ليه لازم يبقى عندك قناه على اليوتيوب !

ليه لازم يبقى عندك قناه على اليوتيوب !

    ليه لازم يبقى عندك قناة على اليوتيوب !

    قبل ما نبدا فى المقالة دى , لازم تعرف المعلومات دي عن اليوتيوب :

    • اليوتيوب يعتبر ثاني أكبر محرك بحث بالعالم بمعدل مليار زائر يوميا .
    • فى وقت كتابة البوست ده اليوتيوب يتلقى يوميا 5 مليار مشاهدة و الرقم ده يزداد كل يوم .


    اظن دى اسباب كفايه تخليك تعمل قناه على اليوتيوب , وتكمل قراءة فى المقال :)


    اى قناه على اليوتيوب مش بتبدأ بأول فيديو زى ما الناس فاكره ! بدايه اى قناه على اليوتيوب بيكون " مبدأ " أو " رسالة " وعشان يكون عندك " رسالة " و " مبدأ " لازم تسأل نفسك سؤال بسيط جدا

    " ليه انا عايز اعمل قناة على اليوتيوب ؟ "

    • يمكن انت عايز تعمل قناه على اليوتيوب عشان تشارك هوايه عندك مع الناس . 
    • يمكن يكون عندك خبره ومعرفه كبيرة فى مجال معين وعايز تشاركها مع الناس . 
    • يمكن تكون شغوف بالمونتاج وعندك افكار كتير لفيديوهات تفيد الناس. 
    • يمكن يكون عندك اراء قوية فى مواضيع عامه وعايز تشاركها مع الناس. 
    • يمكن تكون شغوف بتعلم مهارة معينة أو مجال معين وعايز توصل شغفك للناس. 
    اى سبب من الاسباب اللى ذكرناها فوق أو ما شابههم من اسباب وافكار كفيل انه يخليك تبدأ قناتك على اليوتيوب.

    ولكن ..

    لو انت عايز تعمل قناه على اليوتيوب لمجرد انك تعمل فلوس من غير ما تقدم قيمة للناس , فانصحك انك تعيد التفكير فى الموضوع ده. مع العلم انك اه تقدر تعمل فلوس كويسه من قناتك على اليوتيوب و لكن مش عايز احبطك و اقولك انك لو مش بتقدم قيمة للناس فى فيديوهاتك , مش هتستمر ...


    وافتكر دايما , انك عشان تكون يوتيوبر " Youtuber " ناجح فلازم لازم تكون بتقدم محتوى قيم ويفيد الناس ويحل مشاكلهم. وبعد كده يجى دور انك تسوق للمحتوى والفيديوهات بتاعتك دى , بس اوعى تسوق لقناتك لو مش عليها محتوى يفيد الناس بشكل او باخر لازم يبقى عندك سبب كبير اوى و شغف لا ينتهي عشان تقدر تكمل على اليوتيوب و تسيب أثر فى حياة الناس.

    انما لو انت بتقدم محتوى غير مفيد ومتوقع انه يجيب ملايين المشاهدات , فا لازم تراجع نفسك تانى عشان متحبطش :)

    نيجى بقى للسؤال التانى : ايه نوع الفيديوهات اللى ممكن تعملها ؟

    عشان يكون عندك قناه ناجحة على اليوتيوب لازم تخصص قناتك فى مجال معين ,  لازم قبل ما تبدأ قناتك يكون عندك فكره عن نوعية الفيديوهات اللى تقدمها , و المجال إلي تخصص قناتك فيه , والناس اللى هيهتمو بالفيديوهات دى.

    مثال بسيط عشان توضح الصوره اكثر , مثلا انت عايز تعمل قناه تقدم فيديوهات تعليمية ؟ ولا فيديوهات تقدم محتوى ترفيهي ؟ ولا محتوى رياضي أو اخبارى , او اجتماعى ؟

    بعد ما بتحدد انت هتقدم ايه وايه الغرض من قناتك , نيجى للخطوة اللى بعد كده . انك تختار موضوع معين فى المجال ده وتقدم فيه محتوى كويس . مثال : لو واحد يقدم محتوى تعليمي , وقرر انه يتخصص فى تقديم فيديوهات للمرحلة الثانوية فى مادة الرياضة.


