ازاى تتعلم رسم 2 - نادي القراءة العملية
404
نعتذر , لا نستطيع ايجاد الصفحة المطلوبة

الأربعاء، 16 نوفمبر 2016

ازاى تتعلم رسم 2




في المقال ال فات اتكلمنا عن ان اي حد بامكانه يتعلم الرسم وان الرسم مش مقتصر على اصحاب المواهب الفطريه بس وانما كمان سهل جدا اكتسابه بالممارسه ولو عايز تقرا المقاله الاولى من هنا

وفي المقال دا هنتكلم عن حجات محتاجين نعرفها قبل ما نبدا نتعلم الرسم وعن ازاي نتعلم الرسم بنفسنا من البيت وهنتكلم كمان عن مشكله بتواجه كتير من المبتدئين وهي انهم بيعرفوا ينقلوا لكن مابيعرفوش يرسموا من خيالهم


بس قبل ما نبدا هنطلب من حضراتكم طلب , انكم تشتركو فى قناتنا على اليوتيوب قناه نادى القراءه من هنا 
هتلاقو عليها فيديوهات للطلبه بتوعنا اللى شغفهم فى الرسم زى المواهب دى لما دخلو النادى عرفو شغفهم و طوروا منه وعايشين بشغف


*حاجات محتاج تعرفها قبل ما تبدا تتعلم الرسم


1\ اول حاجه الرسم سهل جدااا بس محتاج وقت ومداومه في التدريب وان يكون عندك استعداد ورغبه قويه انك تتعلم عشان تقدر تستمر

2\ لازم تكون عارف انك مش ببن يوم وليله هتقدر تكون رسام.. طبيعي جدا هتحتاج وقت وهتغلط كتير عشان تقدر توصل لمستوى مرضي لنفسك ع الاقل مش للناس ف ركز على مستواك


3\ كمان لازم تكون عارف انك هتواجه تريقه وانتقادات كتير من اصحابك ومن الناس ودا طبيعي لانك لسه مبتدىء ورسمك لسه بسيط المهم انك ماتستسلمش لكلامهم ولا تحبط في نفسك


4\ اخر واهم حاجه بقى هتسمع كتير جملة الرسم مش مفيد ولا بيضيف حاجه للانسان الجمله دي غلط جدااااا غير ان الرسم بيساعد الشخص نفسيا على انه يتخلص من سلبياته ويخرج ال جواه بشكل مختلف وراقي فيه مجالات شغل كتييييييير جدا للرسامين وكلها بمرتبات ومبالغ كويسه جدا ودا ف مختلف وانواع مجالات الرسم


*ازاي اتعلم الرسم بنفسي؟

اول حاجه ك مبتدئ في الرسم هتحتاج تتعرف على ادوات الرسم واي الادوات ال هتحتاجها ك بدايه

1_الادوات▪اسكتش كانسون او فبريانو
▪اقلام رصاص ماركه فابر كاستل درجات
hb ,h2,h6,b2,b6
▪استيكه فابر كاستل عاديه
▪قلم تحبير 0.5 او 0.8
▪علبة الوان خشب فابر كاستل (حسب الرغبه)
دا فيديو للادوات دي وغيرها واستخداماتها ومنين نقدر نشتريها للمبدع مصطفى سعدي هيساعدكم جدا


ودا فيديو للرسام المصري اسلام اسامه بيتكلم فيه بردوا عن ادوات الرسم

2_ هتحتاج ك بدايه لو مابتعرفش ترسم خالص انك تدرب ايدك في الاول على الرسم واستخدام الادوات ف ممكن تبدأ ب انك تتعلم رسم كارتون ودا ممكن عن طريق رسمه او رسمتين في اليوم وفي الحاله دي الكورس دا ممكن ياخد معاكم اسبوع او 10 ايام هيفيدكم جدا ك خطوة اولى والكورس دا بعد ما تخلصه هتكون ايدك اتدربت على رسم الدوائر والاشكال الهندسية بالايد بتناسق الى حد كبير والتلوين ومسك القلم الرصاص بشكل صح وطريقه استخدام بعض الادوات


3_تعليم رسم البورتريه دي مجموعة كورسات لرسامين مختلفين بيشرحوا بالتفصيل وانا شخصيا اتعلمت وبتعلم منهم اختار حد منهم وتابع معاه او ممكن تابعوا الكل زي ما انا بعمل او ابحثوا عن غيرهم عادي جدا المهم تبداو





4_رسم البورتريه مش هو نوع الرسم الوحيد ممكن متلاقيش نفسك ف رسم الكارتون او الاشخاص فيه غيرهم كتبر الانمي والدولينج والطبيعه الصامته والفن التشكيلي والكتركتير...الخ دوروا ع الموع ال بتحبوه واتعلموه سيرش ع اليوتيوب او جوجل هيوصلكم بافضل الناس ال بيرسموا وازاي تتعلموا من البدايه متكسلوش انتوا بس
و اي سؤال تقدروا تبعتولي على دراويش رسم

Written By : Mona Gamal

شارك المقال

جميع الحقوق محفوظة لـ نادي القراءة العملية | تصميم :