كيفية الصلاة - معنى سوره الفاتحه - افهم صلاتك

كيفية الصلاة - معنى سوره الفاتحه - افهم صلاتك

    تفسير سوره الفاتحه

    الفاتحه

     ايقظته رنة  هاتفه ..

    - احمد بصوت يملؤه النعاس : " الو مين ؟"
    - عمر : " ايوه ياعم احمد انت لسه نايم قوم يابني اتاخرنا احنا مستنينك تحت"
    - احمد : " أتأخرنا على ايه مش اول محاضره الساعه 1 ؟"
    - عمر : " ايوه بس احنا قررنا اننا نتقابل النهارده بدري علشان نفهم سورة الفاتحه."
    - احمد : " اتفقتوا.... بس انا متفقتش طيب"
    - عمر: " انت اللي سماك احمد ظلمك,,, قوم يا سعفان,, ما انت علشان يومك بسنه فقررنا اننا نحطك قدام الامر الواقع. وانجز بقى احنا تحت."
    - احمد : " طيب ياعم نازل الله يسامحكم."

    وبعد دقائق نزل احمد وقابل اصدقائه
    - احمد : " صباح الخير يا قدري."
    - عمر : " صباح الخير يا كسلان ساعه بنصحيك, يلا هنروح هنروح نقعد في الكافتيريا قولتوا ايه؟؟"
    - علي : " زي الفل يلا بينا."

    وانطلقوا الثلاثه حتى وصلوا الي الكافتيريا وبدا النقاش ...

    - علي : " صلوا على النبي بقى كده يا شباب المره الي فاتت لما اتكلمنا في القبله بدات احس بتغير وانا واقف اصلي ودا اللي خلاني عايز اكمل وابدا افهم اكتر."

    - عمر : " وانا حسيت ان الموضوع مختلف عن ما انا فاهم يعنى حسيت ان في حاجات غايبه عني واني لازم اعرفها علشان احكم صح , وبالمناسبه انا بدات اصلي.. بس مش الفجر علشان نبقى واضحين,, موضوع القبله دا فرق معايا شويه فكرة اني واقف وكل الناس اللي بتصلي في كل العالم عنيها على نفس المكان دا لفت انتباهي اوي مش عارف متخيلوش."

    - احمد : " ربنا يفتح علينا ويثبتنا يارب يا شباب."
    - علي : " يلا يااحمد ابدا كده بسم الله الحمد لله رب العالمين"
    - احمد : " استنى ياعم مالك داخل سخن علينا كده ليه , قبل ما نبدأ في السوره نفسها لازم نعرف فضل السوره ,, انت اذا رايح تزور حد وانت متعرفش قيمة ومركزه هتهتم بالزياره ؟؟"

    رد علي وعمر في صوت واحد : " اكيد لا"
    - عمر:  "انت صح يا ريس قولتله كده بس هو مصدقش ابدا يا كبير."

    مع ابتسامه استكمل احمد كلامه :  "  اول حاجه لازم ناكد عليها ان سورة الفاتحه سوره مكيه ونزلت بعد سورة المدثر وان البسمله هي اول ايه فيها , وان كمان ليها اكتر من اسم كل اسم بيعكس فضل من فضائلها ,, يعني مثلا  يُقال لها أم القرآن وام الكتاب والشافيه والكافيه والوافيه والصلاه والحمد والسبع المثاني.. علشان  منسرحش في شرح معنى كل اسم من اسماء السوره هقولكوا مقوله قالها اهل العلم زمان لخصت فضل سورة الفاتحه,, قالوا ان ربنا عز وجل انزل اربع كتب جمع معانيها في الزابور و التوراة والانجيل والقران, وجمع معاني هذه الكتب في القرآن وجمع معاني القرآن في المفصل ( السور من اول ق الى اخر المصحف ) وجمع المفصل فى  الفاتحه وجمع الفاتحه في اياك نعبد واياك نستعين ..

    نطلع من هنا بأيييه ؟؟

    ظهرت علامات الدهشه على اوجه الجميع ورد علي بصوت خافت :" ان الفاتحه مجمعه معاني كل الكتب السماويه اللي نزلها ربنا!!."

    - عمر: " طيب  ازاي ؟؟."
    - احمد : " خلينا نبدا و واحده وحده ربنا ينور لنا طريقنا."
    - عمر: " يلا بسم الله الرحمن الرحيم"
    - احمد : " لا, الاستعاذه الاول."
    - علي : " مالها الاستعاذه يااحمد اعوذ بالله من الشيطان الرجيم فيها ايه دي؟؟"
    - احمد : " يعني ايه؟؟"
    -عمر: " يعني اعوذ بالله من الشيطان الرجيم"
    - علي متهكمًا : " طول عمرك لماح يا عمر يا خسارتك في البلد ياابني والله,, مالها يااحمد بجد هي ليها معنى غير اعوذ بالله من الشيطان الرجيم؟"
    - احمد : " يعني ايه اعوذ بالله ؟"
    - عمر: " يعني اعوذ بالله ومنعرفلهاش حاجه غير كده متحاولش ."