    بس خد بالك كويس جدا وانت بتختار المجال اللى هتخصص فيه , اوعى تختار مجال انت مش شغوف بيه عشان هيجيب مشاهدات عالية ! صدقنى مش هتكمل و هتخسر كتير جدا , انت لازم تبدا فى مجال انت شغوف بيه جدا جدا عشان تقدر تكمل , و اوعى تقلد حد او تسرق محتوى مش بتاعك , ديما خليك نفسك .

    وزى ما قال الفنان أحمد مكى فى الاغنية " متحاولش تبقى اى حد تانى غير نفسك " ولو دورت على أنجح قنوات على اليوتيوب هتلاقيها لناس شغوفين جدا بالمحتوى اللى بيقدموه عشان كده نجحو :)

    السؤال الثالث : من هو جمهورك المستهدف؟" Who is your target audience " ؟

    بعد ما تحدد رسالتك اللى حابب توصلها , والمجال اللى هتبدا بيه , والمحتوى اللى هتقدمه , لازم تحدد مين هو الجمهور او الفئة المستهدفة اللى هتكون مهتمه انها تشوف المحتوى ده وتتعلم المجال ده ؟


    مثال
    1- قناة رسالتها انها تعلم الناس ازاى ياكلو اكل صحى , وتخصصك فى مجال الصحة واللياقة البدنية , يبقى الجمهور المستهدف بتاعها هيكون الناس اللى عايزه تعيش حياة صحية سليمة .

    مثال 2-
    قناة بتقدم محتوى تعليمي , فى مادة الرياضة والتاريخ , ومستهدفة كل طلاب الثانويه العامه اللى عايزين يتعلموا صح.


    وعشان تحدد جمهورك المستهدف جاوب على الاسئله دى :

    • ما هو متوسط عمرهم ؟
    • من دولة ايه ؟
    • ولاد ولا بنات ولا الاتنين ؟
    • بيحبوا يشوفوا فيديوهات نوعها ايه ؟
    وهقولك طريقة تسهل عليك الموضوع ده , شوف القنوات الناجحة فى مجالك على اليوتيوب ومين الجمهور اللى بيشوف المحتوى بتاعهم وابدا حدد الجمهور بتاعك من عندهم .

    السؤال الرابع : هتنشر فيديوهاتك كام مره ؟

    فى قنوات ناجحه جدا بتحب تنزل فيديو واحد مرة كل اسبوع , قنوات تانى مره كل شهر , قنوات تانى مرتين فى الاسبوع , او مره كل يوم .


    انت كمان لازم تحدد هتنزل فيديوهاتك كام مره فى وقت قد ايه ؟ لان من اهم العوامل عشان يكون عندك قناه ناجحة بتقدم قيمه بجد هي " الاستمرارية " بس اياُ كان المده اللى هتنزل فيها فيديوهاتك , لازم تلتزم بيها دا وتعود جمهورك عليها .

    و الافضل من وجهه نظرى انك تنزل فيديو واحد كل أسبوع :)


    و عشان تجاوب على السؤال ده , لازم تحدد المده اللى تقدر من خلالها تنتج فيديو جديد بفكره جديده بجودة عالية ومحتوى قيم جدا .

    و اخيرا :

    لازم تكون صبور , و اوعى تكون فاكر انك بعد اول فيديو هتعمله , تانى يوم هتلاقى آلاف المشاهدات عليها ! دى فكره غلط طبعا مع انها مش مستحيله ولكن انت لسه بتبدأ فلازم تكون صبور وتبنى قناتك وحده وحده.


    تقدر تبنى قناة قويه فعلا , لما تقدم محتوى مفيد وقيم بانتظام وتطبق كل الحاجات اللى ذكرناها فى المقالة دى :)


    Ahmed Sysy
    @مرسلة بواسطة
    كاتب ومحرر اخبار اعمل في موقع نادي القراءة العملية | بوابتك للتعلم الذاتى .
    1. مقال مفيد ومميز جدااا👌
      وهستاذنك يا احمد لو ممكن تنزل مقال عن طرق الربح من خلال اليوتيوب والتعامل مع اليوتيوب من ال 0

      ردحذف
      الردود
      1. شكرا لرأيك يا منى , باذن الله هنزل مقالات عن طرق الربح من اليوتيوب من الصفر للاحتراف

        حذف