش مستنى نتيجة معينة، وبعد فترة من المثابرة والاجتهاد بدء جسم يتحسن ويشوف نتيجه كويسه ، فا زاد عنده معتقده وايمانه انه ممكن يحسن اكتر واكتر وهكذا لحد ما بقى اسلوب حياة..

شوفت البداية كانت منين؟ كانت من ايمانه انه يقدر يتعلم ويطور ويكتسب أى مهارة ،، لو كان معتقد ان جسمه هيفضل زى مهو مفيش منه فايدة مكنش اتحمس اصلا انه ينزل جيم ويعمل نظام غذائى وهكذا، وكان هيبقى مستعجل وعايز يحسن شكله من غير ما يتعب ولا يبذل مجهود ..!

ملحوظة: الاعتقاد والايمان لوحده مش هيعمل حاجة، يعنى متقولش انا مؤمن انى اقدر اتطور وابقى أفضل وأنت مش بتعمل أى فعل ولا بتاخد أى أكشن "Action" لازم تكمل الدائرة اللى فوق عشان توصل لعقلية النمو والتطوير المستمر


أعتقد أنت كده فهمت وأدركت ليه عقلية النمو مهمه وليه محتاج تكتسبها عشان تطور من نفسك، الكلام يطول عن عقلية النمو بس هنكتفى بالقدر ده، أنا حبيت تكون دى اول مقالة فى سلسلة مقالات تطوير الذات لانى مؤمن أن لازم يبقى عندك أساس قوى عشان

تقدر تتعلم أى حاجة ويبقى التطوير بالنسبالك أسلوب حياة ..

هستنى منك تعليق على المقالة باللى اتعلمته منها، وخليك متاكد اننا بنبذل أقصى مجهود عشان نوصلك محتوى يليق بيك، فا نتمنى منك ما تبخلش على غيرك بانك تشارك معاه المقالة وتنشرها عشان نوصل رسالتنا لاكبر عدد ممكن من الطلبة ..

إقرا ايضا : 

Ahmed Sysy
كاتب المقال : Ahmed Sysy
مؤسس نادي القراءة العملية، ومتخصص فى صناعة المحتوى، وتحسين محركات البحث "SEO" أسعى لمساعدة مليون شاب لبداية رحلة التعلم الذاتي
تعليقات
14 تعليقًا
إرسال تعليق
  • غير معرف 26 يونيو 2018 في 7:47 ص

    مقالة روعة جدا بجد ، شكرا ليكم :)

    إرسال ردحذف
    • Ahmed Sysy
      Ahmed Sysy 10 فبراير 2019 في 7:18 ص

      شكرا جدا على وقتك

      حذف
    • Unknown
      Unknown 26 يونيو 2018 في 9:32 ص

      مقال رائع لكن المشكلة الكسل في ان الانسان يبدا يبحث عن اللي حيساعده في تطوير مهارة معينة وطبعا الكورسات الاونلاين مشكلتها بتحتاج متابعة من البيت وفي ناس مابتعرفش تواظب على متابعتها وبالتالي لو حتعلم شوية حوقف في النص ودي مشكلة صبر وارادة وبالتالي عقلية النمو مابتستمرش وبيرجع الانسان لنقطة الخبرات اللي عالجاهز

      إرسال ردحذف
      • Ahmed Sysy
        Ahmed Sysy 20 سبتمبر 2018 في 10:22 ص

        أزال المؤلف هذا التعليق.

        حذف
        • Ahmed Sysy
          Ahmed Sysy 10 فبراير 2019 في 7:17 ص

          معاك حق الكسل مشكلة بتواجهنا كلنا، وعقلية النمو بتاخد وقت ومجهود لحد ما تكتسبها..
          الفكرة فى انك تكمل مهمها وقعت، مفيش حد مش بيوقع ولا بيكسل المهم مين بيستمر وده بيفرق الانسان الناجح صاحب عقلية النمو عن الانسان الكسول

          حذف
        • غير معرف 10 فبراير 2019 في 6:28 ص

          شكرا جزيلا على مجهوداتك .. الله يوفقك :)

          إرسال ردحذف
          • Ahmed Sysy
            Ahmed Sysy 10 فبراير 2019 في 7:17 ص

            الشكر لله وحده .. يارب يوفقنا جميعا

            حذف
          • Saleh Mohy
            Saleh Mohy 15 مايو 2019 في 1:39 م

            انا بصراحة بقالي فترة بحاول، حصلت شوية مشاكل معايا ع فترة الجيش وع سني اللي المفروض اني كنت فاكر اني كبرت بس بصراحة خدت ال ٣ ايام اللي فاتت دي بدور ع مصادر واقرا مقالات، الله ينور عليك والله تقريبا زودت عندي الbeliefe بنسبة ٥٠%، شابوووه وان شاء الله البداية تكون معاكم :) ^_^

            إرسال ردحذف
            • Ahmed Sysy
              Ahmed Sysy 16 مايو 2019 في 9:10 ص

              ما شاء الله ده شئ يسعدنا جدا والله ، ربنا يكرمك وييسر أمورك ، احنا معاك ديما لو احتجت اى حاجة .. بالتوفيق

              حذف
            • ابوالقاسم
              ابوالقاسم 14 يونيو 2019 في 9:13 ص

              اتمني من الله ان يعطيك قدرحققك وشكرا علي الطاقة التي بدأت داخلي والتي اتمني ان تدوم حتي احقق ما اريد وشكرا لك

              إرسال ردحذف
              • Ahmed Sysy
                Ahmed Sysy 16 يونيو 2019 في 12:33 ص

                الشكر لله وشكرا لكلامك الرائع .. جزاك الله خيرا ونتمنى لك التوفيق

                حذف
              • هيما
                هيما 16 أغسطس 2019 في 9:06 ص

                أخى الكريم جزآك الله خير على المجهود المذكور أعلاه نومن من داخل أعماقنا أن الله علم ادم الاسماء كلها ونحن زوريته وندعوا الله ان يهدنا إلى الصراط المستقيم ويكشف لنا مكانتا الحقيقة في الحياة أخى الفاضل لكم جزيل الشكر والتقدير

                إرسال ردحذف
                • Dr Ahmed farag Senior
                  Dr Ahmed farag Senior 19 نوفمبر 2021 في 1:59 م

                  مجهود محترم بارك الله لك

                  إرسال ردحذف
                  • أنوار
                    أنوار 9 مارس 2022 في 8:38 ص

                    السلام عليكم ورحمة الله وبركاته
                    شكرا لك على هذا المقال
                    انتبهت لنقطة مهمة جدا أثناء قرائتي للمقالة وهي:
                    أنه احنا بنتولد بعقلية النمو وهذه فطرتنا
                    ولما نتبنى عقلية الثبات بنكون عكس الفطرة وبنعاني ونحبط ونتوقف عن التطوير
                    لكن لو أدركنا أنه رب العالمين خلقنا أطوار ومستمرين ننمو دائما ، أقرب مثال: كنا أطفال وصرنا بالغين ، وأخذنا وقت في النمو من أول مرة سمعنا وأول مرة حاولنا نمشي لغاية ما عرفنا نتكلم ونكتب ونقرأ
                    عقلية النمو هي الجذر الحقيقي لنا و الفطرة اللي خلقنا عليها
                    *****
                    إن شاء الله كلماتي تكون دافع وحافز لكم للتقدم والتطور والنمو

                    إرسال ردحذف



                    وضع القراءة :
                    حجم الخط
                    +
                    16
                    -
                    تباعد السطور
                    +
                    2
                    -