وصفات تخسيس - ازاى خسيت خلالها 45 كيلو في 14 شهر. (قصة حقيقية)‎

وصفات تخسيس - ازاى خسيت خلالها 45 كيلو في 14 شهر. (قصة حقيقية)‎
    النهارده معانا قصة شاب من أصدقاء الصفحة قدر إنه يخس 45 كيلو فى 14 شهر وحقق إنجاز كبير ويوصل لحلمه بطريقة طبيعية وبسيطه من غير ما يشرب شاى دودو ولا شاى دكتور منج الصينى وغيره من المنتجات الوهمية اللي بيروجوا لها على شاشاتنا الجميلة. بوصفات و طرق تخسيس جميلة وعملية

    دي قصة إبراهيم بيحكيها بنفسه بعد مقابلتنا معاه:

    هحكي تجربة بسيطة ليا خسيت خلالها 45 كيلو في 14 شهر.

    أنا عارف إنك ممكن تقول لنفسك إيه اللي يخليني أهتم بالحكاية دي وأدوش دماغي؟ هو الدايت ده هيوصلني لإيه يعني؟

    أنت ممكن تكون في حالة مش كويسه وأنت مش حاسس بنفسك وفاكر إن ده الطبيعي بتاع الناس كلها، صحتك على قدك مش بتقدر تجري 5 دقائق على بعض، بتتعب من طلوع درجتين سلم، عندك أرق، مش بتركز في الشغل، نفسيتك بتتعب بسرعه، ثقتك في نفسك ضعيفه، وفجأه تكتشف ان عندك حاجه لا قدر الله بسبب عاداتك الغلط فترات طويله من حياتك

    كل ده ممكن تغيره لما تنظم حياتك ويومك، وإعتبر الدايت أول خطوة لحياة أفضل لأنك كلك على بعضك عبارة عن الأكل اللي بتاكله يعني الأكل ده بيأثر في عقلك وجسمك ونفسيتك وبالتالي شغلك وبيتك يعني بيحدد مستقبلك ،، الموضوع يبان صغير بس لو فكرت شويه هتعرف إنه ممكن يكون نقطة إنطلاق ليك تحسن بيها حياتك كلها وتكرر نمط النجاح من التجربه دي وتطبقها على جوانب تانيه في حياتك لحد م تلاقي نفسك إتغيرت 180 درجه وأنت مش حاسس بنفسك زي بالظبط لما كان حالك مقلوب 180 درجه وأنت مش حاسس برده

    ندخل في الموضوع ازاى تخس لو نفسك تخس:

    1. نظام غذائي متنوع هتلاقيه على صفحة زي لو نفسك تخس برامج محترمه جدا ،، ليـــــــــــــــــــــــــــــه ؟

    أنت متعرفش حاجه عن الأكل الصحي أو معلوماتك قليلة .. لو سبت نفسك تعمل نظام من دماغك هتبطل بسرعه ودي أكبر ميزة للكتيب اللي أنا مشيت عليه إسمه " الدايت أسلوب حياة " لأنه بيحسسك إن نظامك معاك دايما وتقدر تحدد أنت هتاكل إيه لمدة شهر قدام كمان وبالتالي بتشتري الطلبات اللي هتحتاجها سواء من السوق أو السوبر ماركت قبل الأسبوع ما يبدأ عشان تحضرها ،، قصة الأكل العشوائي أو إنك تاكل من أكل البيت الدسم بس بكميات قليلة مش كويسه خاصة لو أنت تخين وعايز تخس كتير ..

    أنت محتاج تنضف جسمك من الدهون وآثار السمنة بأكل صحي وبعد كده مع الأيام أنت هتفهم وهتتعلم إزاي تخلي الأكل الصحي أسلوب حياة وإمتى تاكل أكل صحي وإمتى تاكل الحاجات اللي كلنا بنحبها وبتقضي على صحتنا سواء مسبك أو غيره

    لينك صفحه : لو نفسك تخس

    2. لانش بوكس كبير تاخد فيه أكلك وأنت برا البيت خاصة في الشغل ،، ليـــــــــــــــــــــــــــــه ؟

    ببساطة أنت شخص بتحب الأكل وبتخاف تجوع ولما تجوع أوي هتاكل أوي برده فــ لما تلحق نفسك بأكل صحي جاهز في البوكس هتحس بالأمان لأن أكلك معاك وممكن متاكلش كتير منه كمان لمجرد أنك مطمن أن الأكل متاح جنبي وأنا من الناس دي

    3. كوتش رياضي مريح عشان المشي ، لو بتمشي وأنت لابس لبس غير مريح هتتعب بسرعه ورجلك هتوجعك وأنت غالبا محتاج تمشي نص ساعه أو ساعه يوميا حسب وقتك.

