بتقضى كام ساعه على الفيس بوك ؟ 

سؤال محرج مش كده؟ نخلى السؤال محرج اكتر، بتضيع كام ساعه على الفيس بوك؟

طب ايه رأيك لو اتعلمت تستخدم الفيس بوك بطريقه تساعدك فى حياتك العمليه وتطوير نفسك؟

هو ده موضوع مقالاتنا النهارده اللى هنتكلم فيها عن خطوات عمليه و3 مبادئ وكلمات سحريه تقدر تطبقهم فى جميع جوانب حياتك.

قبل ما نبدا المقاله خلينا افكرك بمشهد عبقرى للممثل احمد حلمى فى فيلم مطب صناعى 

لما سأل الشيخ عن استخدامه للكمبيوتر وانه بينزل نغمات للناس راح الشيخ نصحه النصيحه دى وقاله:

( الكبايه اللى بتشرب بيها "مياه" هى هى نفس اللى ممكن تشرب بيها "خمرا" يعنى زى ما تكون مفيده ممكن تبقى سيئه
المهم استخدامك ليها ايه وازاى)

ده بالظبط اللى حصل معايا، انا كنت زى كتير من الشباب بضيع وقت كتير جدا على الفيس بوك من غير استفادة وبشوف بوستات كتير ملهاش لزمه، ومضيع وقتى ما بين خناقات واختلاف فى وجهات النظر و جدالات كتيير سؤاء فى الكوره او السياسه او الفن.

ده غير الجروبات اللى ملهاش لزمه وكنت سايب نفسى للبوستات والجروبات هى اللى بتشكل ثقافتى، وكنت تابع مش بعمل حاجه مفيده فى حياتى. واتحول الموضوع لادمان الفيس بوك،  وتقريبا 95% من وقتى كان بيضيع على الفيس بوك من غير اى شئ مفيد وكنت بشتكى كتير من ظروف البلد وان مفيش شغل والشماعات والحجج اللى انتو عارفينها اكتر منى ..

وكنت شايف الواقع اسود ومفيش اى أمل، مع ان فى نفس الوقت كان فى شباب فى سنى بتنجح فى نفس الواقع ونفس ظروف البلد وهنا ادركت " ان الواقع هو نتيجه اختياراتك وقراراتك وتقدر تشكله زى ما انت عايز"
لحد ما فى يوم قررت اغير نظرتى للواقع ده واعمل ثوره على استخدامى للفيس بوك و عرفت 3 كلمات ومبادئ سحرية غيرت حياتى حرفيا لما طبقتهم فى كل جوانب حياتى.
يعنى ايه المبادئ دى ؟ و ازاى تطبقهم فى الفيس بوك عشان يغيروا حياتك زى ما حصل معايا واتحول الفيس بوك بالنسبالى لاداه قويه جدا جدا بتساعدنى فى شغلى وبفيد بيها الناس واتعلمت ازاى استخدم الفيس بوك صح بدل ما اقفله . ودى من المبادئ اللى بنوصلها ديما فى نادى القراءة العملية  انك تتعلم ازاى تستخدم ادوات التنكولوجيا صح لانها سلاح ذو حدين.

 انا  ديما بقول

"صفحتك الرئيسيه على الفيس بوك بتشكل تفكيرك"

لو كل اللى بيظهرلك على الفيس بوك حاجات تافهه و كئيبه ومش بتضيف ليك قيمة هتلاقي الافكار دى انعكست على حياتك.

فعشان نطبق ال3 مبادئ السحرية دى يبقى لازم نعمل ثوره على صفحتنا على الفيس بوك . باختصار البوستات بتظهرلك على من خلال 4 حاجات ( الاصدقاء - الجروبات - الصفحات - الناس اللى بتابعها و الاشعارات )