1/ ادى لنفسك وقت عشان تبدا اليوم بدل ما تصحى وانت مستعجل ومضغوط، انت فى غنى عن كل ده، اصحى بدرى شوية عشان تحس براحه واتنفس بعمق

2/ تخيل يومك: قرر اول ما تصحى انت عايزه يوم حلو ولا وحش! وعشان تبدأ يوم حلو لازم تفكر بإيجابية، واتحكم فى رد فعلك للحاجات اللى هتحصل طول اليوم

3/ التأمل: ادى لنفسك لحظات للتامل أول ما تصحى ومفيش أحلى من انك تبدأ يومك بالصلاه او لو تعرف تلعب يوجا يبقى زى الفل

4/ خليك شكور: افتكر كل النعم اللى ربنا وهبهالك واشكره عليه .. هات ورقة وقلم واكتب فيها كل الحاجات الحلوة والجمل اللى بتحفزك والايات اللى بتحبها وممكن تفتح المصحف على صفحة عشوائيه، وتشوف رساله ربنا ليك ايه، وتخليها عادى عندك كل يوم صفحه منها رسالة من ربنا

5/ توقع يومك وجهزه قبلها: قبل ما تنام رتب كل الحاجات اللى هتعملها تانى يوم هتوفر عليك كتييير

6/ تجاهل مواقع التواصل الاجتماعى على الاقل 15 دقيقة اول ما تصحى .. كام واحد فينا اول ما يصحى اول حاجه بيعملها بيفتح الفيس، والواتس، واخواتهم! حاول تغير العادة دى وتستنى على الاقل 15 دقيقة.

7/ كل يوم جديد هو هدية من ربنا وبدايه جديدة ليك اغتنمة صح وانسى كل السلبيات والاخطاء اللى حصلت قبل كده، وركز على الحلول مش المشاكل وابنى عادات ايجابية جديدة

8/ اصحى بدرى عشان تقدر تعمل كل الخطوات اللى فوق دى. الصحيان بدرى دى من احلى العادات اللى هتفيدك جدا فى حياتك وهتلاقى عندك نشاط وطاقة ونفسيتك هتبقى حلوه لانك الصحيان بدرى والهوا النقى ده بركة، حاول تجربها

كده احنا خلصنا تجهيز العقل، وندخل على تجهيز الجسم .. 

1/ خد وقتك وبلاش استعجال واستمتع بكل حاجه بتعملها من اول غسيل وشك لحد الفطار

2/ افطر فطار صحى " فواكة – خضار – لبن – بيض – عسل .. "

3/ نام على الاقل 6 ساعات لحد 8 ساعات . وأول ما تصحى اشرب مية كتير الصبح.

4/ اشرب مية بلمون ده هيزود تركيزك وطاقتك وهينضف معدتك وتغسل سنانك بعدها بنص ساعة .

5/ اشرب لبن او شاى بدل القهوة على الصبح .

6/ اعمل تمارين الصباح – اجرى – اتمشى – او اطاله لعضلات الجسم. حتى لو 5 دقايق هتفرق معاك جدا .ونزل التطبيق ده هيفيدك جدا جدا 30 days challenge

7/ ابدا يومك بابتسامة واتنطط فى المكان واتشقلب و اتجنن عشان تغير مودك .

8/ حط الحاجات المهمة الصغيره فى مكان واحد صغير " اعمل زى بوكس صغير كده وحط فيه موبايلك – محفظتك – قلمك – مفاتيحك وكل الحاجات اللى بتاخدها وانت نازل الصبح "

الخلاصة :

انك تبدا يومك بشكل صح و ايجابى , ده هيفرق جدا فى باقى يومك وفى حياتك عمتا , ومع الوقت هتصبح عادة وجزء من حياتك , وهتقدر تعيش ايام كتيرة جدا من عمرك بكل نشاط و راحة .. وانك تعيش يومك مرتاح ومبسوط , ده قرارك , ولازم تقرره كل يوم وقبل ما تنام وتطبق العادة و الخطوات اللى ذكرناه فى المقالة دى فى حياتك من الفتره الجاية .

ها قولنا بتبدا يومك ازاى ؟


للحصول على الكورس المجانى اضغط هنا
لو حابب تنضم للجرب الخاص بينا اضغط هنا هنساعدك تدرس اللى بتحبه من بيتك " نادى القراءه العمليه "