    4. سواء هتمشي أو تجري أو ناوي تروح جيم ضروري جدا جدا جدا تنزل App على موبايلك وده إعتبره الكوتش بتاعك لأن معظم الناس بتتدرب في الجيم بعشوائية ومبتلاقيش نتيجة طبعا وبعد فترة بتبطل وتقول محستش بفرق وزهقت ومكنش في كوتش يتابع معايا .. دور على Bodybuilding.com هتلاقي برامج محترمه مناسبه لهدفك سواء لياقة أو تخسيس أو بناء عضلات

    أنت كدا نجحت بنسبة 90% في الدايت والله أنا بالنسبة لي الدايت كله كان في اللانش بوكس والكتيب اللي كان معايا وماشي عليه

    أهم أسباب الفشل:

    1. أهلك وحبايبك اللي بيحبوك أوي وصعبان عليهم إنك بتخس وخاصة والدتك اللي كل شويه هتحط لك حتة لحمة زياده أو تعملك ساندوتش حلاوة بالقشطه عشان شايفاك هفتان من الجوع يا عيني ،، دول بيحبوك فعلا وأنت صعبان عليهم بجد بس للأسف بيحبوك غلط ودول أول ناس أنت محتاج دعمهم يعني لازم تقنعهم إنك محتاج تخس عشان يساعدوك وأنت في أفضل حالاتك وكلك همه وعزيمة والأهم لما تضعف يسندوك ويشجعوك تكمل تاني لو وقعت في النص وده هيحصل وحصل معايا وبيحصل مع كل البشر.

    2. أصدقاء السوء اللي بيتريقوا عليك وأنت تخين وبرده لما تخس هتلاقيهم هيقولوا لك وشك وحش وعضّمت، عشان هما شايفينك Teddy Bear مقلبظ يضحكوا عليه لما القعدة تحتاج فرفشة لكن لما تبقى رياضي وجسمك فيت وشكلك أفضل دول أول ناس هيقولوا لك خسيت واوحشيت وكل مشتقات ايت ايت ايت ،، لو تقدر تاخدهم معاك الجيم يكون أفضل عشان محدش يحس إنك كنت أقل منه وتخين وبقيت بطل وهو مركون ع الرف وممكن يغير منك وهتكسب ثواب برده.

    3. هدفي أخس وأوصل للوزن المثالي، يا حبيبي مفيش حاجه إسمها وزن مثالي، في شكل مثالي، أنت عايز رقم على الميزان ولا تحسن من شكلك؟ أكيد عايز يكون شكلك أفضل، عشان شكل جسمك يكون أفضل ومتتخنش تاني خلي هدفك واضح من البداية

    "جسم رياضي زي الأبطال الرياضيين" إسعى إنك تبني جسم رياضي عشان لو هدفك إنك تخس بس صدقني هتتخن تاني بسهولة، كل م كبّرت الهدف وحققته كل م هيصعب عليك إنك تكسر الكيان اللي بنيته ،، روح الجيم إتمرن تمرين الأبطال عشان متبقاش معضّم وكل اللي حققته انك بقيت واحد رفيع من الرفيعين اللي ماشيين في الشارع معملتش جديد يعني، الهدف واضح "جسم رياضي"

    4. لو مكنتش تقرأ عن التغذية الصحية والرياضة اللي بتمارسها بإستمرار مش هتكمل ... ينفع تركب عربية من غير ما تتعلم السواقة وتعرف إشارات المرور "غير في مصر طبعا" ؟ أكيد لاء ..

    ممكن تقرأ معلومة بسيطة تنقذك في وقت أنت كنت هتبطل فيه دايت أو جيم، مثلا بقالك أسبوعين مش بتخس، لو بتقرأ هتعرف الأسباب المحتملة وتتفاداها، مثال تاني لو بتمارس الرياضة، ممكن تكون بتعمل تمرين غلط أو وصلت لمرحلة ال plateau ومش بتحقق نتائج أفضل سواء في الشكل أو القوة الجسمانية، لو بتقرأ بإستمرار هتوصل للأسباب دي وتحلها بسرعة. بإختصار كده، عندك إيه أغلى من حياتك؟ مش خسارة تخصص وقت ومجهود عشان تصون النعمة اللي ربنا إدهالك وهيحاسبك عليها، صح؟

    دي صفحة محترمة جدا فيها معلومات مفيدة عن الدايت والجيم Egyfitness.com


    Ibrahim Ahmed للتواصل مع صاحب القصه :)
    Ahmed Sysy
    @مرسلة بواسطة
    كاتب ومحرر اخبار اعمل في موقع نادي القراءة العملية | بوابتك للتعلم الذاتى .

    إرسال تعليق