    - احمد : "  كلمة اعوذ يعني الجأ واحتمي واعتصم و استعين والباء اللي في لفظ الجلاله الله اسمها باء الاستعانه يعني اعتصم واستعين بالله ليحميني من ايه بقى احنا بنكمل نقول من الشيطان الرجيم لكن احنا طبعا نقدر نحتمي بربنا من اي شيء ممكن يخوفنا او يأذينا, بس طبعا علشان تتحقق الحمايه لازم يكون في شروط."

    - علي : " ايييييييه هي؟؟"
    - احمد : " اول حاجه لازم اكون عارف الحاجه اللي انا خايف او هربان منها سواء ماديه او معنويه ودا اللي بنسميه المُستعاذ منه,, تاني حاجه لازم اعرف اللي هحتمي بيه , هو انت ينفع تروح لحد متعرفوش ولا تعرف سلطته ولا قدرته  وتقوله احميني..؟!"
    - عمر وعلي في صوت واحد : " لا طبعا."

    - احمد : " بالظبط كده عمري ما هحس بالامان واتاكد فعلا انى  محمي غير مع حد انا واثق في قدرته وفي ملكه وسلطته ومتاكد انو يقدر يحميني وانه بالفعل هيحميني ومعتمد عليه ولله المثل الاعلي  زي ما هو من المستحيل بردو انك تروح لواحد وتقوله احميني اهو انت احسن من مفيش ! لازم تكون واثق فيه  ولله المثل الاعلى.
    يبقي من هنا اطلع بحاجتين ان اساس الاستعانه او الاستعاذه او الاحتماء بربنا حاجتين "ثقه بالله واعتماد عليه والاتنين مش بيجوا غير بمعرفه  الله عز وجل"

    قاطع احمد صوت عمر قائلًا : " دلوقتي بس فهمت موقف بيتكرر في حياتي كل يوم تقريبا.."
    - احمد : " موقف ايه ؟!"

    - عمر:" امي كل ما تشوفني مدايق او متعصب تقولي استعيذ بالله بس وانت تروق وانا اقولها قولت يا ستي ومروقتش بطلوا المسكنات اللي بتدوها لنفسكم دي وكان كل تفكيري في الوقت دا ان هتعملي ايه اعوذ بالله , هو الدين مخدر لمجرد اني اذكر ربنا واتخيل ان الدنيا تمام هتبقى تمام, اتاري الموضوع مش كده اتاري الموضوع بجد وانا اللي مكنتش فاهم اللي بيحصل لمجرد اني مش فاهم وبقلها بلساني والسلام وبالتالي مكنش في حاجه بتحصل كل مره بقول فيها اعوذ بالله من الشيطان الرجيم."

    - علي : " ربنا يرحمنا والله يا عمر كلنا كده ."
    - احمد : " ربنا يرحمنا ويعلمنا,, يبقى كده معنى اعوذ بالله يعني احتمي بالله من شر كل شي بقى شيطان غضب نفسي شهوات معاصي فتن هروحله علشان هو يحميني من كل دا.
    قبل ما ننقل على البسمله ايه التطبيق العملي اللي نخرج بيه من الجزئيه دي ؟؟"

    - علي : " اني كل ما اجي ااقول اعوذ بالله افتكر اني في حمى الله واني بلجأله علشان يحميني وانو عمري ما هيردني ."
    - احمد : " بالظبط كده . نبدا بقى بالبسمله بسم الله الرحمن الرحيم "
    - عمر: " المحاضره ياااحمد خلينا نروح ونكمل بكره باذن الله."
    - علي : " يا نهار ابيض الساعه 1 يلا بسرعه".

    وانطلقوا الثلاثه الي المحاضره مستعنين بالله على استكمال ما بدأوه غدا باذن الله تعالي.



    لقراءه المقاله الاولى عن معنى الصلاه اضغط هنا " يعنى ايه صلاه "   

    ولقراءه المقاله الثانيه عن استحضار القبله  اضغط هنا




    Ahmed Sysy
    @مرسلة بواسطة
    كاتب ومحرر اخبار اعمل في موقع نادي القراءة العملية | بوابتك للتعلم الذاتى .

    إرسال تعليق